စစ်ကိုင်းတိုင်း၊ ဆားလင်းကြီးမြို့နယ်၊ မြန်မာဝမ်ပေါင်ကုမ္ပဏီမှာ တာဝန်ကျနေတဲ့ ရဲတပ်သား ၃ ဦး မနေ့ ဇူလိုင် ၃၁ ရက် မနက်အစောပိုင်းက လက်နက်နဲ့အတူ အလင်းဝင်ရောက်လာကြောင်း ယင်းမာပင်ခရိုင် တပ်ရင်း-၁၆ ကနေ သိရပါတယ်။
ယင်းမာပင်ခရိုင် တပ်ရင်း ၁၆၊ တပ်ခွဲ ၁ - Brother Defense Force နဲ့ ချိတ်ဆက် အလင်းဝင်လာတဲ့ ရဲတပ်သား ၃ ဦးမှာ မနေ့မနက် ၁ နာရီဝန်းကျင်လောက်က ကင်းတာဝန်ကျနေရာက ရောက်ရှိလာတာဖြစ်ကြောင်း တပ်ရင်း ၁၆ တာဝန်ရှိသူတဦးက ပြောပါတယ်။
“သူတို့ ၃ ဦးက တပတ်စဉ်တည်း တက်ခဲ့တဲ့ သူငယ်ချင်းတွေပါ။ CDM ဝင်တဲ့သူတွေ များနေလို့ဆိုပြီး ကင်းကျတဲ့အချိန်မှပဲ သူတို့ကို လက်နက်ပေးထားတာလို့ ပြောတယ်။ ထွက်တဲ့အချိန်က တယောက်က ကင်းကျနေတဲ့အချိန် ထွက်လာတာဆိုတော့ ကျန်တဲ့ နှစ်ယောက်က လက်နက်မယူနိုင်ခဲ့ဘူး။”
အဲဒီ ရဲတပ်သား ၃ ဦးနဲ့အတူ G-3 တလက်၊ 7.62 ကျည် အတောင့် ၁၀၀၊ ကျည်ဘောက် ၂ ခုနဲ့ လက်ကိုင်ဖုန်း ၃ လုံး ပါ ရရှိခဲ့ကြောင်း သိရပါတယ်။
အလင်းဝင်ရောက်လာသူတွေဖြစ်တဲ့ ကိုဝင်းမင်းသူ၊ ကိုစိမ်းမောင်မောင်နဲ့ ကိုမင်းခန့်သူတို့ ၃ ဦးမှာ ပြီးခဲ့တဲ့နှစ် စက်တင်ဘာလပိုင်းက ရဲသင်တန်းဆင်းထားသူတွေဖြစ်ကာ အလင်းမဝင်ခင်အထိ ဝမ်ပေါင်ကုမ္ပဏီထဲမှာရှိတဲ့ ဘန်ကာတခုမှာ အစောင့်တာဝန် ကျနေသူတွေဖြစ်ကြောင်း သိရပါတယ်။
လက်ရှိ ယင်းမာပင်ခရိုင် တပ်ရင်း ၁၆ မှာ အလင်းဝင်တပ်သား ၇ ဦးထိရှိလာပြီး ပြီးခဲ့တဲ့ မေ ၂၆ ရက်ကလည်း ဆားလင်းကြီးမြို့မရဲစခန်းက ရဲတပ်သားတဦး လက်နက်နဲ့အတူ အလင်းဝင်ရောက်ခဲ့သေးကြောင်း တော်လှန်ရေးအဖွဲ့တွေထံက သိရပါတယ်။
