(က)
ရွာ့တောင်ကျောင်းမှာ စကားကောင်းနေကြစဉ် အဘစောမူးသာက သူ၏ဖုန်းထဲကို သဲသဲမဲမဲ ကြည့်နေပါလေ၏။ သူ၏မျက်နှာမှာ ဝမ်းသာကြည်နူးကာ ပီတိဖြာဝေနေသလိုပါပေ။ “ဒါပဲကွာ . . . ဒီလိုပဲဖြစ်ရမှာပေါ့ကွာ” ဟုလည်း နှုတ်မှ ထွက်ကျလာပါလေ၏ ခင်ဗျာ။
“ဘာတွေ သဘောကျနေတာလဲ မူးသာရ”
“အရာရာကို စွန့်လွှတ်ပြီး တိုက်ပွဲဝင်နေကြတဲ့ နိုင်ငံအနှံ့က ပြည်သူ့ကာကွယ်ရေးတပ်သား PDF တွေ ကိုယ့်အိမ်ကိုယ် ပြန်လာနိုင်ကြတာတွေကို မြင်ရတော့ ဝမ်းသာလို့ကွ စိမ်းမောင်ရ။”
“ဟေ . . .”
“ဒီမှာ ကြည့်ကြပါအုံးကွာ၊ PDF တွေကို ပြည်သူတွေက ‘ပန်းတွေ’ နဲ့သာမက ‘အနမ်းတွေ’ နဲ့ပါ ဝမ်းသာအားရ ကြိုဆိုနေကြတဲ့ မြင်ကွင်းဟာ ကြည်နူးမျက်ရည်ဝဲစရာ။”
“အမှန်ပဲ မူးသာ၊ ငါလည်း ကြည့်ပြီး မျက်ရည်တောင် စို့တယ်ကွာ။”
“အေးကွ လုံးတုံးရ၊ ဖက်ဆစ်ဂျပန်ငပုတွေကို ဆော်ပြီး အောင်ပွဲနဲ့အတူ ပြန်လာတဲ့ တော်လှန်ရေးတပ်သားတွေကို ကြိုဆိုသလိုကို ကြိုနေကြတာဟ စိမ်းမောင်ရ။”
“အေး . . . အဲ . . .”
“မြို့ရွာအတော်များများက ဖက်ဆစ်ဂျပုတော်လှန်ရေးတပ်ဖွဲ့တွေရဲ့ အိမ်ပြန်ချိန်ပေါ့ကွာ။”
“ဟုတ်ပ မူးသာရာ . . . ပြည်သူ့ဘက် မျက်နှာမမူဘဲ ကြင်စိုး သာ၀ မအလကြီး ကိုပဲ ကာကွယ်နေတဲ့ ဖက်ဆစ်တပ်သားတွေကတော့ ကိုယ့်အိမ်ကိုယ် ပြန်မရောက်ကြတော့ဘဲ နိုင်ငံ့ဒေသ အနှံ့အပြားမှာ ‘မြေသြဇာ’ တွေ ဖြစ်ကုန်ကြပြီပေါ့။”
“ဟှူး . . . . . ဝှူး . . . . .”
စိမ်းသရဖူစိမ်း အဘစိမ်းမောင်ထံမှ သက်ပြင်းမောချသံကြီးကို ကြားကြရပါ၏။
သူ့တူအရင်းတွေကော ညီဝမ်းကွဲတွေပါ ဖက်ဆစ်ဂျပု မအလကို ကာကွယ်နေကြဆဲ လက်ကျန်တပ်တွေထဲမှာ ရှိနေကြဆဲ မဟုတ်ပါလား။
“မင့်ညီတွေ မင့်တူတွေကို CDM လုပ်ခိုင်းတော့လေကွာ၊ ပြည်သူ့ရင်ခွင် ခိုလှုံခိုင်းတော့လေကွာ။”
“သူတို့က ခိုလှုံချင်လည်း သူတို့ရဲ့တပ်ရင်းမှူးတွေ၊ တပ်မမှူးတွေက မခိုလှုံရင် သူတို့လည်း ခိုလှုံဖို့ ခက်ခဲမှာပဲကွ။”
“အေးကွာ . . . မင့်တူတွေ မင့်ညီတွေ ပြည်သူ့ဘက် မျက်နှာမူမယ့် ပြည်သူ့သားကောင်း ခေါင်းဆောင်တွေရဲ့ တပ်တွေမှာ ရောက်နေပါစေလို့ပဲ ဆုတောင်းမေတ္တာ ပို့ပါတယ်ကွာ။”
“အင်း . . .”
