စစ်ကိုင်းတိုင်း၊ ကျွန်းလှမြို့နယ်နဲ့ ဘုတလင်မြို့နယ်တို့မှာ စစ်ကောင်စီနဲ့ ပျူစောထီးတွေက ကျေးရွာတွေထဲဝင်ရောက်ပြီး ဒေသခံ ၃ ယောက်ကို သတ်ဖြတ်ခဲ့တဲ့အပြင် အိမ်တွေကိုလည်း မီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

စစ်ကိုင်းတိုင်း၊ ဘုတလင်မြို့နယ်က သဖန်းကျေးရွာကို နိုဝင်ဘာ ၇ ရက်နေ့ ညနေ ၃ နာရီဝန်းကျင်မှာ စစ်ကောင်စီတပ်ဖွဲ့ဝင်တွေရောက်လာပြီး ဒေသခံ ၁ ယောက်ကို ဖမ်းဆီးသတ်ဖြတ်ခဲ့တဲ့အပြင် မီးရှို့ဖျက်ဆီးခဲ့တာကြောင့် လူနေအိမ် ၄၀ နီးပါး မီးလောင်ပျက်စီခဲ့ပါတယ်။

ဘုတလင်မြို့နယ် ပြည်သူ့အုပ်ချုပ်ရေးအဖွဲ့ဝင်တယောက်က “သူတို့ ရွာသားတွေကို ပြန်စစ်ကြည့်ကြတော့ လူတဦးပျောက်နေတာနဲ့လိုက်ရှာကြတာ၊ ၈ ရက်နေ့မနက်ပိုင်းကျမှ ရွာအနောက်ဘက် ရေကျော်နားမှာ အလောင်းတွေ့တာ။ နောက်ထပ်ပျောက်နေတဲ့သူတွေရှိ မရှိကတော့ စုံစမ်းနေဆဲပါ” လို့ ပြောပါတယ်။

စစ်ကောင်စီတပ်သားတွေရဲ့ ဖမ်းဆီးသတ်ဖြတ်ခံရသူဟာ သဖန်းကျေးရွာက အသက် ၇၀ အရွယ် ဦးစန်းလွင် ဆိုသူဖြစ်ပြီး သူ့ရဲ့နေအိမ်ဟာလည်း စစ်ကောင်စီတပ်ဖွဲ့ဝင်တွေရဲ့ မီးရှို့ဖျက်ဆီးတာ ခံခဲ့ရတယ်လို့ သူက ဆက်ပြောပါတယ်။

စစ်​ကောင်စီစစ်ကြောင်းဟာ သဖန်းကျေးရွာကို နိုဝင်ဘာ ၅ ရက်နေ့ မနက်ပိုင်းတည်းက ဝင်ရောက်တပ်စွဲနေကာ နိုဝင်ဘာ ၇ ရက်နေ့ ညနေပိုင်းမှာတော့ ကျေးရွာအတွင်းက လူနေအိမ်တွေကို မီးရှို့ဖျက်ဆီးခဲ့လို့ လူနေအိမ် ၄၀ နီးပါး မီးလောင်ပျက်စီးခဲ့ရတယ်လို့လည်း သိရပါတယ်။

ကူညီဆောင်ရွက်ပေးနေသူတယောက်က “အသက် ၇၀ နီးပါးလောက်ရှိပြီးတော့ သူတို့အဖေ အရွယ်လောက်ရှိတဲ့ အဖိုးအို ၁ ယောက်ကို စစ်သားတွေဖမ်းသွားပြီး နားထင်ကိုသေနတ်နဲ့ ပစ်သတ်သွားတဲ့လုပ်ရပ်ဟာ ပြည်သူအပေါ်မှာ အညှိုးကြီးကြီးနဲ့ တော်တော်လေး ရက်စက်တဲ့ လုပ်ရပ်ဖြစ်တယ်လို့ပဲ ပြောချင်ပါတယ်” လို့ DVB ကို ပြောပါတယ်။

လူနေအိမ်တွေကိုမီးရှို့ဖျက်ဆီးသွားတဲ့ စစ်ကောင်စီစစ်ကြောင်းဟာ သဖန်းကျေးရွာကနေ သပြေပင်ကျေးရွာကို ဝင်ရောက်နေပြီး လူနေအိမ်တွေထဲကို ဝင်ရောက်မွှေနှောက် နေတဲ့အတွက်လည်း ဒေသခံရွာသားတွေဟာ ထွက်ပြေးတိမ်းရှောင်နေကြရတယ်လို့ သိရပါတယ်။

