အခုနှစ်ဘောလုံးရာသီဟာ လီဗာပူးအတွက် နောက်ဆုံး ကစားပေးတဲ့ရာသီ ဖြစ်နိုင်ကြောင်း တိုက်စစ်ကစားသမား မိုဟာမက်ဆာလာ ဝန်ခံပြောပါတယ်။
မန်ယူအသင်းကို ၃ ဂိုး ဂိုးမရှိနဲ့ အနိုင်ရတဲ့ ပွဲစဉ်မှာ မိုဆာလာက တဂိုးသွင်း၊ ၂ ကြိမ် ဂိုး ဖန်တီးနိုင်ခဲ့ပြီး အကောင်းဆုံးစွမ်းဆောင်ရည် ပြသနိုင်ခဲ့တာပါ။
ပွဲအပြီးအင်တာဗျူးမှာတော့ အသင်းနဲ့ နောက်ဆုံးစာချုပ်သက်တမ်းအတွင်း ရောက်ရှိနေပြီး စာချုပ်သက်တမ်းတိုးဖို့လည်း ဆွေးနွေးခြင်းမရှိသေးတာကြောင့် နောက်ဆုံးဘောလုံးရာသီ ဖြစ်နိုင်ကြောင်း ဆာလာက ပြောခဲ့တာပါ။
အသင်းမှာ ဆက်ရှိနေဖို့က သူ့အပေါ်မှာ မူတည်မနေဘဲ အသင်းတာဝန်ရှိသူတွေရဲ့အပေါ်မှာပဲ မူတည်ကြောင်း၊ စာချုပ်ကိစ္စ ခေါင်းထဲမထားဘဲ အသင်းအတွက် ပျော်ရွှင်စွာ ကစားသွားချင်ပြီး လာမယ့် ရာသီရောက်မှ စောင့်ကြည့်သွားရမှာ ဖြစ်တယ်လို့ ဆာလာက ပြောသွားပါတယ်။
ဆာလာကို ဆော်ဒီကလပ်တွေကလည်း မက်မောစရာ လုပ်ခလစာတွေနဲ့ ကမ်းလှမ်းထားပြီး လီဗာပူးဘက်က စာချုပ်သက်တမ်းမတိုးဘူးဆိုရင် အခုနှစ်ရာသီအကုန်မှာ အသင်းကနေ ထွက်ခွာရတော့မှာ ဖြစ်ပါတယ်။