“ဒီလိုမှ မဟုတ်ဘဲ ကြင်စိုး သာ၀ မအလ ကိုပဲ ကိုးကွယ်ပြီး ကာကွယ်နေမယ့်သူရဲ့တပ်မှာ ဆိုရင်တော့ လားရှိုးသိမ်းအောင်ရဲ့ ဟိုသီချင်းလို ဖြစ်လိမ့်မယ်ဟ လုံးတုံးရ။”
“ဘယ်သီချင်းများလဲ ‘လားရှိုးမူးသာ’ရာ၊ ကြားပါရစေလား”
အဘစောမူးသာက ရေနွေးကို မော့ချလိုက်ကာ လည်ချောင်းရှင်းလိုက်ပါ၏။ ပြီးသည့်အခါ ပီသ ကြည်မြသည့် ဘယ်သံကြီးဖြင့် ဆိုပြပါလေတော့သတည်း။
“ကြင်သေကောင် အနား နားဝယ် တ ဝဲ လ ည် လ ည် လိုက်ပါလို့ သွားတော့တယ် . . . သောင်နဲ့ကမ်းခြေ ကွာဝေးတဲ့ ဘဝတွေရယ် . . . အိမ်ပြန်လမ်းမရှိတဲ့ စ စ် ခွေး ပုံ သို့ နှ ယ်။”
“အယ် လယ် လယ်”
(ခ)
ခုရက်ပိုင်း လိုင်းပေါ်က ရုပ်သံသတင်းတွေမှာဆိုရင်ဖြင့် ဒေသအနှံ့အပြားက PDF တွေဟာ မိမိဒေသ မိမိရပ်ရွာက မိမိတို့ရဲ့အိမ်ကို မိမိစစ်ယူနီဖောင်းနဲ့ မိမိလက်နက်ကို စွဲကိုင်လို့ ပျော်ရွှင်စွာ ပြန်ရောက်လာကြတဲ့ ပုံရိပ်တွေကို ခပ်စိပ်စိပ် တွေ့မြင်နေကြရပါတယ်ခင်ဗျ။
“အပြန် . . အပြန် . . အပြန် . . ဆယ်လမွန် ငါးတို့အပြန် . . .”
“ဟုတ်ပ မူးသာရာ၊ ဆယ်လမွန်ငါးတွေ အိမ်ကို ပြန်လာနိုင်ကြပြီကွ။”
“ဒါပဲပေါ့ လုံးတုံးရာ၊ ဝမ်းသာသကွာ၊ ကြည်နူးသကွာ၊ ပီတိဖြစ်သကွာ၊ မင်းကော ပီတိမဖြစ်ဘူးလား စိမ်းမောင်။”
“အေး . . . အဲ . . .”
“PDF ကလေးတွေ အိမ်ပြန်လာကြချိန်မှာ မအလကို သစ္စာခံဆဲ အလုပ်အကျွေးပြုကြဆဲ အကောင်တွေကတော့ အိမ်ကနေ ထွက်ပြေးနေကြရပါရောလားဟ စိမ်းမောင်ရ။”
“အ . . .”
