သမ္မတ ဒေါ်နယ်ထရမ့်ပ်က  အမေရိကန်ရဲ့  နိုင်ငံခြားအကူအညီ အားလုံးနီးပါး ရပ်ဆိုင်းလိုက်တဲ့ ဆုံးဖြတ်ချက်ကြောင့် ကမ္ဘာတဝန်းမှာ ဘယ်လိုသက်ရောက်မှုတွေ ရှိလာခဲ့သလဲ။ ဘာတွေ ဆက်ဖြစ်လာနိုင်သလဲ၊ ခြွင်းချက်အနေနဲ့ ဘယ်လို အကူအညီတွေ ဆက်ပေးသွားဖို့ရှိသလဲ ဆိုတာတွေကို လေ့လာကြည့်ရအောင်ပါ။

အပိုင်း ၁ - ကမ္ဘာလုံးဆိုင်ရာ သက်ရောက်မှု

အမေရိကန်နိုင်ငံဟာ ကမ္ဘာပေါ်မှာ နိုင်ငံခြားအကူအညီ အများဆုံးပေးတဲ့နိုင်ငံဖြစ်ပြီး ကမ္ဘာ့လူသားချင်းစာနာထောက်ထားမှု အကူအညီအားလုံးရဲ့ ၄၀ ရာခိုင်နှုန်းကို တာဝန်ယူထားပါတယ်။

ဆယ်စုနှစ်များစွာအတွင်းမှာ အမေရိကန်ရဲ့ မူဝါဒက နိုင်ငံခြားကိုပေးတဲ့ အကူအညီဆိုတာ ဒေသတွေနဲ့ စီးပွားရေးတွေကို တည်ငြိမ်စေပြီး မိတ်ဖက်တွေနဲ့ ဆက်ဆံရေး တိုးတက်စေခြင်းအားဖြင့် အမျိုးသားလုံခြုံရေးကို ပိုအားကောင်းစေတယ်၊ ဒါကြောင့် အကူအညီပေးတဲ့ငွေက ပြန်လည်အကျိုးပြုတယ်ဆိုတဲ့ သဘောထား ဖြစ်ခဲ့ပါတယ်။ ဒါပေမဲ့ ထရမ့်ပ်အစိုးရ တာဝန်ရှိသူတွေနဲ့ ရီပတ်ဘလီကန် လွှတ်တော်အမတ်တွေ အများစုကတော့ နိုင်ငံခြားအကူအညီအတွက် သုံးတဲ့ငွေတွေကို ပြည်တွင်းမှာပဲ သုံးသင့်တယ်၊ ဒါမှမဟုတ် စုဆောင်းထားသင့်တယ်လို့ ယုံကြည်နေကြပါတယ်။

အခုအခါမှာ ထရမ့်ပ်အစိုးရက ပြည်ပအကူအညီတွေ အားလုံးနီးပါး ကနဦး ရက် ၉၀ ရပ်ဆိုင်းမှုကြောင့် စီမံချက်အများအပြား လုပ်ငန်းတွေ ပိတ်သိမ်းတာ၊ ဝန်ထမ်းတွေ ထုတ်ပယ်တာ၊ အသက်ကယ်ဝန်ဆောင်မှုတွေ ရပ်ဆိုင်းတာ စတဲ့အခြေအနေတွေနဲ့ ကြုံတွေ့နေရပါတယ်။  ကမ္ဘာတလွှားက ထိခိုက်လွယ်တဲ့  အကူအညီ လိုအပ်နေတဲ့ ပြည်သူတွေအတွက်  အစားအသောက်၊ ဆေးဝါးကုသမှု၊ လူမှုရေးပံ့ပိုးမှုတွေ ပေးနေတဲ့ အဖွဲ့အစည်းတွေဟာ ဆက်လက်လည်ပတ်ဖို့ အခက်ကြုံနေရပြီ ဖြစ်ပါတယ်။

