ဩစတြေးလျနိုင်ငံက ထင်ရှားတဲ့ အဏ္ဏဝါပြတိုက်တခုက ချောကလက်ရောင် ဧရာမ “ကင်းပင်ဂွင်း” လေးတကောင်ဟာ အင်တာနက်မှာ နာမည်ကြီးပြီး လာကြည့်သူ အထူးများပြားနေပါတယ်။

ပက်စတိုလို့ အမည်ပေးထားတဲ့ ၉ လသား ပင်ဂွင်းငှက်ပေါက်လေးဟာ ငှက်ပေါက်လေးဆိုပေမဲ့ သူ့မိဘနှစ်ကောင်ပေါင်းထက် ပိုလေးပြီး ၅၂ ပေါင် ရှိပါတယ်။

ချောကလက်ရောင် အမွေးဟာ ကင်းပင်ဂွင်းပေါက်တွေကို ဆောင်းတွင်းမှာ ပိုနွေးထွေးစေပါတယ်။ ကြီးပြင်းလာတဲ့အခါမှ အမွေးအတောင်ပြောင်းလဲပြီး ကိုယ်အလေးချိန်လည်း ပြန်ကျလာမှာဖြစ်ပါတယ်။

ပက်စတိုဟာ Sea Life Melbourne မှာ မွေးခဲ့သမျှထဲမှာ အကြီးဆုံးအကောင် ဖြစ်တယ်လို့ ဆိုပါတယ်။

အခုဆိုရင် ပတ်စတိုဟာ တီဗွီရှိုးတွေမှာ ပါသလို သူ့ပရိသတ်တွေထဲမှာလည်း ကေတီပယ်ရီလို နာမည်ကြီးတွေ ပါဝင်ပါတယ်။

လူမှုကွန်ရက်ချန်နယ်တွေနဲ့ ဝက်ဘ်ဆိုက်ကနေ ပက်စတိုကို ကြည့်ရှုသူ ၄ ဘီလီယံလောက် ရှိတယ်လို့ Sea Life Melbourne ငါးပြတိုက်ကိုစီမံတဲ့ Merlin Entertainments က ထုတ်ပြန်ပါတယ်။

စက်တင်ဘာလ အစောပိုင်းက အထီးလေးလား၊ အမလေးလား ဆိုတာကို အတည်ပြုတဲ့ ဗီဒီယိုဖိုင်ဟာ လူမှုကွန်ရက်မှာ အထူးရေပန်းစားခဲ့ပါတယ်။ စက်တင်ဘာလထဲမှာ ထိုင်းနိုင်ငံက ရေမြင်းပုလေး မူဒန်းဟာလည်း လူမှုကွန်ရက်မှာ နာမည်ကြီးခဲ့ပါသေးတယ်။

Source-Reuters