ရန်ကုန်တိုင်းအတွင်းက မြို့နယ်တွေမှာ ဇန်နဝါရီ ၁၈ ရက်ကနေ ၂၃ ရက်အတွင်း နေ့တိုင်း မီးလောင်မှုတွေ ဖြစ်ပေါ်နေတာကြောင့် မီးဘေးအန္တရာယ်သတိပြုဖို့ အရပ်ဘက်အသင်းတွေက သတိပေးထားပါတယ်။

မီးလောင်တဲ့ မြို့နယ်တွေထဲမှာ တောင်ဒဂုံ၊ လှိုင်သာယာ၊ စမ်းချောင်း၊ မရမ်းကုန်း၊ သင်္ဃန်းကျွန်း၊ မြောက်ဥက္ကလာ၊ ဗိုလ်တထောင် စတဲ့မြို့နယ်တွေ ပါဝင်ပြီး မီးလောင်မှုဖြစ်စဉ် ၉ ခုအတွင်း အပူလွန်ကဲ ဝါယာရှော့ဖြစ် မီးလောင်မှု ၅ ကြိမ်၊ ပေါ့ဆမီး ၄ ကြိမ် ပါဝင်နေပါတယ်။

မီးလောင်မှု ၉ ကြိမ်အတွင်း ‌နေအိမ် ၁၂ လုံး၊ တိုက်ခန်း ၃ ခန်း၊ ဆိုင်ခန်း ၁ ခန်းနဲ့ အဆောင် ၂ ခန်း ပျက်စီးထားသလို ချို့တဲ့မီးဘေးသင့်သူ ၄၁ ယောက် ရှိနေပါတယ်။

ကယ်ဆယ်ရေးအဖွဲ့ဝင်တယောက်က “အခုရက်ပိုင်း တောက်လျှောက်လောင်နေတယ်။ Level 1 လွှတ်တာတော့ တကြိမ်ပဲ တွေ့ရသေးပေမဲ့ လုံးဝပေါ့ဆလို့ မရပါဘူး။ ဆောင်းလေကလည်း ခြောက်နေတယ်။ ဒီအတိုင်းလောင်ရင် ငြှိမ်းဖို့က မလွယ်တဲ့အခြေအနေပါ။ ထူးခြားတာက အခုရက်ပိုင်း အပူလွန်ကဲ ရှော့ဖြစ်လောင်တာတွေပါပဲ။ ဟိုတခေါက်ကပြောသလို နောက်ဖေးပေါက်တွေ ရှင်းထား။ တံခါးတွေ ဖွင့်ရပိတ်ရလွယ်အောင် လုပ်ထား။ အိမ်သုံး ဆိုင်သုံးဆို ၃ ကီလို မီးသတ်ဆေးဘူးဖြစ်ဖြစ် ဆောင်ထားကြပါ။ နောက်ပြီး မီးသတ်ကို ဆက်ရလွယ်အောင် ဖုန်းနံပါတ်တွေ အမြဲထည့်ထားဖို့ လိုပါတယ်” လို့ ဆိုပါတယ်။

ဇန်နဝါရီ ၂၃ ရက် မနက် ၆ နာရီ‌လောက်မှာ ရန်ကုန်၊ ဒဂုံမြို့သစ်(တောင်ပိုင်း)မြို့နယ်၊ ၅၆ ရပ်ကွက်၊ စုပြည့်ရတနာလမ်းမှာ ရေခဲသေတ္တာကနေ အပူလွန်ကဲ မီးလောင်ခဲ့ပါတယ်။

မီးလောင်မှုကြောင့် ပေ ၂၀ ပတ်လည် ဈေးဆိုင် ၁ ခုနဲ့ တထပ်နေအိမ် ၁ လုံး ပျက်စီးသွားရပြီး မီးသတ်နဲ့ အရပ်ဘက်တို့ရဲ့ ငြှိမ်းသတ်မှု‌ကြောင့် မနက် ၆ နာရီခွဲမှာ မီးငြိမ်းသွားပါတယ်။

မွန်းလွဲ ၁ နာရီ ၄၆ မိနစ်မှာ‌တော့ လှိုင်သာယာမြို့နယ်၊ ဝက်မစွပ်ဝန်ထောက်လမ်းမှာ နေအိမ် ၁ လုံး မီးလောင်မှုအနည်းငယ်ရှိခဲ့ပြီး မွန်းလွဲ ၁ နာရီ ၅၂ မိနစ်မှာ ငြှိမ်းသတ်နိုင်ခဲ့ကြပါတယ်။

