အရှုပ်တော်ပုံတွေကြောင့် နာမည်ပျက်နေတဲ့ အာဏာရပါတီ ဦးဆောင်တဲ့ ညွန့်ပေါင်းဟာ အောက်တိုဘာ ၂၇ ရက်က ကျင်းပတဲ့ ဂျပန်ရွေးကောက်ပွဲမှာ လူများစုနေရာ ဆုံးရှုံးခဲ့ရပါတယ်။

ဒါပေမဲ့ ကမ္ဘာ့စတုတ္ထအကြီးဆုံး စီးပွားရေးအင်အားကြီးနိုင်ငံကို ဦးဆောင်ဖို့ ဘယ်ပါတီကမှ ရှင်းလင်းတဲ့ အသာရမှုမျိုး မရှိတဲ့အတွက် အစိုးရသစ်ဖွဲ့ရေးမှာ မရေရာမှုတွေ ရှိလာခဲ့ပါတယ်။

ဝန်ကြီးချုပ် ရှီဂဲရုအီရှိဘရဲ့ လစ်ဘရယ်ဒီမိုကရက်တစ်ပါတီနဲ့ မဟာမိတ် ကိုမေတို ပါတီတို့ဟာ အောက်လွှတ်တော်မှာ ၂၁၅ နေရာရခဲ့ပြီး မူလက ၂၇၉ နေရာ ရှိခဲ့ရာကနေ လျော့သွားခဲ့တာ ဖြစ်ပါတယ်။

လက်ရှိအစိုးရအဖွဲ့ ဝန်ကြီး ၂ ယောက်နဲ့ ကိုမေတိုပါတီခေါင်းဆောင်တို့ ရွေးကောက်ပွဲ ရှုံးခဲ့ပါတယ်။

အအောင်မြင်ဆုံးဖြစ်ခဲ့တာကတော့ အဓိကအတိုက်အခံ ကွန်စတီကျူးရှင်းနဲလ် ဒီမိုကရက်တစ်ပါတီ အော့ဖ် ဂျပန် (CDPJ) ဖြစ်ပြီး ၁၄၈ နေရာအထိ ရခဲ့ပါတယ်။

ဒါဟာ အရင်က ၉၈ နေရာပဲ ရှိခဲ့ရာကနေ တိုးလာခဲ့တာဖြစ်ပေမဲ့ ထက်ဝက်ကျော်ဖို့ လိုအပ်တဲ့ ၂၃၃ နေရာတော့ မရခဲ့ပါဘူး။

အခြေခံဥပဒေအရ ပါတီတွေဟာ ညွန့်ပေါင်းအစိုးရဖွဲ့ရေး ညှိနှိုင်းဖို့ ရက် ၃၀ အချိန်ရပါတယ်။ ပါတီငယ်တွေဖြစ်တဲ့ အမတ် ၂၈ နေရာနဲ့ ၃၈ နေရာ အသီးသီးရကြတဲ့ ပြည်သူ့အတွက် ဒီမိုကရက်တစ်ပါတီ (DPP) နဲ့ ဂျပန် အင်နိုဗေးရှင်း ပါတီတို့ဟာ ဘယ်ပါတီကြီးက အစိုးရဖွဲ့နိုင်မလဲဆိုတာကို အဓိက အဆုံးအဖြတ်ပေးသွားဖို့ ရှိနေပါတယ်။

DPP က LDP ဦးဆောင်တဲ့ ညွန့်ပေါင်းမှာ ပါဝင်ဖို့ ငြင်းမထားပေမဲ့ အင်နိုဗေးရှင်းပါတီကတော့ မပူးပေါင်းဘူးလို့ ငြင်းထားပါတယ်။

၂ ပါတီစလုံးရဲ့ စီးပွားရေးမူဝါဒတွေဟာ LDP နဲ့ မတူတဲ့အတွက် အစိုးရဖွဲ့နိုင်ဖို့ အတော်ညှိနှိုင်းရဖို့ ရှိနေပါတယ်။

Source-Reuters