တနင်္သာရီတိုင်း၊ ပုလောမြို့၊ အမှတ် ၂ ရပ်ကွက်ရှိ စစ်ဘက်ဆိုင်ရာလုံခြုံရေးအဖွဲ့ (စရဖ) ရုံးကို ပြည်သူ့ကာကွယ်ရေးတပ်မတော်၊ မြိတ်ခရိုင် အမှတ် ၁ တပ်ရင်းက တိုက်ခိုက်ခဲ့တယ်လို့ ဒေသခံတွေဆီက သိရပါတယ်။
ဇန်နဝါရီ ၆ ရက် ည ၁၁ နာရီ ၁၀ မိနစ်လောက်မှာ ပုလော PDF တွေက စရဖရုံးကို RPG နဲ့ ပစ်ခတ်တိုက်ခိုက်ခဲ့ပြီး မီးရှို့ဖျက်ဆီးခဲ့တယ်လို့ မြိတ်ခရိုင် အမှတ် ၁ တပ်ရင်း သတင်းနဲ့ ပြန်ကြားရေး တာဝန်ခံက ပြောပါတယ်။
မြိတ်ခရိုင် အမှတ် ၁ တပ်ရင်း သတင်းနဲ့ ပြန်ကြားရေးတာဝန်ခံ ကိုအာနိုးက “ကျနော်တို့ဘက်က စတင်ပစ်ခတ်တဲ့အချိန်မှာ သူတို့ဘက်က သေနတ်နဲ့ ၆ ချက်ပစ်ပြီး ထွက်ပြေးသွားတယ်။ သူတို့ပြေးသွားတော့ ကျနော်တို့ဘက်က စရဖရုံးကို ဝင်ရောက်ရှင်းလင်းပြီး မီးရှို့ခဲ့တယ်” လို့ ပြောပါတယ်။
ပုလော PDF ဘက်က စရဖရုံးကို ဝင်ရောက်ရှာဖွေရာမှာ သေနတ်ကျည်ဘောက် ၂ ခု၊ အဆိုပါသေနတ်ရဲ့ ကျည် ၁၀၀ နဲ့ စာရွက်စာတမ်းတွေကို သိမ်းဆည်းရမိပြီး အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ တိုက်ပွဲဝင်ရဲဘော်တွေဆီက သိရပါတယ်။
ပြီးခဲ့တဲ့ ဇန်နဝါရီ ၅ ရက်က ပုလောမြို့နယ်၊ စက်တော်ရာရွာရှိ စစ်ကောင်စီရဲ့ စစ်ဆေးရေးဂိတ်က ရေလုပ်သား ၄ ယောက်ကို PDF လို့စွပ်စွဲပြီး ဖမ်းဆီးခဲ့တယ်လို့ ဒေသခံတွေဆီက သိရပါတယ်။