Oxfam America ရဲ့ ဥက္ကဋ္ဌ Abby Maxman က အကူအညီပေးရေး အဖွဲ့အစည်းတွေ ဆက်လက် ရပ်တည်ဖို့တောင် ရုန်းကန်နေရပြီလို့ ပြောထားပါတယ်။ တချိန်တည်းမှာပဲ ထရမ့်ပ်အစိုးရက အမေရိကန် အကူညီတွေကို အဓိက စီမံနေတဲ့ USAID အဖွဲ့ရဲ့ အကြီးတန်းအရာရှိ ၅၀ ကျော်ကို အလုပ်ရပ်နားထားလိုက်တာကြောင့် အေဂျင်စီရဲ့ အနာဂတ်နဲ့ပတ်သက်ပြီးပါ စိုးရိမ်စရာ ကောင်းလာခဲ့ပါတယ်။

ကုလ ပြောခွင့်ရ စတီဖန် ဒူဂျာရစ်

“နိုင်ငံခြားအကူအညီတွေ ရပ်ဆိုင်းဖို့ အမေရိကန်ရဲ့ ဆုံးဖြတ်ချက်နဲ့ပတ်သက်ပြီး ကျနော့်မှာ ထုတ်ပြန်စရာ ရှိပါတယ်။ ကုလသမဂ္ဂအတွင်းရေးမှူးချုပ်က အမေရိကန်ရဲ့ နိုင်ငံခြားအကူအညီ ရပ်ဆိုင်းမှုကို စိုးရိမ်မိတယ်လို့ မှတ်ချက်ပေးပါတယ်။ ဒီအထောက်အပံ့အပေါ် မှီခိုနေရတဲ့ ကမ္ဘာတဝန်းက အထိခိုက်လွယ်ဆုံး လူ့အသိုင်းအဝိုင်းတွေအတွက် အရေးပါတဲ့ ဖွံ့ဖြိုးရေးနဲ့ လူသားချင်းစာနာမှုလုပ်ငန်းတွေ ဆက်လက်လုပ်ဆောင်နိုင်ဖို့ နောက်ထပ် ခြွင်းချက်တွေ ထည့်သွင်းစဉ်းစားပေးဖို့ တိုက်တွန်းပါတယ်။ အတွင်းရေးမှူးချုပ်အနေနဲ့ ဖွံ့ဖြိုးဆဲကမ္ဘာရဲ့ အခက်ခဲဆုံး စိန်ခေါ်မှုတွေကို ရင်ဆိုင်နေရတဲ့ ပြည်သူတွေအတွက် အလွန်လိုအပ်နေတဲ့ ဖွံ့ဖြိုးရေး အထောက်အပံ့တွေ ပေးအပ်နိုင်ဖို့ အမေရိကန်အစိုးရသစ်နဲ့ ပူးပေါင်းဆောင်ရွက်သွားဖို့ မျှော်လင့်နေပါတယ်။ အမေရိကန်ဟာ အများဆုံး အကူအညီပေးတဲ့ နိုင်ငံတွေထဲက တနိုင်ငံဖြစ်ပြီး ရှေ့ဆက်ရမယ့် မဟာဗျူဟာလမ်းကြောင်းကို အတူတကွ ပုံဖော်နိုင်ဖို့ အပြုသဘောဆောင်တဲ့ ပူးပေါင်းဆောင်ရွက်မှုရှိဖို့ အရေးကြီးပါတယ်။”

အပိုင်း ၂ - ယူကရိန်းအပေါ် သက်ရောက်မှု

ဒီအချိန်မှာ အရေးပါဆုံး မေးခွန်းတခုကတော့ - ယူကရိန်းအပေါ် ဘယ်လိုသက်ရောက်မလဲ ဆိုတာပါ။ ယူကရိန်းသမ္မတ ဗိုလိုဒီမာဇလန်းစကီးရဲ့ အဆိုအရ အမေရိကန်ရဲ့ စစ်ဘက်ဆိုင်ရာ အကူအညီ အများစုကတော့ ထိခိုက်မှု မရှိသေးပါဘူး။ လက်နက်တွေနဲ့ စစ်ရေးကန်ထရိုက်တွေကို ငွေကြေးထောက်ပံ့တဲ့ ပင်တဂွန်စစ်ဌာနချုပ်ရဲ့ အကူအညီတွေဟာ နိုင်ငံခြားရေးဝန်ကြီးဌာနရဲ့ အကူအညီရပ်ဆိုင်းမှုထဲ မပါဝင်ပါဘူး။