“ဒီရုပ်သံဖိုင်တွေထဲမှာ ကြည့်ကွာ၊ ရှမ်းမှာကော ကရင်နီမှာကော ရခိုင်မှာကော ဘယ်နေရာမှာ ဖြစ်ဖြစ် သူတို့တပ်လိုင်းခန်းက အိမ်တွေကိုထားခဲ့ပြီး ကိုယ်လွတ်ရုန်း ပြေးနေကြတာ ဖက်ဆစ်တပ်ရဲ့ ‘မအလဖလား အပြေးပြိုင်ပွဲ’ လား ထင်ရပါသဗျား။”
“ဝါး . . ဟားဟား ဟားဟား ဟားဟား”
တပ်ရင်းလိုက် ပြေးကြ၏။ တပ်မလိုက် ပြေးကြ၏။ သည်နှုန်း သည်စံချိန်အတိုင်း ဆိုလျှင် ကမ္ဘာ့တပ်မတော်များ အပြေးပြိုင်ပွဲမှာ ဗိုလ်စွဲမှာကျိန်းသေနေပြီဟု သုံးသပ်ကြပါ၏။
“ဒီမှာကြည့်လေကွာ၊ တပ်တွေဟာ အခွံတွေချည်း ကျန်ခဲ့တာ၊ နည်းလားဟ။”
“ဟုတ်တယ်မူးသာ၊ ဒီပုံအတိုင်းသာဆိုရင် မကြာခင် မန္တလေးကတပ်တွေကော နေပြည်တော်က တပ်တွေပါ လူသူကင်းမဲ့လို့ ' ကျီးနဲ့ဖုတ်ဖုတ် ' ဖြစ်တော့မယ်ဟ။”
“အေးလေ၊ ခုလည်း ' ကြည်းတပ်ဖုတ်ဖုတ် ' ဖြစ်နေပြီမဟုတ်လား။”
“ဟား ဟား ဟား ဟား ဟား ဟား”
“သမ္မတရူး ကြင်စိုးရဲ့သစ္စာတော်ခံ အပြေးချန်ပီယံတွေ တချိန်လုံး ပြေးနေရပြီး သူတို့ရဲ့နည်းပြကြီး မအလ လည်း အိမ်ကိုပစ်ပြီး ပြည်ပအထိကို ပြေးမှာ ကျိန်းသေနေပြီဟ စိမ်းမောင်ရ။”
“အေး . . . အဲ . . .”
“အခုဆို မအလကြီး မြေအောက်ဂူထဲမှာ အပြေးကျင့်ရင်း သီချင်းပါ ဆိုဆိုနေတာ ကြားကြရသတဲ့ ဟ။”
“ဘယ်သီချင်းကို ဆိုနေပြန်တာလဲ”
“မျိုးကြီးသီချင်းလေကွာ”
“လုပ်စမ်းပါအုံးဟ”
“အဟမ်း . . . အဟမ်း”
“အိမ်ပြန်ချိန်ကိုတောင် မသိခဲ့သူ ဘယ်မှာနေရမလဲ မသိတော့သူ… ဒီက ပြေးနေသူ . . . အိုး ဝို . . . ဒီ က ပြေး နေ သူ . . . . .”
“ဟား ဟား ဟား ဟား ဟား ဟား”
(ဂ)
‘ဝဋ်’ ဆိုတာ ဘဝမကူးဘူးဟု သုံးသပ်ကြပါ၏။ သူများတွေကို အိမ်တွေကနေ မောင်းထုတ်ခဲ့ကြသူတွေဟာ အခုတော့ သူတို့ကိုယ်တိုင် မောင်းအထုတ်ခံရကာ အိမ်တွေနှင့် ဝေးရာဆီသို့ ခွေးပြေး၊ ဝက်ပြေး၊ ကြက်ပြေး၊ နွားပြေး၊ ပြေးနေကြရပုံများမှာ သင်ခန်းစာယူစရာပါတဲ့။
ဒကာကျော်များ စကားကောင်းနေကြစဉ် ဆရာတော်ဘုရား ရောက်ရှိလာပါ၏။
“ဘာတွေတုံးဟ မူးသာတို့ရ . . ခွေးပြေးတွေကော နွားပြေးတွေကော စုံလို့ပါလား။”
“ဟားဟား ဟားဟား ဟားဟား”
“ဘာတွေတုံးဟ လုံးတုံးရ”
“အရှင်ဘုရားတို့ ကြပ်ပြေးက အဘရဲ့ စတင်န်းဒတ်တပ်သားတွေ အပြေးမှာ ကမ္ဘာ့ချန်ပီယံ ဖြစ်နေပုံတွေကို ချီးကျူးနေကြတာပါဘုရာ့။”
“ဟမ် . . .”
