တရုတ်နိုင်ငံရဲ့ စိုးရိမ်မှုအပေါ်မှာ အပစ်ရပ်ထားတဲ့ ကာလအတွင်း စစ်ကောင်စီက ထိုးစစ်ဆင်မယ်ဆိုရင်တော့ ခုခံတိုက်ခိုက်သွားမယ်လို့ TNLA က ပြောပါတယ်။
ရှမ်းပြည်နယ်မြောက်ပိုင်းမှာ TNLA နဲ့ MNDAA တပ်ဖွဲ့တွေဟာ ထိုးစစ်ဆင် တိုက်ခိုက်မှုတွေကို အခုလ ၁၄ ရက်ကနေ ၁၈ ရက်အထိ ၄ ရက်ကြာ အပစ်ရပ်မယ်လို့ ကြေညာထားပြီး စစ်ကောင်စီဘက်က ထိုးစစ်ဆင် တိုက်လာရင်တော့ ပြန်လည်ခုခံတိုက်ခိုက်မယ်လို့ TNLA သတင်းပြန်ကြားရေးဝာာဝန်ခံ လွေးယေဦးက ပြောပါတယ်။
“တရုတ်နိုင်ငံက ရှမ်းမြောက်မှာဖြစ်နေတဲ့ စစ်မီးတွေနဲ့ပတ်သက်ပြီး မြန်မာနိုင်ငံအတွက် စိုးရိမ်တယ် ဆိုတဲ့အပေါ်မှာ ကျမတို့က ပူးပေါင်းဆောင်ရွက်တာဖြစ်ပြီး အပစ်ရပ် ၄ ရက်တာ ကာလအတွင်း စစ်ကောင်စီဘက်က ထိုးစစ်ဆင်လာရင်တော့ မိမိကိုယ်မိမိ ခုခံပိုင်ခွင့်ရှိပါတယ်။”
တအာင်းတပ် (TNLA) နဲ့ ကိုးကန့်တပ် (MNDAA) တို့က အပစ်ရပ်ထားပေမဲ့ မနေ့ည ၉ နာရီဝန်းကျင်မှာ နောင်ချိုမြို့နယ် ဘန့်ဘွေးရွာမှာ တပ်စွဲထားတဲ့ စစ်ကောင်စီတပ်က သဲခေါ်ရွာအနီးရှိ PSLF/TNLA တပ်စခန်းကို ဒရုန်းနဲ့ တဖက်သတ် လာရောက်ဗုံးကြဲ တိုက်ခိုက်ခဲ့တယ်လို့ TNLA က ဒီနေ့မှာ ထုတ်ပြန်ထားပါတယ်။
အလားတူ ရေဝင်မှာ တပ်စွဲထားတဲ့ စစ်ကောင်စီတပ်က နောင်ချို သဲခေါ်ရွာအနီးရှိ PSLF/TNLA တပ်စခန်းကို ည ၁၀ ကျော်မှာ လက်နက်ကြီးနဲ့ ၃ ကြိမ် ပစ်ခတ်တိုက်ခိုက်ခဲ့တယ်လို့ သိရပါတယ်။
TNLA အနေနဲ့ ရှမ်းပြည်နယ်မြောက်ပိုင်းမှာပဲ အပစ်ရပ်ထားတာဖြစ်ပြီး မန္တလေးတိုင်းဘက်က စစ်ရေးအခြေအနေကတော့ အကျုံးမဝင်ဘူးလို့ လွေးယေဦးက ဆက်ပြောပါတယ်။
TNLA အနေနဲ့ ၁၀၂၇ အပိုင်း ၂ ကို ရှမ်းပြည်နယ်မြောက်ပိုင်းသာမက မန္တလေးတိုင်း၊ မတ္တရာ၊ မိုးကုတ်မြို့တို့မှာလည်း ထိုးစစ်ဆင်တိုက်ခိုက်နေပြီး မတ္တရာက တပ်စခန်းတွေ၊ နောင်ချိုမြို့၊ မိုးကုတ်အနောက်ခြမ်းတို့ကို မဟာမိတ်ပူးပေါင်းတပ်ဖွဲ့တွေနဲ့ ထိန်းချုပ်ထားနိုင်ပါတယ်။