ဘုတလင်မြို့နယ်ထဲမှာ စစ်​ကောင်စီတပ်ဖွဲ့ဝင်တွေ စစ်ကြောင်းထိုးဝင်ရောက်နေတဲ့အပြင် နမခတပ်အတွင်းကနေ ဟောင်ဝစ်ဇာတွေအပါအ၀င် လက်နက်ကြီးတွေနဲ့ မကြာခဏ ပစ်ခတ်နေတာကြောင့် သဖန်းကျေးရွာ၊ သပြေပင်ကျေးရွာ၊ မကျီးအုတ်ကျေးရွာနဲ့ အင်းတဲကျေးရွာတို့က ထောင်ချီတဲ့ဒေသခံပြည်သူတွေဟာ နေရပ်စွန့်ခွာပြီးဘေးလွတ်ရာကို ထွက်ပြေးနေကြရတယ်လို့လည်း ဘုတလင်မြို့နယ် ပြည်သူ့အုပ်ချုပ်ရေးအဖွဲ့ဆီကနေ သိရပါတယ်။

နိုဝင်ဘာလ ၈ ရက်နေ့ ည ၉ နာရီကျော်လောက်က စစ်ကိုင်းတိုင်း၊ ကျွန်းလှမြို့နယ်၊ ဘအင်းသရက်တောရွာကို စစ်ကောင်စီတပ်နဲ့ ပျူစောထီးပူးပေါင်းအဖွဲ့တွေက ကျေးရွာအတွင်းဝင်ရောက်ပြီး လူနေအိမ်တွေကိုမီးရှို့ခဲ့တဲ့အပြင် ဒေသခံပြည်သူ ၂ ယောက်ကို သတ်ဖြတ်လိုက်တယ်လို့ ဒေသခံတွေက ပြောပါတယ်။

စစ်ကောင်စီစစ်ကြောင်းဟာ နိုဝင်ဘာ ၆ ရက်နေ့ ည ၇ နာရီလောက်မှာ ကန့်ဘလူမြို့နယ် ၆၀၀၆ တပ်ရင်းကနေ ကျွန်းလှမြို့ကို  ကား ၂ စီးနဲ့ ရောက်ရှိလာ‌ပြီးနောက် ကျေးရွာအတွင်း ဝင်ရောက်လာတာလို့ ဆိုပါတယ်။

အင်အား ၁၂၀ လောက်ရှိပြီး ကျွန်းလှမြို့ထဲကပျူစောထီးတွေပါ ခေါ်လာတာဖြစ်နိုင်ကြောင်း၊ စစ်ကြောင်းဝင်လာတာကို ဘယ်သူမှမသိဘဲ အသံကြားမှပြေးရတာကြောင့် ဘာပစ္စည်းမှမသယ်နိုင်ဘဲ ကိုယ်လွတ်ရုန်းပြေးရင်း ဖမ်းခံရတဲ့သူတွေလည်းရှိနေတယ်လို့ ရွာသားတယောက်က ပြောပါတယ်။

စစ်ကောင်စီပူးပေါင်းစစ်ကြောင်းဟာ ရွာကိုမီးရှို့ပြီး ဒေသခံ ၅ ယောက်ကို ဖမ်းဆီးထားသလို ဖမ်းဆီးထားသူတွေထဲက ၂ ယောက်ကိုသတ်ဖြတ်လိုက်ပြီလို့ သိရကြောင်းနဲ့ လက်ရှိမှာလည်း ကျေးရွာတွင်းကနေ ပြန်မထွက်သေးဘူးလို့ ဒေသခံတွေက ပြောပါတယ်။

ကျွန်းလှမြို့နယ် ပြည်သူ့အုပ်ချုပ်ရေးအဖွဲ့ တာဝန်ရှိသူတယောက်ကလည်း ရွာကိုမီးရှို့တာတော့ သေချာပြီး လူ ၂ ယောက် သတ်ခံရတယ်ဆိုတဲ့သတင်းကိုတော့ အတည်မပြုနိုင်သေးဘဲ အဲဒီရွာက သတင်းအသေးစိတ်သိရဖို့ ရပ်ရွာပြည်သူအုပ်ချုပ်ရေးအဖွဲ့ဆီကို ဖုန်းနဲ့ဆက်သွယ်နေပေမယ့် ဖုန်းလိုင်းမ ကောင်းတာကြောင့် ဆက်သွယ်လို့မရဖြစ်‌နေတယ်လို့ ပြောပါတယ်။