စစ်ကိုင်းတိုင်း၊ ကန့်ဘလူမြို့နယ်မှာ စစ်ကောင်စီတပ်စစ်ကြောင်းက အရပ်သား ၃ ဦးအား သတ်ဖြတ်ပြီး ပြည်သူ ၄ ဦးကို ဓားစာခံအဖြစ် ဖမ်းဆီးသွားတယ်လို့ ကန့်ဘလူဒေသခံတွေက ပြောပါတယ်။
ဇူလိုင် ၂၆ ရက် မနက်ပိုင်းလောက်ကစပြီး ကန့်ဘလူအခြေစိုက် ခမရ-၆၀၆ တပ်ကနေ အင်အား ၁၂၀ ပါစစ်ကြောင်းနဲ့ ကန့်ဘလူမြို့နယ် တောင်ဘက်ခြမ်းကို စစ်ကြောင်းထိုးနေတာပါ။
ဇူလိုင် ၂၆ ရက် မနက် ၁၀ နာရီမှာ ဒရုန်းနဲ့ ဗုံးသီးချတိုက်ခိုက်ခဲ့တဲ့အတွက် ဗုံးသီးထိမှန်ကာ သရက်ခေါင်းရွာက အရပ်သား ၂ ဦးသေဆုံးပြီး ညပိုင်းမှာ လက်နက်ကြီးနဲ့ ပစ်ခတ်တဲ့အတွက် သပြေသာလေးရွာက လက်နက်ကြီးစထိမှန်လို့ ပြည်သူ ၁ ဦးလည်း သေဆုံးခဲ့ပါတယ်။
“စစ်ကြောင်းက ၂၆ ရက်နေ့မှာ ကန့်ဘလူ ၆၀၆ တပ်ရင်းက လာတာပါ။ စစ်ကောင်စီက အဲဒီမနက် ၁၀ နာရီမှာပဲ ဒရုန်းနဲ့ချလို့ ပြည်သူ ၂ ယောက် သေတယ်၊ ၁ ယောက် ဒဏ်ရာရတယ်။ ညပိုင်းမှာ သူတို့တွေ လက်နက်ကြီးနဲ့ပစ်လို့ ပြည်သူ ၃ ဦး ဒဏ်ရာရပြီး ၁ ယောက် သေပါတယ်။ ဖမ်းဆီးခံသူကလည်း များတယ်ဗျ၊ ဘယ်နှယောက်ဆိုတာ အတည်ပြုလို့မရသေးဘူး” ဒေသခံတဦးက ပြောပါတယ်။
သရက်ခေါင်းရွာက နေအိမ် ၇၂ လုံးနဲ့ ရှမ်းတပ်ရွာက နေအိမ် ၁၁၅ လုံးကို မီးရှို့ဖျက်ဆီးခဲ့ပြီး ပြည်သူ ၄ ဦးထက်မနည်းကိုလည်း စစ်ကြောင်းက ဖမ်းဆီး ခေါ်ဆောင်သွားတယ်လို့ သိရပါတယ်။
ဇူလိုင် ၂၈ ရက်နေ့ မနက်မှာ စစ်ကြောင်းက ဘိုကုန်းရွာ တောရဘုန်းကြီးကျောင်းထဲမှာ အထိုင်ချတပ်စွဲထားတယ်လို့ သိရပါတယ်။
စစ်ကြောင်းကြောင့် ကန့်ဘလူမြို့နယ် တောင်ဘက်ခြမ်းကျေးရွာ ၁၈ ရွာက ပြည်သူ သောင်းနဲ့ချီ စစ်ဘေးတိမ်းရှောင်နေကြရတယ်လို့ သိရပါတယ်။