ဇန်နဝါရီ ၂၂ ရက်မှာတော့ ‌ည‌နေ ၃ နာရီခွဲလောက်က စမ်းချောင်းမြို့နယ်၊ ဒဂုံစင်တာ ၂ အပေါ်ထပ် ၁၀ လွှာက လူနေအခန်းမှာ ဝါယာရှော့ဖြစ် မီးလောင်သွားသလို ည ၈ နာရီ မိနစ် ၄၀ မှာတော့ လှိုင်သာယာ(အနောက်ပိုင်း)မြို့နယ်၊ ရွှေလင်ဗန်းစက်မှုဇုန်၊ အကွက်အမှတ် ၂၃၃ က အထည်ချုပ်စက်ရုံရဲ့ မီးစက်ဝန်းမှာ အပူလွန်ကဲ မီးလောင်ခဲ့ပါတယ်။

မီးလောင်မှု ၂ ခုစလုံးရဲ့နေရာကို မီးသတ်အဖွဲ့တွေ အချိန်မီရောက်ရှိသွားလို့ ၁၀ မိနစ်လောက် အကြာမှာပဲ ငြှိမ်းသတ်နိုင်ခဲ့ပြီး ပျက်စီးဆုံးရှုံးမှုတန်ဖိုး နည်းပါးသွားခဲ့တာ ဖြစ်ပါတယ်။

ဇန်နဝါရီ ၂၁ ရက် မနက်အစောပိုင်း ၂ နာရီခွဲလောက်မှာ မရမ်းကုန်မြို့နယ်၊ အမှတ် ၆ ရပ်ကွက်၊ ဇာတိမာန်လမ်းက တိုက်ခန်း ၁ ခုမှာ ဝါယာရှော့ဖြစ် မီးလောင်မှုဖြစ်ပွားခဲ့ပြီး မနက် ၂ နာရီ ၄၂ မိနစ်မှာ မီးငြိမ်းသွားပါတယ်။

ဇန်နဝါရီ ၂၀ ရက် မွန်းလွဲ ၂ နာရီ ၂၅ မိနစ်လောက်က သင်္ဃန်းကျွန်းမြို့နယ်၊ င(က)ရပ်ကွက်၊ ပန်းရိုက်လမ်းမှာ ခြင်ဆေး‌ခွေမီးကနေ နေအိမ် ၈ လုံး ပျက်စီးသွားပြီး မနက်ပိုင်း ၈ နာရီ ၄၅ မိနစ်လောက်က မြောက်ဥက္ကလာပမြို့နယ်၊ က ရပ်ကွက်၊ မေယု ၅ လမ်းမှာ မီးလောင်မှု ဖြစ်ပွားခဲ့လို့ နေအိမ် ၁ လုံး၊ အဆောင်ခန်း ၂ ခန်း ပျက်စီးသွားခဲ့ပါတယ်။

ဇန်နဝါရီ ၁၉ ရက် ည ၁၀ နာရီ မိနစ် ၂၀ လောက်မှာ ဗိုလ်တထောင်မြို့နယ်၊ ၁၀ ရပ်ကွက်၊ ၄၆ လမ်းက တိုက်ခန်းတခုမှာ မီးလောင်မှုဖြစ်ပွားခဲ့ပြီး ည ၁၀ နာရီခွဲမှာ မီးငြိမ်းသွားပါတယ်။

ဇန်နဝါရီ ၁၈ ရက် ည ၈ နာရီ ၄၅ မိနစ်လောက်ကလည်း မရမ်းကုန်းမြို့နယ်၊ ၃ ရပ်ကွက်၊ မင်းဓမ္မလမ်းမှာ ဆိုလာကွန်ထရိုလာကနေ အပူလွန်ကဲလို့ ၂ ထပ်တိုက်တလုံး မီးလောင်မှု ဖြစ်ပွားခဲ့ပြီး ည ၈ နာရီ ၅၅ မိနစ်မှာ မီးငြိမ်းသွားပါတယ်။

ဇန်နဝါရီ ၁၀ ရက်နဲ့ ၁၁ ရက်အတွင်းက မြန်မာမီးသတ်ဌာနချုပ်ရဲ့ မီးလောင်မှုအခြေအနေ ထုတ်ပြန်ချက်အရ မင်္ဂလာတောင်ညွန့်၊ အ‌ရှေ့ဒဂုံ၊ မရမ်းကုန်း၊ မြောက်ဥက္ကလာ၊ စမ်းချောင်း၊ တိုက်ကြီး၊ သင်္ဃန်းကျွန်း စတဲ့ မြို့နယ် ၇ ခုမှာ မီးလောင်ကျွမ်းမှုကြောင့် တိုက်ခန်း ၅ ခန်း၊ နေအိမ် ၃ လုံး ပျက်စီးသွားပြီး လူ ၁ ယောက်သေ၊ ၃ ယောက် ထိခိုက်ဒဏ်ရာရရှိခဲ့တာ တွေ့ရပါတယ်။