ဘင်္ဂလားပင်လယ်အော်အနောက်တောင်ပိုင်းမှာ  မေ ၂၂ ရက်နေ့ လေဖိအား နည်းရပ်ဝန်း စတင်ဖြစ်ပေါ်လာနိုင်တယ်လို့ မိုးဇလဌာနက ထုတ်ပြန်ထားပါတယ်။

အဆိုပါ လေဖိအားနည်းရပ်ဝန်းဟာ ကနဦးမှာ မြောက်-အရှေ့မြောက်ဘက်သို့ ရွေ့လျားနိုင်ပြီး ပိုမိုအားကောင်းလာနိုင်ကာ မေ ၂၄ ရက်လောက်မှာ ဘင်္ဂလားပင်လယ်အော် အရှေ့အလယ်ပိုင်းမှာ မုန်တိုင်းငယ်အဖြစ်သို့ ရောက်ရှိလာနိုင်တယ်လို့ ခန့်မှန်းထားပါတယ်။

ဒီနောက် မြောက်-အနောက်မြောက်ဘက်သို့ ပြန်ကွေ့ကာ မေ ၂၆ ရက်လောက်မှာ  ဘင်္ဂလားဒေ့ရှ်နိုင်ငံ ကမ်းရိုးတန်းသို့ ဦးတည်ရွေ့လျားနိုင်တယ်လို့ DMH-WRF Model အရ ခန့်မှန်းတွက်ချက် ထုတ်ပြန်ထားတာပါ။

ဒါ့အပြင် အမေရိကန်နိုင်ငံ၊ National Hurricane Center မှ Global Forecasting Model (GFS) Data ရဲ့ တွက်ချက်ခန့်မှန်းချက်များအရတော့ မေ ၂၃ ရက်လောက်မှာ  ဘင်္ဂလားပင်လယ်အော်အနောက်တောင်ပိုင်းနဲ့  ယင်းနှင့်ဆက်စပ်တဲ့ ဘင်္ဂလားပင်လယ်အော်အနောက်အလယ်ပိုင်းမှာ လေဖိအားနည်းရပ်ဝန်း စတင်ဖြစ်ပေါ်လာနိုင်တယ်လို့ ခန့်မှန်းပါတယ်။

အဆိုပါလေဖိအားနည်းရပ်ဝန်းဟာ  ကနဦးမှာ မြောက်-အရှေ့မြောက်ဘက်သို့ ရွေ့လျားပြီးနောက် ပိုမိုအားကောင်းလာနိုင်ကာ မေ ၂၄ ရက်လောက်မှာ  ၂၄ ဘင်္ဂလားပင်လယ်အော်အလယ်ပိုင်းမှာ မုန်တိုင်းငယ်အဖြစ်သို့ ရောက်ရှိလာနိုင်တယ်လို့ဆိုပါတယ်။

အခုအချိန်မှာ လေဖိအားနည်းရပ်ဝန်း စတင်အစပျိုးခြင်းမရှိသေးလို့ သင်္ချာပုံစံပြုမော်ဒယ်တွေရဲ့ ခန့်မှန်းချက်တွေက တိုင်းထွာတဲ့အချိန်၊ အသုံးပြုတဲ့ Data တို့ အပေါ်မူတည်ပြီး အမျိုးမျိုးပြောင်းလဲနေတာ ဖြစ်ပါတယ်။

Photo Credit - မိုးဇလ