ဒါပေမဲ့ ယူကရိန်းအစိုးရ လည်ပတ်နိုင်ဖို့ အရေးပါတဲ့ အမေရိကန်ရဲ့ အရပ်ဘက် အကူအညီတွေကတော့ အန္တရာယ်နဲ့ ရင်ဆိုင်နေရပါတယ်။ ဒီထဲမှာ ယူကရိန်းအစိုးရဝန်ထမ်းတွေရဲ့ လစာတွေနဲ့ စစ်မှုထမ်းဟောင်းတွေအတွက် ပံ့ပိုးမှုအစီအစဉ်တွေ ပါဝင်ပါတယ်။ စစ်မှုထမ်းဟောင်းတွေရဲ့ စိတ်ပိုင်းဆိုင်ရာနဲ့ လူမှုရေး စိန်ခေါ်မှုတွေကို ကူညီပေးနေတဲ့ Veteran Hub လို အဖွဲ့အစည်းတွေဟာ အလုပ်ရပ်ဆိုင်းဖို့ အမိန့်တွေ ရရှိပြီး ဖြစ်ပါတယ်။

ယူကရိန်းသမ္မတ ဗိုလိုဒီမာ ဇလန်းစကီးက “ဒီနေ့မှာ  လက်ရှိ ရပ်ဆိုင်းထားတဲ့ အမေရိကန် ထောက်ပံ့မှု အစီအစဉ်တွေနဲ့ ပတ်သက်ပြီး အစီရင်ခံစာ တင်ပြဖို့  ကျနော့် အစိုးရတာဝန်ရှိသူတွေကို ညွှန်ကြားထားပါတယ်။ ဒါတွေက လူသားချင်းစာနာထောက်ထားမှုဆိုင်ရာ အစီအစဉ်တွေပါ။ အိုလက်ဆီ ကူလေဘာနဲ့ တခြားတာဝန်ရှိသူတွေက ဘယ်အစီအစဉ်တွေက အခုလက်ရှိ လိုအပ်နေသလဲ ဆိုတာကို ဖော်ထုတ်နေပါတယ်။ အများစုက ယူကရိန်းအစိုးရကနေတဆင့် မဟုတ်ဘဲ ရပ်ရွာအသိုင်းအဝိုင်းတွေနဲ့ အဖွဲ့အစည်းအမျိုးမျိုးကို တိုက်ရိုက်ထောက်ပံ့တာ ဖြစ်ပါတယ်။ စီမံကိန်းတွေ အများကြီးရှိပါတယ်။ ဘယ်စီမံကိန်းတွေက အရေးတကြီး လိုအပ်ပြီး ချက်ချင်းဖြေရှင်းဖို့ လိုအပ်သလဲဆိုတာ ဆုံးဖြတ်သွားမှာပါ။ တချို့ရန်ပုံငွေတွေကို ကျနော်တို့ နိုင်ငံ့ဘဏ္ဍာကနေ ထောက်ပံ့နိုင်ပြီး ကျန်တာတွေကိုတော့ ဥရောပနဲ့ အမေရိကန်တို့နဲ့ ဆွေးနွေးသွားမှာ ဖြစ်ပါတယ်” လို့ ပြောပါတယ်။

အပိုင်း ၃ - အာဖရိက အကျပ်အတည်း

အမေရိကန်ရဲ့ အထောက်အပံ့တွေက အနောက်အာဖရိကကို ရက်စက်ကြမ်းကြုတ်တဲ့ ကြောက်မက်ဖွယ် စစ်ပွဲတွေကနေ ပြန်လည်နာလန်ထူနိုင်အောင် ကူညီပေးခဲ့ပါတယ်။ USAID ဟာ ကျောင်းနေ့လယ်စာ၊ မိန်းကလေး ပညာရေး၊ ကျန်းမာရေးစနစ်တွေနဲ့ တပိုင်တနိုင် လယ်သမားတွေကို ကူညီပေးခဲ့ပါတယ်။

ဇင်ဘာဘွေနိုင်ငံဟာ HIV/AIDS တိုက်ဖျက်ရေးမှာ သိသာထင်ရှားတဲ့ တိုးတက်မှုတွေ ရရှိခဲ့ပါတယ်။ အဓိကကတော့ ကမ္ဘာတဝန်းမှာ လူပေါင်း သန်း ၂၀ ကျော်ကို ကယ်တင်နိုင်ခဲ့တယ်လို့ အသိအမှတ်ပြုခံရတဲ့  PEPFAR လို့ ခေါ်တဲ့ ရီပတ်ဘလီကန်သမ္မတ ဂျော့ဒဗလျူဘုရှ် စတင်ခဲ့တဲ့ HIV/AIDS အရေးပေါ်အစီအစဉ်ကြောင့် ဖြစ်ပါတယ်။ အခုတော့ ရန်ပုံငွေရပ်ဆိုင်းမယ့် အန္တရာယ်နဲ့ ရင်ဆိုင်နေရပြီ ဖြစ်ပါတယ်။

