တနင်္သာရီတိုင်း၊ ရေဖြူမြို့နယ် မြို့မရဲစခန်းက ရဲ ၂ ဦးနဲ့ ထွေအုပ်ရုံးက အမျိုးသမီးတဦး ထွက်ပြေးသွားတဲ့အတွက် စစ်ကောင်စီတပ်သားတွေက အပူတပြင်းရှာဖွေနေပြီး မြို့တွင်းလုံခြုံရေးလည်း တင်းကျပ်ထားတယ်လို့ ဒေသခံတွေက ပြောပါတယ်။

ရေဖြူမြို့မရဲစခန်းက ရဲတပ်ကြပ်ကြီး သက်ပိုင်မှူး၊ တပ်ကြပ်ဇော်ထွေးနဲ့ အထွေထွေအုပ်ချုပ်ရေးဦးစီးဌာနက အငယ်တန်းစားရေးမသင်ဇာအောင်တို့ဟာ ဇူလိုင် ၁၈ ရက်က ထွက်ပြေးသွားခဲ့ပါတယ်။

ရဲ ၂ ဦး နဲ့ ထွေအုပ်ဝန်ထမ်းတဦးတို့ ထွက်ပြေးသွားတဲ့အတွက် စစ်ကောင်စီက မြို့တွင်းမြို့ပြင် လုံခြုံရေးကိုတင်းကျပ်ခဲ့သလို ရေဖြူ‌အခြေစိုက် စစ်ကောင်စီတပ်ရင်းတွေကလည်း ရှာဖွေတာတွေ လုပ်ဆောင်နေတယ်လို့ ဒေသခံတဦးက ပြောပါတယ်။

“စပြီးထွက်ပြေးကတည်းက သတင်းမပေါက်ကြားအောင် ကျိတ်ပြီးရှာနေကြတာ။ စစ်သားတွေကလည်း အနီးတဝိုက် လိုက်ရှာ‌တာတွေရှိသလို မြို့ဝင်မြို့ထွက်ကိုပိတ်ပြီး စစ်ဆေးတာတွေလည်း ရှိတယ်။ မြို့ထဲမှာသွားရင်တောင်ဘယ်ကို သွားမှာလဲ၊ ဘာလုပ်မှာလဲ မေးသလို မှတ်ပုံတင်တွေလည်း စစ်တယ်။ ရဲ ၂ ဦးနဲ့ ထွေအုပ်တယောက်ထွက်ပြေးပြီးကတည်းက နောက်ထပ်ဌာနဆိုင်ရာ ဝန်ထမ်းတွေ ထပ်ထွက်မပြေးအောင် မြို့ထဲမှာ လုံခြုံရေးတင်းကျပ်လိုက်တယ်။” 

ရေဖြူမြို့မရဲစခန်းက ရဲ ၂ ဦးနဲ့ ထွေအုပ်ရုံးမှ ဝန်ထမ်းတဦး ထွက်ပြေးသွားတဲ့အတွက် စစ်ကောင်စီက အပူတပြင်းလိုက်ရှာနေတယ်ဆိုတာပဲသိရပြီး လိုအပ်ရင်တော့ သက်ဆိုင်ရာ အဖွဲ့အစည်းတွေက ထုတ်ပြန်သွားမယ်လို့ ရေဖြူပြည်သူ့ကာကွယ်ရေးတပ်ဖွဲ့ (YPPDF) တာဝန်ခံက ပြောပါတယ်။

“ရဲ ၂ ဦးနဲ့ ထွေအုပ်ဝန်ထမ်းတဦးထွက်ပြေးသွားလို့ စစ်ကောင်စီတပ်ဖွဲ့တွေက လိုက်ရှာနေပါတယ်။ ကျန်တာတော့ လိုအပ်ရင် သက်ဆိုင်ရာအဖွဲ့အစည်းက ထုတ်ပြန်လိမ့်မယ်ထင်ပါတယ်ခံဗျာ။ ကျနော်တို့ကလဲ ပြောမိတာတွေက ပိုသွားတာမျိုးဆို အဆင်မပြေဘူး။ ရေဖြူအခြေစိုက်တပ်ရင်းတွေကတော့ အပူးတပြင်းရှာဖွေနေပါတယ်” လို့ ပြောပါတယ်။

ပြီးခဲ့တဲ့ ဇူလိုင် ၆ ရက်က ရေဖြူမြို့မရဲစခန်းမှ ရဲတပ်ကြပ်တဦးကို ရေဖြူမြို့နယ်အတွင်းမှာပဲ G3 ကျည်ဘောက်တခု၊ ဖုန်းတလုံး၊ ကွန်ပြူတာတလုံးနဲ့အတူ တော်လှန်ရေးတပ်ဖွဲ့ဝင်တွေက ဖမ်း‌ဆီးရမိခဲ့ပါတယ်။

ဇူလိုင် ၃ ရက်မှာလည်း ရေဖြူမြို့မရဲစခန်းကို တော်လှန်ရေးတပ်ဖွဲ့တွေက ပြောက်ကျားနည်းနဲ့ ဝင်ရောက်တိုက်ခိုက်ခဲ့တာကြောင့် စစ်ကောင်စီတပ်သား ၂ ဦး သေဆုံးခဲ့ပါတယ်။