အင်ဒိုနီးရှားနိုင်ငံမှာ နိုင်ငံပိုင်စီးပွားရေးလုပ်ငန်းဝန်ကြီးဌာနက အလုပ်သမားတွေ တပတ်မှာ ၄ ရက်သာ အလုပ်လုပ်ရတဲ့ပုံစံကို စတင်စမ်းသပ်လုပ်ဆောင်ဖို့ ရှိနေပါတယ်။

အလုပ်ချိန်ကို စုစည်းတဲ့ ဒီအစီအစဥ်ဟာ ဒီအပတ်မှာ စတင်မှာဖြစ်ပြီး လာမယ့် ၂ လအထိ စမ်းသပ်ကာလအဖြစ် သတ်မှတ်ထားပါတယ်။

အစမ်းကာလမှာ ဝန်ကြီးဌာနရဲ့ အလုပ်သမားတွေဟာ တပတ်မှာ ၄ ရက်သာ အလုပ်ဆင်းရမှာ ဖြစ်ပါတယ်။ သူတို့ရဲ့ အလုပ်ချိန် ၄ ရက်မှာ အလုပ်ချိန် နာရီ ၄၀ အနည်းဆုံး ရှိရပါမယ်။

ဝန်ကြီးဌာန အတွင်းရေးမှူးရာဘင်က “အစမ်းကာလရဲ့ ရည်ရွယ်ချက်က ၄ ရက်အတွင်းမှာ အလုပ်သမားတွေရဲ့ ကုန်ထုတ်လုပ်မှု တိုးမြှင့်နိုင်မလားဆိုတာ ရှာဖွေဖို့ပါပဲ။ ၄ ရက် အလုပ်လုပ်တဲ့စနစ်မှာ အလုပ်သမားတွေကို စီမံခန့်ခွဲမှုနဲ့ ပတ်သက်ပြီး မန်နေဂျာတွေ အတွက်လည်း ထိရောက်မှုရှိမလားဆိုတာ ကြည့်ရမှာပါ။​ အလုပ်သမားတွေ အရမ်းပင်ပန်းကြလို့ သူတို့ရဲ့ အလုပ်လုပ်တဲ့အချိန်ကို ချိန်ညှိပေးဖို့ အခွင့်အရေးတွေ မန်နေဂျာက ဖန်တီးပေးရမှာပါ” လို့ ပြောပါတယ်။

ဝန်ကြီးဌာန အလုပ်သမားတွေဟာ ဖိအားအများအပြားနဲ့ ရင်ဆိုင်ရပြီး အလုပ်ချိန်ကို ချိန်ညှိပေးဖို့ လိုတယ်လို့ ဇန်နဝါရီလက ထုတ်ပြန်တဲ့ စစ်တမ်းတွေမှာ ဖော်ပြပါတယ်။​

နိုင်ငံရဲ့ လူငယ်မျိုးဆက် ၇၀ ရာခိုင်နှုန်းဟာ ကုန်ထုတ်လုပ်မှုတွေကြောင့် စိတ်ကျန်းမာရေး ပြဿနာတွေနဲ့ ရင်ဆိုင်နေရတာဖြစ်ပြး ဒီလို ၃ ရက် အနားပေးတာက သူတို့ကို ပျင်းရိစေမှာ မဟုတ်ဘူးလို့လည်း ယုံကြည်ထားကြပါတယ်။

အလုပ်လုပ်ရက် လျှော့ချပေးတာက ဖိအားတွေ လျှော့ကျစေခြင်း၊ စိတ်ကျန်းမာရေး တိုးတက်စေခြင်း​၊ အလုပ်နဲ့ပတ်သက်တဲ့ ကျေနပ်မှုတွေကို ဖြစ်ပေါ်စေကြောင်း အင်ဒိုနီးရှားတက္ကသိုလ်မှ ဒေါက်တာ ဆာကာပါနာမာက ဆိုပါတယ်။

နိုင်ငံပိုင်အလုပ်သမားဝန်ကြီးဌာနဟာ အင်ဒိုနီးရှားမှာရှိတဲ့ ဝန်ကြီးဌာန ၃၄ ခုအနက် အသေးဆုံးဝန်ကြီးဌာနဖြစ်ပြီး လူ ၄၀၀ နဲ့ ဒီစမ်းသပ်မှုကို စတင်မှာပါ။

တခြားဝန်ကြီးဌာနတွေရော ဒီလို အလုပ်ဆင်းတဲ့ရက်ကို ချုံ့ပစ်ဖို့ အစီအစဥ်ရှိလား ဆိုတာတော့ ရှင်းရှင်းလင်းလင်း မသိရသေးပါဘူး။

ကိုဗစ်-၁၉ ဖြစ်ပွားပြီးတဲ့နောက် နိုင်ငံအများစုနဲ့ ကုမ္ပဏီအများစုဟာ ၄ ရက် အလုပ်ဆင်းရတဲ့ ပုံစံကို အသုံးပြုလေ့ရှိပါတယ်။

Source-Reuters