စစ်ကိုင်းတိုင်း၊ မုံရွာမြို့မှာ စက်တင်ဘာ ၂၆ ရက် နေ့လယ်ပိုင်းက ရွှေဆိုင်ပိုင်ရှင်အိမ် ဓားပြတိုက်ခံရပြီး စိန်နဲ့ရွှေထည်ပစ္စည်း အများအပြားပါသွားတယ်လို့ ဒေသခံတွေဆီက သိရပါတယ်။
မုံရွာမြို့၊ မြဝတီရပ်ကွက်၊ မေတ္တာလမ်းသွယ် ၁ က နဝရတ်ရွှေဆိုင်နဲ့ တွဲလျက်ရှိတဲ့ ပိုင်ရှင်ဒေါ်ဝင်းခိုင်ရဲ့ နေအိမ်ကို လူငယ်အမျိုးသမီး ၂ ယောက် အပါအဝင် လူ ၅ ယောက် က စက်တင်ဘာ ၂၆ ရက် နေ့လယ် ၁၂ နာရီမှာ ဆိုင်ကယ်နဲ့ရောက်လာပြီး နေအိမ်ထဲဝင် ဓားပြတိုက်ခဲ့တာလို့ ရပ်ကွက်အတွင်းနေထိုင်သူတယောက်က ပြောပါတယ်။
“အရင်ကလည်း အဲဒီအိမ်မှာ လူတွေအဝင်အထွက်လုပ်နေကြတာပဲ။ အဲဒီနေ့က အမျိုးသမီး ၂ ယောက်နဲ့ အမျိုးသား ၃ ယောက် ဆိုင်ကယ်နဲ့ဝင်လာပြီး အနုကြမ်းဝင်စီး သွားတာလို့ ကြားလိုက်တယ်။ စိန်ထည်နဲ့ရွှေထည်အားလုံးပေါင်း သိန်း ၁ သောင်းကျော်လောက် ပါသွားတယ်” လို့ပြောပါတယ်။
ဓားပြတိုက်ခံရမှုနဲ့ပတ်သက်ပြီး ရွှေဆိုင်နဲ့နီးစပ်သူတဦးက သူရဲ့လူမှုကွန်ယက်စာမျက်နှာမှာ ဖုန်း ၅ လုံး၊ လက်ပ်တော့ ၁ လုံး၊ စိန်၊ ရွှေ၊ ပလက်တီနမ်အတွင်းပစ္စည်းအားလုံး ယူဆောင်သွားတယ်လို့ ရေးသားထားပြီး ဓားပြတိုက်ခံရမှုဖြစ်စဉ် CCTV မှတ်တမ်းနဲ့အတူ ဖော်ပြထားပါတယ်။
လူမှုကွန်ယက်မှာပျံ့နှံ့လာတဲ့ ဓားပြတိုက်ခံရမှု CCTV မှတ်တမ်းအရ အမျိုးသမီး ၂ ယောက်ဟာ နေအိမ်တွင်း စတင်ဝင်ရောက်လာပြီးနောက် လက်နက်ကိုင်ဆောင်ထားတဲ့ အမျိုးသား ၂ ယောက် ထပ်မံဝင်ရောက်လာပြီး ပစ္စည်းတွေကို သိမ်းယူနေတာကို တွေ့ရပါတယ်။
စစ်ကောင်စီရဲ့ အနောက်မြောက်တိုင်းစစ်ဌာနချုပ်အခြေစိုက်ရာ မုံရွာမြို့ပေါ်မှာ ဓားပြမှု၊ ပြန်ပေးမှု၊ လုယက်မှု၊ လမ်းမပေါ် လုယက်အဓမ္မပြုကျင့်မှုတွေ မကြာခဏဖြစ်ပွားနေပေမယ့် စစ်ကောင်စီဘက်က ဖမ်းဆီးအရေးယူနိုင်မှုမရှိသလောက်ဖြစ်နေကြောင်း မြို့ခံတွေအကြား ဝေဖန်ပြောဆိုတာတွေလည်း ရှိနေပါတယ်။
အလားတူ ပြီးခဲ့တဲ့ မတ် ၅ ရက်နေ့ကလည်း မုံရွာမြို့၊ သလ္လာရပ်ကွက်၊ စိတ္တသုခလမ်းနဲ့ ငွေသော်တာလမ်းဆုံမှာ ပရီမီယာကော်ဖီ ကုမ္ပဏီကား ဓားပြတိုက်ခံရပြီး ငွေကျပ်သိန်း ၅၇၀ ကျော် ဆုံးရှုံးသွားခဲ့သေးတယ်လို့ ဒေသခံတွေဆီက သိရပါတယ်။
