စစ်တပ်အာဏာသိမ်းမှုကြောင့် ဈေးကွက်ပျက်တဲ့အထိ ဖြစ်ခဲ့တဲ့ ဧရာဝတီတိုင်း၊ ပုသိမ်မြို့က ပုသိမ်ထီးဈေးကွက် ပြန်လည် အရောင်းအဝယ်သွက်နေပြီး ပြည်ပဈေးကွက်ကပါ ဝယ်ယူလာတယ်လို့ ပုသိမ်ထီး လုပ်ငန်းရှင်တွေဆီက သိရပါတယ်။

ဧရာဝတီတိုင်းကထုတ်တဲ့ မြန်မာ့လက်မှုထုတ်ကုန် ပုသိမ်ထီးတွေဟာ စစ်တပ်က အာဏာသိမ်းခဲ့ပြီးနောက် ဝယ်ယူသူ မရှိသလောက် ဖြစ်ခဲ့ရပြီး လက်ရှိမှာ မြန်မာနိုင်ငံအတွင်း သာမက ပြည်ပနိုင်ငံတွေကပါ ပြန်လည်ဝယ်ယူလာတယ်လို့ ဆိုပါတယ်။

ဧရာဝတီတိုင်းမှာ ပုသိမ်ထီးလုပ်ငန်း လုပ်ကိုင်သူတယောက်က “ပုသိမ်ထီးကို လက်ရှိမှာတော့ ပြည်တွင်းမှာရော ပြည်ပဈေးကွက်မှာပါ အမှာစာတွေ လက်ခံရရှိထားပါတယ်။ ပြည်ပက တရုတ်၊ ထိုင်းနဲ့ ရုရှားဘက်က ဝယ်ယူတာပါ။ လက်ရှိ ပုသိမ်ထီးဈေးကွက်ကတော့ အရောင်းအဝယ် သွက်နေပါတယ်” လို့ ပြောပါတယ်။

ပုသိမ်ထီးကို အလှဆောင်းဆိုဒ်တွေအပြင် ဟိုတယ်အလှဆင်ဖို့နဲ့ ကမ်းခြေသုံးထီး ၂ ပေ၊ ၃ ပေနဲ့ ၄ ပေ ဆိုဒ်တွေကို ပြည်တွင်းဈေးကွက်အပြင် ပြည်ပဈေးကွက်တွေကပါ ဝယ်ယူနေကြပြီး ရန်ကုန်ကနေတဆင့် ပြည်ပနိုင်ငံတွေကို စနစ်တကျ တင်ပို့ရောင်းချနေတယ်လို့ ဆိုပါတယ်။

ပုသိမ်မြို့ခံ ပုသိမ်ထီးလုပ်ငန်းရှင်တယောက်က “အခု ပြည်တွင်းကဝယ်လက်တွေ အရမ်းများနေတယ်။ ဟိုအရင် ၂၀၂၀ မတိုင်မီကာလကိုတော့ မမီသေးဘူးပေါ့။ ၄ နှစ်နီးပါးလောက်က ဝယ်လက်မရှိဘဲ ဈေးကွက်ပျက်တဲ့အထိ ဖြစ်ခဲ့တာပါ။ ပုသိမ်ထီးက မြန်မာ့လက်မှုထုတ်ကုန်ပစ္စည်းတခုဆိုတော့ ဈေးကွက်ပျက် ယုတ်လျော့သွားမှာ စိုးရိမ်တာ။ အခုလိုလေး ပြန်လုပ်လာရတော့ မဆိုးပါဘူး” လို့ ပြောပါတယ်။

ပုသိမ်ထီးပြုလုပ်ရာမှာ သစ်၊ ထီးရိုးဝါး၊ သရကူဝါး၊ တည်သီး၊ ဖဲဖျင်၊ ပိတ် စတဲ့ ပြည်တွင်း ဒေသထွက်ပစ္စည်းတွေ အဓိကအသုံးပြုပြီး မြန်မာ့အနုပညာကို ဖော်ထုတ်ထားတဲ့ ဆေးဆိုးတာ၊ ပန်းချီရေးဆွဲတာတို့နဲ့ အလှဆင်ထားကာ ထီးတချောင်းလုံးကို လက်နဲ့သာ ပြုလုပ်ရတာလို့ သိရပါတယ်။

ပုသိမ်ထီး ၂ ပေကနေ ၃ ပေအရွယ်အစားအထိ တချောင်းဈေးနှုန်းမှာ ငွေကျပ် ၃,၀၀၀ က‌နေ ၇၀,၀၀၀ ကျော်အထိ အရွယ်အစားအလိုက် ဈေးနှုန်းကွာခြားမှုရှိပြီး ပုသိမ်ထီးကို ရဟန်းဆောင်းထီး၊ သီလရှင်ဆောင်းထီး၊ အလှဆောင်းထီး၊ မိုးရေခံထီး၊ အိမ်တော်ရာထီး၊ စားပွဲတင်ထီး၊ မီးအိမ်ထွန်းထီး၊ ဟိုတယ်အလှဆင်ထီး၊ ကမ်းခြေသုံးထီး စတဲ့ ပုံစံအမျိုးမျိုး ပြုလုပ်ရောင်းချကြတာလို့ သိရပါတယ်။