လီဗာပူးအသင်းကို ကမ္ဘာ့အကောင်းဆုံးအသင်းလို့ ချီးကျူးပြောဆိုဖို့ အချိန်စောလွန်းနေသေးကြောင်း နည်းပြ အာနဲစလော့က ပြောသွားပါတယ်။

ဘရန့်ဖို့ဒ်ကို နူညက်ဇ်ရဲ့ နောက်ကျဂိုးတွေနဲ့အတူ အနိုင်ရခဲ့အပြီးမှာ ဘရန့်ဖို့ဒ်နည်းပြ သောမက်စ်ဖရန့်ခ်က လီဗာပူးအသင်းက မန်စီးတီးနဲ့ အာဆင်နယ်တို့ထက် ပိုကောင်းပြီး ပရီးမီးယားလိဂ်မှာသာမက ကမ္ဘာမှာပါ အကောင်းဆုံးအသင်းဖြစ်တယ်လို့  ချီးကျူးခဲ့တာပါ။

ကမ္ဘာ့အကောင်းဆုံးအသင်းလို့ ပြောဖို့အတွက် အသင်းကောင်းတွေအများကြီးနဲ့ ရင်ဆိုင်ဖို့ လိုအပ်နေသေးတယ်လို့ ထင်မိကြောင်း၊ ပရီးမီးယားလိဂ်မှာ သက်သေပြနိုင်ပြီးသား နည်းပြတယောက်က ချီးကျူးတဲ့အပေါ်မှာ နှစ်သက်ဂုဏ်ယူမိကြောင်း နည်းပြစလော့က ပြောပါတယ်။

လီဗာပူးအသင်းဟာ ချန်ပီယံလိဂ်မှာလည်း ရာနှုန်းပြည့်နိုင်ပွဲနဲ့အတူ အဆင့်တစ်နေရာ ရပ်တည်နေပြီး ပရီးမီးယားလိဂ် အမှတ်ပေးဇယားကိုလည်း ဦးဆောင်ထားပါတယ်။