အမေရိကန် နိုင်ငံခြားရေးဝန်ကြီး မာကို ရူဘီယိုရဲ့ ခြွင်းချက်ထဲမှာ မျိုးဆက်ပွား ကျန်းမာရေး၊ ကျား၊ မ ရေးရာ တန်းတူညီမျှမှု၊ မိသားစုစီမံကိန်းတွေနဲ့ ပတ်သက်တဲ့ အစီအစဉ်တွေ မပါဝင်ပါဘူး။ ဒါဟာ အမျိုးသမီးတွေနဲ့ ကလေးတွေအတွက် ကျန်းမာရေးစောင့်ရှောက်မှု ဝန်ဆောင်မှုတွေရဲ့ ကံကြမ္မာအပေါ်  စိုးရိမ်ပူပန်မှုတွေ ပိုမိုများပြားလာစေပါတယ်။

အပိုင်း ၄ - ခြွင်းချက်များ

အမေရိကန် နိုင်ငံခြားရေးဝန်ကြီး မာကို ရူဘီယိုက “ကျနော်တို့ရဲ့ သမ္မတနိုင်ငံမှာ မဲဆန္ဒရှင်တွေကသာ ပြည်တွင်း ပြည်ပမှာ နိုင်ငံသွားမယ့်လားရာကို ဆုံးဖြတ်တာ ဖြစ်ပါတယ်။ သူတို့က နိုင်ငံခြားရေးမူဝါဒနဲ့ ပတ်သက်လာရင် ရှင်းလင်းတဲ့ မစ်ရှင်တခုနဲ့အတူ ဒေါ်နယ် ဂျေ ထရမ့်ပ်ကို သမ္မတအဖြစ် ရွေးချယ်ခဲ့ကြပါတယ်။ အဲဒီမစ်ရှင်ကတော့ ကျနော်တို့ရဲ့ နိုင်ငံခြားရေးမူဝါဒကို တခုတည်းသော အချက်အပေါ် အခြေခံစေဖို့ဖြစ်ပြီး အဲဒါက အမျိုးသားအကျိုးစီးပွားတွေကို ရှေ့တန်းတင်ဖို့ ဖြစ်ပါတယ်။ ဒါဟာ ကျနော်တို့ ပိုအင်အားကြီးမား၊ ပိုလုံခြုံ၊ ပိုကြွယ်ဝစေမယ့် ဘယ်လိုကိစ္စမျိုးကိုမဆို ဆိုလိုတာဖြစ်တယ်လို့ သမ္မတရဲ့ မဲဆွယ်စည်းရုံးရေးကာလတည်းက ရှင်းရှင်းလင်းလင်း ဖွင့်ဆိုထားပြီး ဖြစ်ပါတယ်။ အဲဒါဟာ ကျနော်တို့ရဲ့မစ်ရှင် ဖြစ်လာမှာပါ” လို့ ပြောပါတယ်။

နိုင်ငံခြားရေးဝန်ကြီး မာကို ရူဘီယိုဟာ အသက်ကယ် လူသားချင်းစာနာမှု အကူအညီအတွက် ခြွင်းချက် ကြေညာချက်ကိုတော့ ထပ်မံထုတ်ပြန်ထားပါတယ်။ အဲဒီခြွင်းချက်က အခြေခံ အသက်ကယ်ဆေးဝါး၊ ဆေးဝါးဝန်ဆောင်မှု၊ အစားအသောက်၊ နေရာထိုင်ခင်းနဲ့ စားဝတ်နေရေး အကူအညီတွေ၊ စီမံခန့်ခွဲရေးဆိုင်ရာ သင့်တင့်တဲ့ ကုန်ကျစရိတ်တွေအတွက် လုပ်ငန်းတွေ ဆက်လက်လုပ်ဆောင်ခွင့် ပြုထားပါတယ်။ ဒီဝန်ဆောင်မှုတွေမှာ ပါဝင်တဲ့ အဖွဲ့အစည်းတွေအနေနဲ့ သူတို့ရပ်နားထားခဲ့တာရှိရင် ချက်ချင်း ပြန်လည်စတင်ဖို့၊ ဆက်လက်လုပ်ဆောင်ဖို့ ညွှန်ကြားထားပါတယ်။

