ချင်းပြည်နယ်၊ ထန်တလန်မြို့ပေါ်မှာ တပ်စွဲနေတဲ့ စစ်ကောင်စီတပ်သားတဦးနဲ့ ရဲတပ်ဖွဲ့ဝင် တပ်သားတဦးတို့ဟာ လက်နက်ခဲယမ်းတွေနဲ့အတူ ဇူလိုင် ၂၅ ရက်က အလင်းဝင်လာကြတယ်လို့ Chinland Defense Force (Thantlang) ကနေ သိရပါတယ်။

Chinland Defense Force (Thantlang) ရဲ့ တာဝန်ခံတဦးက “အခုအလင်းဝင်လာသူတွေက တပ်သားအဆင့်တွေပါ။ သူတို့ ၂ ယောက်လုံးက စစ်ကောင်စီတပ်အောက်မှာ တာဝန်မထမ်းဆောင်ချင်ကြတော့လို့ ကျနော်တို့ရဲ့ တော်လှန်ရေးမှာ ပါဝင်မယ်ဆိုတဲ့ ဝန်ခံကတိလက်မှတ်တွေကို သူတို့ကိုယ်တိုင်ထိုးပြီး ချင်းပြည်နယ်အစိုးရအဖွဲ့ဆီမှာ အလင်းဝင်ကြတာပါ” လို့ DVB ကို အတည်ပြု ပြောပါတယ်။

စစ်ကောင်စီလက်အောက်ခံ တပ်သား ၂ ဦးဟာ MA 2 သေနတ် ၁ လက်၊ G3 သေနတ် ၁ လက်၊ ကျည်ဘောက် ၈ ခု၊ ကျည်ဆန် ၁၈၅ တောင့်၊ Grenade ၁ ခု၊ ၄၀ မမ ကျည် ၂ ခု၊ ကျည်ကာအင်္ကျီ ၁ ခုတို့နဲ့အတူ အလင်းဝင်ရောက်လာကြတာလို့ ဆိုပါတယ်။

သူတို့ ၂ ဦးလုံးကို ချင်းပြည်နယ်အစိုးရက သိန်း ၅၀ စီ ချီးမြှင့်ပေးလိုက်ပြီး စိတ်ချလုံခြုံတဲ့နေရာကို ပို့ဆောင်ပေးထား​တယ်လို့ Chinland Defense Force (Thantlang) ပြန်ကြားရေးတာဝန်ခံတဦးက ပြောပါတယ်။

ကျန်ရှိနေသေးတဲ့ စစ်ကောင်စီလက်အောက်ခံတွေ အနေနဲ့လည်း ပြည်သူ့ရင်ခွင်ကို ဝင်ရောက်ပြီး ပြည်သူ့တော်လှန်ရေးမှာ ပါဝင်နိုင်ကြဖို့အတွက် အမြဲကြိုဆိုနေတယ်လို့လည်း ဆိုပါတယ်။