စစ်ကိုင်းတိုင်း၊ အရာတော်မြို့နယ်၊ သလဲဘာကျေးရွာက စစ်ကောင်စီတပ်စခန်းကို သြဂုတ် ၁၄ ရက် မနက် ၅ နာရီခွဲဝန်းကျင်က ထိုးစစ်ဆင် တိုက်ခိုက်ခဲ့တဲ့အတွက် စစ်ကောင်စီတပ်သားနဲ့ ပျူစောထီး ၇ ဦး သေဆုံးခဲ့တယ်လို့ Shwebo Crocodile PDF ဆီကနေ သိရပါတယ်။

Shwebo Crocodile PDF ရဲ့ တာဝန်ခံတဦးက “စခန်းသိမ်းနိုင်ဖို့အတွက် ၅ နာရီနီးပါး ထိုးစစ်ဆင်ပြီး တိုက်လိုက်ရတယ်။ ဒါပေမဲ့ သူတို့ဘက်က အရာတော် လေ့ကျင့်ရေး ၁၀ နဲ့ ငွေတွင်းပျူရွာတွေက လက်နက်ကြီးပစ်ကူတွေပေးပြီး စစ်ကူတွေပါ ရောက်လာလို့ စခန်းမသိမ်းနိုင်ခဲ့ပါဘူး။ သူတို့ဆီက လက်နက်တွေတောင် မကောက်နိုင်ဘဲ ပြန်ဆုတ်ခဲ့ရတယ်” လို့ ပြောပါတယ်။

အဆိုပါတိုက်ပွဲအတွင်း သလဲဘာကျေးရွာ၊ စစ်ကောင်စီတပ်စခန်းက စစ်ကောင်စီတပ်သား ၃ ဦးနဲ့ ပျူစောထီး ၄ ဦး သေဆုံး​ပြီး ပြည်သူ့ကာကွယ်ရေး ပူးပေါင်းတပ်ဘက်က ရဲဘော် ၂ ဦး ဒဏ်ရာအနည်းငယ် ရရှိခဲ့​တယ်လို့ ဆိုပါတယ်။

Shwebo Crocodile ရဲ့ စစ်ဆင်ရေးတာဝန်ခံက “အဲဒီပျူစခန်းပတ်လည်က မိုင်းတွေထောင်ထားတာကို ခက်ခက်ခဲခဲ ​ကျော်ဖြတ်ပြီး တိုက်ခဲ့ရတာပါ။ အခုတကြိမ် စခန်းမသိမ်းနိုင်ခဲ့ပေမဲ့ အဲဒီစခန်းကို မရရအောင် တိုက်ခိုက် သိမ်းပိုက်သွားမှာပါ” လို့ ပြောပါတယ်။

အဆိုပါစစ်ဆင်ရေးကို Shwebo Crocodile နဲ့အတူ တပ်ရင်း ၂၁၊ ၁၉၊ ၂၆၊ ၂၂၊ Zero တို့က ဦးဆောင်ပြီး ရွှေဘိုမြို့နယ် ပြည်သူ့လုံခြုံရေးတပ်ဖွဲ့၊ ဗိုလ်ကျားရိုင်း ပြည်သူ့ကာကွယ်ရေးတပ်ဖွဲ့၊ ဗိုလ်ဂျပန်ကြီး-ရွှေဘိုအဖွဲ့၊ စွန်ရဲရွှေဘို ဒေသခံပြည်သူ့ကာကွယ်ရေးအဖွဲ့၊ ဒေါင်းစစ်သည်အဖွဲ့၊ ရွှေဘိုအားမာန်အဖွဲ့၊ HG FIGHTER, EYE FOR EYE ပြည်သူ့ကာကွယ်ရေးအဖွဲ့၊ ရှင်းရှင်း-ပြည်သူ့ကာကွယ်ရေးတပ်ဖွဲ့၊ Hero Brother, ဖျံ-ပြည်သူ့ကာကွယ်ရေးအဖွဲ့၊ Zay Yar Thawed, YAUNG NI, ရွှေဘိုသား ပြည်သူ့ကာကွယ်ရေးအဖွဲ့၊ ဗိုလ်လင်းရောင်ပြည်သူ့ကာကွယ်ရေးအဖွဲ့၊ ဇာမဏီဒေါင်း ပြည်သူ့ကာကွယ်ရေးအဖွဲ့၊ BO BA Taw - LDF ရွှေဘိုမြို့နယ်တော်လှန်ရေးတပ်ပေါင်းစုတွေ ပူးပေါင်းတိုက်ခိုက်ခဲ့တာလို့ သိရပါတယ်။