ပဲခူးတိုင်း၊ ရွှေကျင်မြို့နယ်မှာ PDF စစ်ဆေးရေးဂိတ်ကို စစ်တပ်က ဒရုန်းနဲ့ တိုက်ခိုက်ခဲ့တာကြောင့် အရပ်သားပြည်သူ ၆ ယောက်နဲ့ PDF ၁ ယောက် သေဆုံးခဲ့တယ်လို့ ဒေသခံတွေဆီက သိရပါတယ်။
ရွှေကျင်မြို့နယ်၊ ကောက်မဲ့သူကျေးရွာထိပ်က PDF စစ်ဆေးရေးဂိတ်နားကို စစ်ကောင်စီက ဇွန် ၂၈ ရက်နေ့ နေ့လယ် ၁၂ နာရီခွဲမှာ ဒရုန်းနဲ့ဗုံးသီး ၃ လုံးချ တိုက်ခိုက်ခဲ့ပြီး ဂိတ်ကိုဖြတ်သွားနေတဲ့ ရန်ကုန်မြို့က စက်ပြင်ဆရာ ကိုရဲနဲ့ ကိုကောင်းထက်ကျော်၊ သူတို့ကို လာခေါ်တဲ့ ကိုချစ်မင်းသူ၊ ကိုအောင်နိုင်ဌေး၊ စောသတော၊ စောကော်မူးသ တို့ ၆ ယောက် သေဆုံးခဲ့သလို PDF တပ်ဖွဲ့ဝင် ကိုဇော်လင်းကိုကိုလည်း သေဆုံးခဲ့ပါတယ်။
မိသားစုနဲ့နီးစပ်သူတယောက်က “ရန်ကုန်က စက်ပြင်ဆရာကိုရဲနဲ့ သူ့တပည့်က ကျောက်ကြီးမှာ စက်ပြင်ဖို့သွားကြတာ။ ကျောက်ကြီးကလူ ၄ ယောက်ကလည်း ဆိုင်ကယ်နဲ့သွားကြိုပြီး ပြန်လာရင်း ကောက်မဲ့သူရွာထိပ် ဂိတ်ရောက်တဲ့အချိန် စစ်တပ်ဒရုန်းနဲ့ ဗုံးကြဲချိန်နဲ့တိုးပြီး ၆ ယောက်လုံး သေသွားတာ။ ဂိတ်မှာစောင့်နေတဲ့ PDF တဦးလည်းသေပြီး တဦးက ဒဏ်ရာရတယ်” လို့ ပြောပါတယ်။
သေဆုံးခဲ့တဲ့ အရပ်သားပြည်သူ ၆ ဦးထဲက ကိုရဲနဲ့ ကိုကောင်းထက်ကျော်တို့ဟာ မြောက်ဥက္ကလာပမှာနေထိုင်ပြီး ကိုချစ်မင်းသူ၊ ကိုအောင်နိုင်ဌေး၊ စောသတော၊ စောကော်မူးသ တို့ကတော့ ကျောက်ကြီးမြို့နယ်၊ မေတ္တာရပ်ကွက်မှာ နေထိုင်ကြပါတယ်။
စစ်တပ်က ဒရုန်းနဲ့ ဗုံးကြဲတိုက်ခိုက်မှုကြောင့် သေဆုံးခဲ့တဲ့အရပ်သားပြည်သူ ၆ ယောက်ရဲ့ အလောင်းကို ဒေသတွင်း လူမှုကူညီရေးအဖွဲ့အစည်းတွေက ကျောက်ကြီးဆေးရုံကနေ နေအိမ်တွေကို ပို့ဆောင်ပေးခဲ့ပါတယ်။
ပြီးခဲ့တဲ့ ဇွန် ၁၃ ရက်နေ့ကလည်း ရွှေကျင်မြို့နယ်အတွင်း စစ်ကောင်စီရဲ့ လက်နက်ကြီး ပစ်ခတ်မှုတွေကြောင့် အရပ်သားပြည်သူ ၂ ယောက် သေဆုံးပြီး ၅ ယောက် ဒဏ်ရာရရှိခဲ့ပါတယ်။
