ရန်ကုန်က မြို့နယ်တွေမှာ အခုဖေဖော်ဝါရီလထဲ ကလေးငယ်တွေပျောက်ဆုံးတာ များလာသလို သန်လျင်မြို့မှာတော့ ၃ ရက်ကြာပျောက်ဆုံးနေတဲ့ ကလေးတယောက်ကို ရေကန်ထဲ သေဆုံးလျက် ဆယ်ယူနိုင်ခဲ့တယ်လို့ လူမှုကူညီရေးအသင်းတွေက ပြောပါတယ်။

သန်လျင်မြို့နယ် ပျဉ်ထောင်ကျောင်းရွာမှာ ဖေဖော်ဝါရီ ၁၂ ရက်နေ့ကတည်းက ပျောက်ဆုံးသွားတဲ့ အသက် ၃ နှစ်အရွယ် မိန်းကလေးကို ဖေဖော်ဝါရီ ၁၄ ရက်၊ နေ့လယ်ပိုင်းမှာ အိမ်အနားက ရေကန်ထဲမှာ ရုပ်အလောင်းပြန်တွေ့ခဲ့တာ ဖြစ်ပါတယ်။

ပျောက်ဆုံးကလေးရဲ့ နေအိမ်အနီးမှာ ရေကန် ၂ ကန်ရှိနေပြီး မိသားစုဝင်တယောက်ရဲ့အနောက်ကို ကလေးတယောက်တည်း လွှတ်လိုက်ရာကနေ အခုလို ဖြစ်ပွားခဲ့တာဖြစ်ပါတယ်။

မြို့ခံတယောက်က “ကလေးပျောက်ကြော်ငြာထားတာက ဖေ့စ်ဘွတ်ခ်မှာရော၊ စာတွေထုတ်ပြီး လိုက်ကပ်တာရော၊ အသင်းတွေကို အသိပေးတာရော အကုန်လုပ်ထားပါတယ်။ ကလေးက ၃ နှစ် သမီးပါ။ ရေကန်နဲ့အိမ်က သိပ်မဝေးဘူး။ ကျန်တာတော့ ရဲကစစ်နေပါတယ်” လို့ ပြောပါတယ်။

ရှာဖွေဆယ်ယူရေးကို လောကအလင်းအဖွဲ့က လုပ်ဆောင်ခဲ့ပြီး သက်ဆိုင်ရာအဖွဲ့ရဲ့ ခွင့်ပြုချက်နဲ့ သန်လျင်ဆေးရုံ‌၊ ရင်ခွဲဌာနကို ပို့ဆောင်ပေးထားတယ်လို့ သိရပါတယ်။

ဖေဖော်ဝါရီလရဲ့ ၂ ပတ်အတွင်း လူပျောက်ရှာဖွေ ဖေ့စ်ဘွတ်ခ်ဂရုပ်တွေနဲ့ လူကုန်ကူးတိုက်ဖျက်ရေး ဂရုပ်တွေမှာ ကလေးပျောက်ကြော်ငြာထားတဲ့ မှတ်တမ်းအရ ကလေးပျောက်သူ ၅ ယောက်ထက်မနည်း ရှိနေတာပါ။

ဖေဖော်ဝါရီ ၁၃ ရက်နေ့က သင်္ဃန်းကျွန်းမြို့နယ်၊ ဘုရားဈေးအနားက အသက် ၁၁ နှစ်အရွယ် ယောကျ်ားလေးတယောက် ဗလီသွားရာကနေ ပျောက်ဆုံးသွားခဲ့သလို ဖေ‌ဖော်ဝါရီ ၆ ရက်နေ့မှာတော့ မြောက်ဥက္ကလာပမြို့နယ်မှာ ကိုယ်ပိုင်အထက်တန်းကျောင်းတက်နေသူ အသက် ၁၀ နှစ်အရွယ် ကလေးတယောက် ကျောင်းအနားမှာ ပျောက်ဆုံးခဲ့ပါတယ်။

ဖြစ်စဉ် ၂ ခုစလုံးက ကလေးတွေကို တွေ့ရှိ‌သူတွေက မိဘတွေဆီ ပြန်လည်အပ်နှံနိုင်ခဲ့ကြပါတယ်။

ဖေဖော်ဝါရီ ၅ ရက်နေ့က ဒဂုံဆိပ်ကမ်းမြို့နယ်၊ ယုဇနဥယျာဉ်အိမ်ရာကနေ တာမွေမြို့နယ်ကို သွားခဲ့တဲ့ အသက် ၁၂ နှစ်အရွယ် ယောကျ်ားလေးတယောက်နဲ့ အသက် ၂၀ ဝန်းကျင် အမျိုးသမီး ၂ ယောက်တို့ ပျောက်ဆုံးသွားခဲ့ပြီး မိသားစုဝင်တွေနဲ့ အဆက်အသွယ် ရ၊ မရတကိုတော့ စုံစမ်းနေဆဲဖြစ်ပါတယ်။

Photo - လောကအလင်း၊ သန်လျင်။