ရုရှားကဝယ်ယူလာတဲ့ Orion-2 UAV ဒရုန်းတွေကို စစ်ကောင်စီက စစ်ဆင်ရေးနယ်မြေတွေဆီ မေ ၉ ရက်က စတင်ဖြန့်ဝေခဲ့တယ်လို့ တပ်တွင်းသတင်းရင်းမြစ်တွေဆီက သိရပါတယ်။
ရုရှားနိုင်ငံကနေ Orion-2 UAV ဒရုန်းတွေကို စစ်ကောင်စီတပ် ပစ္စည်းဝယ်ယူရေး ညွှန်ကြားရေးမှူး ဗိုလ်ချုပ်ခင်မောင်သန်းနဲ့ အဖွဲ့က မေ ၁ ရက်က စတင် သွားရောက်ဝယ်ယူခဲ့တာလို့ စစ်ဘက်နဲ့နီးစပ်သူတဦးက ပြောပါတယ်။
“ဗိုလ်ချုပ်ကြီးမိုးအောင်က ၂၄ ရက်မှာ ရုရှားသွားတယ်။ သူသွားနေတဲ့အချိန်မှာပဲ လေကြောင်းရန်မှာ ဒရုန်းသင်တန်းတွေ ပေးတယ်။ သူပြန်လာတော့ ဗိုလ်ချုပ်ခင်မောင်သန်းတို့ တခေါက်ထပ်သွားပြီး ဒရုန်းတွေရော ဒရုန်းဂန်းတွေရော သွားဝယ်တာ အစင်းရေဘယ်လောက်ဝယ်လာလဲတော့ မသိဘူး။”
ရုရှားကနေ ဗိုလ်ချုပ်ခင်မောင်သန်းနဲ့အဖွဲ့ မေ ၅ ရက်မှာ ပြန်ရောက်ပြီး ကက(လေ)ရုံးချုပ်မှာ ဒုစစ်ခေါင်းဆောင်က အစည်းအဝေးပြုလုပ်ပြီး စစ်လက်နက်ပစ္စည်း ညွှန်ကြားရေးမှူး ဗိုလ်ချုပ်ဝင်းလွင်မှတဆင့် စစ်ဆင်ရေးနယ်မြေတွေကို ပို့ဆောင်ခဲ့တာဖြစ်တယ်လို့ ကက(လေ)နဲ့ နီးစပ်သူတဦးက ပြောပါတယ်။
ရုရှားကို ဧပြီ ၄ ရက်မှ ဧပြီ ၂၄ ရက်အတွင်း ဗိုလ်ချုပ်ကြီးမိုးအောင်နဲ့ ဒုဗိုလ်ချုပ်ကြီးကျော်စွာလင်းတို့ သွားရောက်ပြီးနောက် မေလအစောပိုင်းမှာ ဝယ်ယူခဲ့တာ ဖြစ်ပါတယ်။
တပ်တွင်းသတင်းရင်းမြစ်တွေရဲ့ ပြောဆိုချက်အရ ရုရှား၊ တရုတ်၊ အိန္ဒိယနိုင်ငံတွေက စစ်ကောင်စီက အရာရှိစစ်သည်တွေကို ဒရုန်းနဲ့ပတ်သက်ပြီး သင်တန်းတွေပေးနေတယ်လို့ သိရပေမဲ့ DVB အနေနဲ့ သီးခြားအတည်နိုင်တာ မရှိသေးပါဘူး။
ပြီးခဲ့တဲ့ ဧပြီလကုန်ပိုင်းမှာ စစ်ကောင်စီက တရုတ်နိုင်ငံထုတ် CH-4UAV ဒရုန်းတွေကို ဝယ်ယူခဲ့ပြီး မြဝတီတိုက်ပွဲမှာ စတင်အသုံးပြုခဲ့တာ ဖြစ်ပါတယ်။