“ကိုယ်တော်လည်း လိုင်းပေါ်မှာ တွေ့မှာပေါ့၊ အုပ်စုလိုက် အုပ်စုလိုက်တွေ မာရသွန် ပြေးနေကြတာလေ။”
“ဟှူး . . . တကယ့်ကောင်တွေကွာ။”
“ကျည်ဆန်မှန်ရင် သေတတ်တယ်ဆိုတာကို သူတို့လည်း သိလို့ဖြစ်မှာပေါ့ဘုရာ့။"
“အလကားကောင်တွေ . . . ကွာ”
“ဟား ဟား ဟား ဟား ဟား ဟား”
စိမ်းသရဖူစိမ်း၊ စိမ်းဆိုမှစိမ်း၊ အမြဲစိမ်းခဲ့သည့်ပုဂ္ဂိုလ်များထံမှ ‘အကန်စကား’တွေ ကြားလာရပေရာ ‘လူထုအောင်ပွဲ’အတွက် အားတက်စရာပါပေ။
“ဘာပဲဖြစ်ဖြစ် ကိုယ်တော်တို့ရဲ့ ဘုရားဒကာကြီးကြင်စိုးဟာ ‘မခံချင်စိတ်’တော့ အတော်ရှိတဲ့လူ ဘုရာ့”
“ဘယ်လိုတုန်းဟ”
“NUG က ယာယီသမ္မတကြီးတို့၊ ကာကွယ်ရေးဝန်ကြီးတို့တွေ ရှေ့တန်းစစ်မြေပြင်တွေကို သွားသွားနေတာ မြင်တော့ “ငါလည်း သွားရဲပါတယ်ကွာ” ဆိုပြီး ကရင်နီဘက် သွားပြတယ်လေ။”
“အဲ . . .”
“အဲသည်မှာ ဟိုက ‘မမတွေ’ နဲ့လည်း ဧည့်ခံကော ဒရောသောပါး ပြန်ပြေးလာလိုက်တာ သူ့ဝပ်ကျင်းဂူထဲကို ခဏလေးနဲ့ ပြန်ရောက်ပါရောလား။”
“ဟား ဟား ဟား ဟား ဟား ဟား”
“ ‘မမတွေ’က ကြိုတယ် ဟုတ်လား”
“တင်ပါ့ဘုရား၊ ‘၁၂၀ မမ’ တွေနဲ့ ကြိုတာလေ။”
“ဟေ . . .”
“မန္တလေးမှာ ‘သားရေကြိုးကိုးကွင်း’ အပြေးချန်ပီယံဖြစ်ပြီး ကရင်နီမှာ ‘သားရေကြိုးတင်းအောင်ကိုင်’ သရဖူဆောင်းပါတယ် ဘုရား။”
“ဝါး . . ဟားဟား ဟားဟား ဟားဟား”
မည်သို့ပင်ဆိုစေကာမူ တချီချီတော့ သွားရင်းလာရင်း လမ်းပေါ်မှာတင်ပဲ ‘ငရဲရွာစံမှာ’ ဟု သုံးသပ်ပြကြပါ၏။
ဘယ်လိုပင် ပုန်းရှောင်စေကာမူ ဝဋ်ကနေ လွတ်နိုင်ခြေလမ်းမရှိတော့ဟု ပြောကြပါလေ၏။
“တရားတော်ထဲက ‘လူမုန်းသည်ကို မကြောက်ရ၊ ကံမုန်းမည်ကသာ ကြောက်စရာကောင်းလှပါ၏။ ကံမုန်းလျှင် ဘယ်လိုမှ ပုန်း၍မရနိုင်ပါ’ ဆိုတာကို သွားသတိရမိတယ် ဘုရာ့။”
“အိမ်း . . .”
“အပြည့်အစုံ လင်းပါဦး လုံးတုံးရ။”
အဘစောမူးသာကပြောတော့ အဘလုံးတုံးက ရေနွေးကြမ်းကိုကြိုက်ချလိုက်ပြီး ‘ကံမုန်းလင်္ကာ’ လေးကို ရွတ်ပြပါလေတော့သတည်း။
“သမုဒ္ဒရာအလယ် ပြာသာဒ်တည်၊ ပုန်းကွယ်မလွတ်ပါ”
“မိုးကောင်းကင်ထဲ ပုန်းခိုလည်း၊ လွတ်မြဲမရှိပါ”
“ထိုထိုတောင်ခေါင်း ပုန်းခိုအောင်း၊ လွတ်ကြောင်းမရှိပါ”
“ဇရပ်တန်ဆောင်း အိမ်ဝင်အောင်း၊ လွတ်ကြောင်းမရှိပါ”
“ကံမုန်းပါက ဘယ်ကိုမျှ ၊ ပုန်းကြမလွတ်ပါ”
“သာဓု . . . သာဓု . . . သာဓု”
ဖေကြီး(လေရှီး)