ဒါပေမဲ့ ကိုယ်ဝန်ဖျက်ချမှု၊ မိသားစုစီမံကိန်း ကွန်ဖရင့်တွေ၊ ဂျန်ဒါ၊ မတူကွဲပြားမှု၊ သာတူညီမျှမှုနဲ့ အားလုံးပါဝင်မှု (DEI) ဆိုင်ရာလုပ်ငန်းတွေ၊ လိင်ပြောင်းခွဲစိတ်မှုတွေ ပါဝင်တဲ့ အစီအစဉ်တွေ အတွက်တော့ ခြွင်းချက်မပေးထားပါဘူး။ ဒါ့အပြင် ရွှေ့ပြောင်းအခြေချမှုနဲ့ ဒုက္ခသည်အကူအညီ (MRA) အောက်က ရန်ပုံငွေတွေကို အသက်ကယ် လူသားချင်းစာနာမှု အကူအညီအတွက်နဲ့ တခြား နိုင်ငံသားတွေကို သူတို့နိုင်ငံ ဒါမှမဟုတ် သတ်မှတ်ထားတဲ့ လုံခြုံတဲ့ တတိယနိုင်ငံတွေဆီ ပြန်ပို့ဖို့အတွက်သာ သုံးစွဲခွင့်ပြုထားပါတယ်။

အခုခြွင်းချက်က အဖွဲ့အစည်းအချို့အတွက် သက်သာရာရစေပေမဲ့ ခြွင်းချက်ပေးတဲ့ အတိုင်းအတာကတော့ ကန့်သတ်ချက်တွေ ရှိနေဆဲပါ။ နိုင်ငံခြားရေးဝန်ကြီးဌာနက နောက်ထပ် ခြွင်းချက်တွေ တောင်းခံနိုင်တယ်လို့ ညွှန်ပြထားပါတယ်။ ဒါပေမဲ့ အကူအညီပေးရေး အဖွဲ့တွေကတော့ ရန်ပုံငွေဆုံးဖြတ်ချက်တွေနဲ့ ပတ်သက်တဲ့ ဗျူရိုကရေစီ နှောင့်နှေးမှုတွေနဲ့ မသေချာ မရေရာမှုတွေအပေါ်  စိုးရိမ်နေကြပါတယ်။

အပိုင်း ၅ - အရှေ့တောင်အာရှနဲ့ မြန်မာဒုက္ခသည်

အကူအညီရပ်ဆိုင်းမှုရဲ့ သက်ရောက်မှုကို အရှေ့တောင်အာရှမှာလည်း ခံစားနေကြရပါတယ်။ ထိုင်းနိုင်ငံမှာ မြန်မာနိုင်ငံကနေ နေရပ်စွန့်ခွာ ထွက်ပြေးလာသူ တသိန်းကျော်ကို လက်ခံထားတဲ့ ဒုက္ခသည်စခန်း ၉ ခုဟာ အခြေခံဝန်ဆောင်မှုတွေ ထိန်းသိမ်းထားဖို့ ရုန်းကန်နေကြရပါတယ်။ စခန်းတခုမှာရှိတဲ့ ဒုက္ခသည်ဆေးရုံဟာ ရန်ပုံငွေမလုံလောက်မှုကြောင့် ဝန်ထမ်းလျှော့ချလိုက်ရပြီး ဆေးကုသပေးနိုင်တဲ့ ဆရာဝန်နဲ့ သူနာပြုတွေ မလုံလောက်တဲ့အတွက် လူနာတွေကို ပြန်ခိုင်းရတဲ့ အခြေအနေထိ ဖြစ်ခဲ့ရပါတယ်။

