ရွေးကောက်ပွဲမတိုင်မီ ရပ်ကွက်နဲ့ ကျေးရွာအုပ်ချုပ်ရေးမှူးတွေ လုပ်ကြံသတ်ဖြတ် ခံရနိုင်တာကြောင့် သတိထားနေထိုင်ဖို့ ပြည်ထဲရေးဝန်ကြီးက သတိပေးထားပါတယ်။
နေပြည်တော် ပြည်ထဲရေးဝန်ကြီးဌာနမှာ မတ် ၄ ရက် မနက်က ပြုလုပ်ခဲ့တဲ့ ရွေးကောက်ပွဲ လုံခြုံရေးဆိုင်ရာ အစည်းအဝေးမှာ ဒု-ဗိုလ်ချုပ်ကြီး ထွန်းထွန်းနောင်က ပြောဆိုခဲ့တာပါ။
ဒု-ဗိုလ်ချုပ်ကြီး ထွန်းထွန်းနောင်က “ရပ်ကျေးအုပ်ချုပ်ရေးမှူးတွေ အနေနဲ့ PDF တွေကို အထူးသတိထားရမယ်။ ငွေကြေးရလိုမှုတခုပဲ မကြည့်ပါနဲ့။ တချို့ အသတ်ခံရတဲ့ကိစ္စတွေမှာ ငွေနောက်လိုက်ရင်း အသတ်ခံရတာရှိတယ်။ အုပ်ချုပ်ရေးမှူးတွေ အနေနဲ့ စစ်တပ်၊ ရဲတွေနဲ့ ချိတ်ဆက်ထားရမယ်” လို့ အဲဒီအစည်းအဝေးမှာ ပြောဆိုခဲ့တာပါ။
ရပ်ကျေးအုပ်ချုပ်ရေးမှူး အများစုမှာ စစ်ကောင်စီနဲ့ ရဲကို သတင်းပေးပြီး စစ်မှုထမ်းကိစ္စတွေမှာ ငွေကြေးရယူကာ လူအစားထိုးတာတွေကြောင့် လုပ်ကြံသတ်ဖြတ်ခံရတာ ဖြစ်တယ်လို့ အုပ်ချုပ်ရေးမှူးတယောက်က DVB ကို ပြောပါတယ်။
“အုပ်ချုပ်ရေးမှူးတိုင်း အသတ်ခံရတာမဟုတ်ဘူး။ ကိုယ့်ရပ်ရွာ တိုးတက်ဖို့အတွက် မလုပ်ဘဲ စစ်တပ်၊ ရဲနဲ့ပေါင်းပြီး ဖမ်းဆီး ငွေတောင်းတာတွေကြောင့် အသတ်ခံရတာ။ တချို့အုပ်ချုပ်ရေးမှူးတွေဆို တပ်က သတင်းပေးအဖြစ် မွေးထားတာ။”
ရွေးကောက်ပွဲလုံခြုံရေးဆိုင်ရာ အစည်းအဝေးမှာ ရပ်ကျေးအုပ်ချုပ်ရေးမှူးများသာမက ထွေအုပ်က အရာရှိတွေနဲ့ ဝန်ထမ်းတွေကို ငွေကြေးတောင်းတာတွေ မလုပ်ဖို့လည်း သတိပေးသွားတယ်လို့ သတင်းအရင်းအမြစ်တွေဆီက သိရပါတယ်။
စစ်တပ်အာဏာသိမ်းပြီးနောက် လုပ်ကြံသတ်ဖြတ်ခံရတဲ့ အုပ်ချုပ်ရေးမှူးတွေ ရှိသလို မလုပ်ချင်လို့ နုတ်ထွက်သွားတဲ့ ရပ်ကွက်၊ ကျေးရွာအုပ်ချုပ်ရေးမှူးတွေလည်း ရှိပါတယ်။
