သာပေါင်းမြို့နယ်၊ သာပေါင်းလေးကျေးရွာ၊ အနန်းကုန်းကျေးရွာအနီး သဲဖြူရှေ့ရွာနဲ့ ၃ ဖာလုံလောက်အကွာ ကင်ပွန်းချဉ်တောင်မှာ ဖေဖော်ဝါရီ ၈ ရက် မနက်အစောပိုင်း အထိ စစ်ကောင်စီတပ်နဲ့ AA တို့ တိုက်ပွဲပြင်းပြင်းထန်ထန်ဖြစ်နေပြီး စစ်ကောင်စီတပ်က စစ်ကား ၄ စီးနဲ့ အင်အားဖြည့်နေတယ်လို့ ဒေသခံတွေက ဆိုပါတယ်။
ဒေသခံတယောက်က “တိုက်ပွဲတော်တော်ပြင်းထန်နေတာ။ အခုမနက် ပစ်ခတ်သံတွေ စိပ်စိပ် ပြန်ကြားရတာ။ စကစတပ်က စစ်သား ၄၀ လောက်ပါတဲ့ကားတွေ တိုက်ပွဲဖြစ်နေတဲ့ဘက် ခပ်မြန်မြန်တက်သွားတာတွေ့ရတယ်” လို့ ပြောပါတယ်။
စစ်ကောင်စီတပ်နဲ့ နီးစပ်သူတယောက်က “သာပေါင်းမြို့နယ်က စစ်ကောင်စီတပ်ရဲ့ ကျားခေါင်းစခန်း သိမ်းခံရပြီးနောက် တိုက်ပွဲကနည်းနည်းငြိမ်သွားတာ။ အခုမနက် ပြန်ဖြစ်တာလို့သိရတယ်။ စစ်ကောင်စီဘက်က ခံစစ်ကို အားထားပြင်ဆင်နေတာတွေ့ရတယ်။ AA က စစ်ကောင်စီတပ်ကို ပြောက်ကျားစနစ်နဲ့ ဟိုဘက်လှည့်တိုက်၊ ဒီဘက်လှည့်တိုက်လုပ်ပြီး တိုက်ကွက်ဖော်ယူနေတာ” လို့ ပြောပါတယ်။
တိုက်ပွဲဖြစ်နေတဲ့ သာပေါင်းမြို့နယ်မှာ စစ်ကောင်စီတပ်က ရွာတွေထပ်အသိမ်းမခံရစေဖို့ဆိုပြီး လတ်တလောတိုက်ပွဲဖြစ်နေတဲ့ဒေသအနီးက လက်ခုပ်၊ ခေနန်၊ သရက်ကုန်းနဲ့ မရမ်းချိုကျေးရွာဘက်မှာ စစ်ကြောင်းထိုး နယ်မြေရှင်းလင်းနေတယ်လို့သိရပါတယ်။
Photo – NN