ထိုင်းကျန်းမာရေးဝန်ကြီးကတော့ ထိုင်းအစိုးရအနေနဲ့ ဒုက္ခသည်တွေအတွက် ကျန်းမာရေးစောင့်ရှောက်မှု ဝန်ဆောင်မှုတွေ ဆက်လက်ပံ့ပိုးနိုင်ဖို့ နည်းလမ်းတွေ ရှာဖွေသွားမယ်လို့ ကတိပြုထားပါတယ်။ ဒါပေမဲ့ နိုင်ငံတကာအကူအညီ မရှိရင်တော့ ဒီအစီအစဉ်တွေရဲ့ ရေရှည်တည်တံ့နိုင်မှုက မသေချာမရေရာ ဖြစ်နေပါတယ်။

အပိုင်း ၆ - ပထဝီနိုင်ငံရေး အကျိုးဆက်

အမေရိကန်ရဲ့ နိုင်ငံခြားအကူအညီ ရပ်ဆိုင်းမှုကြောင့် ကမ္ဘာတဝန်းမှာ အမေရိကန်ရဲ့ ဩဇာအာဏာ လွှမ်းမိုးမှု အားနည်းသွားစေနိုင်တယ်ဆိုတဲ့ စိုးရိမ်မှုတွေလည်း ရှိနေပါတယ်။ အထူးသဖြင့် အာဖရိကနဲ့ ပစိဖိတ်ဒေသမှာ အမေရိကန်ဟာ တရုတ်နိုင်ငံနဲ့ သံတမန်ရေးနဲ့ စီးပွားရေး လွှမ်းမိုးမှုအတွက် အားပြိုင်နေရတာ ဖြစ်ပါတယ်။ အမေရိကန် အကူအညီ ရပ်ဆိုင်းလိုက်ချိန်မှာ တရုတ်နိုင်ငံက နိုင်ငံရေးနဲ့ စီးပွားရေး လွှမ်းမိုးမှုအတွက် သူ့ရဲ့ ကိုယ်ပိုင်ဖွံ့ဖြိုးရေး ရန်ပုံငွေတွေနဲ့ နေရာယူလာနိုင်တယ်လို့  သတိပေးမှုတွေ ရှိနေပါတယ်။

နိုင်ငံခြားအကူအညီကို စွန့်လွှတ်လိုက်တာဟာ ထိခိုက်လွယ်တဲ့ အကူအညီ လိုအပ်နေတဲ့ လူ့အသိုင်းအဝိုင်းတွေကိုသာမက အမေရိကန်ရဲ့ ကမ္ဘာလုံးဆိုင်ရာ အဆင့်အတန်းကိုပါ ထိခိုက်လာနိုင်တယ်လို့ သုံးသပ်နေကြပါတယ်။

ထရမ့်ပ်အစိုးရက ဘယ်အကူအညီ အစီအစဉ်ကိုတော့ ပြန်အသက်သွင်းမလဲဆိုတာ  သုံးသပ်နေချိန်မှာ ကမ္ဘာတလွှားက လူသန်းပေါင်းများစွာဟာ မသေချာမရေရာတဲ့ အခြေအနေနဲ့ ရင်ဆိုင်နေရပါတယ်။  အရေးကြီးတဲ့ ကျန်းမာရေး၊ စားနပ်ရိက္ခာ အကူအညီနဲ့ လူသားချင်းစာနာမှု အစီအစဉ်တွေ မရေမရာ ဖြစ်လာတဲ့အတွက် အကျိုးဆက်တွေက တော်တော် ဆိုးဆိုးရွားရွား ဖြစ်လာနိုင်ပါတယ်။ ခြွင်းချက်အချို့ ပေးထားပေမဲ့ အသက်တွေ ပိုမဆုံးရှုံးရခင် အမေရိကန်က သူ့ရဲ့ ချဉ်းကပ်မှုကို ပြန်စဉ်းစားမလားဆိုတဲ့ မေးခွန်းတခုတော့ ကျန်နေဆဲဖြစ်ပါတယ်။ သေချာတာကတော့ ထရမ့်ပ် လက်ထက် အမေရိကန်ဟာ အရင်ကနဲ့ မတူတော့ချိန်မှာ ကမ္ဘာကြီးရော မြန်မာနိုင်ငံအနေနဲ့ပါ အမေရိကန် အကူအညီမပါဘဲ ဘယ်လို ရှေ့ဆက်ကြမလဲဆိုတာ ပြင်ဆင်ကြရဖို့ ရှိနေပါတယ်။

စိုင်းခေတ်နွေ