NUG ဝန်ကြီး ဒေါက်တာဆာဆာနဲ့ အမေရိကန်ပြည်ထောင်စု၊ တောင်ပိုင်းကယ်လီဖိုးနီးယား မိသားစုတွေ တွေ့ဆုံပွဲကနေ ရန်ပုံငွေ စုစုပေါင်း အမေရိကန်ဒေါ်လာ ၃၀,၀၀၀ ကျော်ရရှိခဲ့ပြီး စစ်ဘေးသင့်ပြည်သူတွေအတွက် ကူညီပံ့ပိုးသွားမယ်လို့ သိရပါတယ်။
အမျိုးသားညီညွတ်ရေးအစိုးရ (NUG) နိုင်ငံတကာ ပူးပေါင်းဆောင်ရွက်ရေးဝန်ကြီးဌာန ဝန်ကြီး ဒေါက်တာဆာဆာနဲ့ တောင်ပိုင်းကယ်လီဖိုးနီးယား မိသားစုများတွေ့ဆုံပွဲကို ဒေသအချိန် နိုဝင်ဘာ ၁၆ ရက် နေ့လယ် ၂ နာရီမှ ညနေ ၅ နာရီအထိ လော့စ်အိန်ဂျယ်လိစ်ကောင်တီ ဘော်ဒွင်ပတ်ခ်မြို့မှာ ကျင်းပခဲ့တာပါ။
ဒေါက်တာဆာဆာက ပြည်တွင်း ပြည်ပ အင်အားစုတွေ စည်းလုံးညီညွတ်ရေးကို တောင်းဆိုခဲ့ပြီး၊ စစ်အုပ်စုအပေါ် ဘဏ္ဍာရေး၊ တရားဝင်မှုနဲ့ စစ်လက်နက်အကူပစ္စည်းတွေ ဖြတ်တောက်ရေးအတွက် ဆောင်ရွက်နေမှုတွေကို ရှင်းလင်းပြောကြားခဲ့ပါတယ်။
‘ခွန်အားဖြည့်မိငယ်’ နဲ့ ‘သွေးသစ္စာ’ သီချင်း ၂ ပုဒ်ကိုလည်း ဂစ်တာတီးခတ် သီဆို ဖျော်ဖြေခဲ့ပြီး၊ ဒေါက်တာဆာဆာ တီးခတ်ခဲ့တဲ့ ဂစ်တာကို စစ်ဘေးသင့်ပြည်သူတွေအတွက် ရန်ပုံငွေလေလံပစ်ရာမှာ လော့စ်အိန်ဂျယ်လိစ်မြို့ခံ ဆရာဝန်တယောက်က ဒေါ်လာ ၅၀၀၀ နဲ့ လေလံအောင် အလှူငွေထည့်ဝင်ခဲ့ပါတယ်။
