ချင်းပြည်နယ်၊ ဖလမ်းမြို့မှာ မြို့သိမ်းတိုက်ပွဲသတင်းကြောင့် ပြည်သူတချို့ မြို့ကိုစွန့်ခွာ ထွက်ပြေးနေကြပြီလို့ မြို့ခံတွေက ပြောပါတယ်။
ဇူလိုင်လအစောပိုင်းကနေ ဇူလိုင် ၂၅ ရက်နေ့အထိ မြို့ရဲ့ ၃ ပုံ ၁ ပုံနီးပါး၊ ပြည်သူ ၅,၀၀၀ လောက် တိမ်းရှောင်ခဲ့တယ်လို့ သိရပါတယ်။
CNO/CNDF ပြောရေးဆိုခွင့်ရှိသူ ဆလိုင်းတင်မီက “ကျနော်တို့ တရားဝင်စာထုတ်တာ ပြည်သူတွေကို ရှောင်းခိုင်းတာမရှိပါဘူး။ စစ်ရေးတင်းမာလာနိုင်တာမို့ အဆင်သင့်လုပ်ကြတာဖြစ်ပါလိမ့်မယ်။ မြို့ထဲမှာလူတွေရှိနေပါတယ်။ ပြည်သူတွေအဆင်သင့်ပြင်နေတာ ၂ ပတ် ၃ ပတ်ရှိပါပြီ” လို့ ပြောပါတယ်။
ဖလမ်းမြို့ခံပြည်သူတွေဟာ နီးစပ်ရာကျေးရွာ၊ ကလေးနယ်နဲ့ အိန္ဒိယနိုင်ငံ၊ မီဇိုရမ်ပြည်နယ်ဘက်ကို ပြောင်းရွှေ့သွားကြတာလို့ သိရပါတယ်။
ဖလမ်းမြို့ခံတယောက်က “ရှောင်တာက အခုရက်ပိုင်း စုစုပေါင်း ၅,၀၀၀ ကျော်ရှိပြီ။ မြို့ရဲ့ ၃ ပုံ တပုံလောက်ပေါ့။ ဖလမ်းနယ်ထဲရွာတွေနဲ့ မီဇိုဘက်ကိုသွားကြတယ်။ ကျန်တဲ့သူတွေကလည်း ပြောင်းဖို့ပြင်ဆင်နေတယ်။ ကလေးတွေ စာမေးပွဲဖြေနေတုန်းမို့လို့ စာမေးပွဲဖြေပြီးသွားရင် ပြောင်းတဲ့သူပိုများလာမယ်” လို့ ပြောပါတယ်။
ချင်းပြည်နယ်၊ ဖလမ်းမြို့နယ်ဟာ ချင်းအမျိုးသားကာကွယ်ရေးတပ် CNO/CNDF အခြေစိုက်ပြီး စစ်ရေးလှုပ်ရှားတဲ့မြို့ဖြစ်ပါတယ်။
