စစ်ကောင်စီက စစ်မှုထမ်းအပတ်စဥ် ၂ ကို ထပ်မံခေါ်ယူနေပေမဲ့ လူအစားထိုးပြဿနာတွေ ရှိနေတာကြောင့် သင်တန်းဖွင့်ဖို့ ပြန်လည်စိစစ်နေရတယ်လို့ စစ်မှုထမ်းဆင့်ခေါ်ရေးအဖွဲ့တွေနဲ့ နီးစပ်သူတွေဆီက သိရပါတယ်။
ရန်ကုန်၊ နေပြည်တော်၊ မန္တလေး အပါအဝင် သင်တန်းကျောင်း ၁၅ ကျောင်းမှာ မတ် ၂၉ ရက်က စတင်ကာ စစ်မှုထမ်းအပတ်စဥ် ၁ အတွက် သင်တန်းသားတွေ ပို့ဆောင်ခဲ့ရာမှာ လူအစားထိုးပြဿနာတွေရှိခဲ့တယ်လို့ စစ်မှုထမ်းဆင့်ခေါ်ရေးအဖွဲ့နဲ့ နီးစပ်သူတဦးက ပြောပါ တယ်။
"တချို့သင်တန်းကျောင်းတွေမှာ နာမည်နဲ့လူက မတူဘူး ဖြစ်နေတယ်။ ပြောရရင် အလှည့်ကျော်လိုက်တာပေါ့။ စစ်အုပ်ချုပ်ရေးအားကောင်းတဲ့ ရန်ကုန်၊ နေပြည်တော်နဲ့ မန္တလေးမှာ အဲဒီပြဿနာတွေပိုများတယ်။ အပတ်စဥ် ၂ မှာ အဲဒီလိုပြဿနာတွေ မဖြစ်အောင် စိစစ်နေတာကြောင့် အပတ်စဥ် ၂ ကို မခေါ်သေးတာ။”
စစ်တပ်က အရာရှိသားသမီးတွေ၊ လုပ်ငန်းရှင်သားသမီးတွေရဲ့ နာမည်နဲ့ လူစားထိုး သင်တန်းတက်ရောက်သူတွေကို မှတ်တမ်းရေးသွင်းမှ သိရပြီး အောက်ခြေအုပ်ချုပ်ရေး အဖွဲ့အစည်းတွေကို ညွှန်ကြားစာ ပို့ပေးထားတယ်လို့ သင်တန်းကျောင်းနဲ့ နီးစပ်သူတဦးက ပြောပါတယ်။
“အခုပြဿနာက နေပြည်တော်မှာ အများဆုံးဖြစ်တာ။ ရန်ကုန်ရော၊ မန္တလေးရော သင်တန်းသားက ကိုယ်ရေးရာဇဝင်ဖြည့်တော့ သေချာမဖြေနိုင်ဘူး။ စုံစမ်းကြည့်တော့ လူစားထိုးပြီးတက်တာတွေ့ရလို့ အပတ်စဥ် ၂ ခေါ်ဖို့ ကြာနေတာ။”
လူစားထိုးပြဿနာတွေရှိနေပေမဲ့ သင်တန်းတက်ရောက်တဲ့ သင်တန်းသား အမည်အရင်းနဲ့သာ စစ်မှုထမ်းလက်မှတ် ပေးသွားမှာဖြစ်ပြီး အစားထိုးတက်ရောက်အမည်ကို အသုံးပြုခွင့်ပေးမှာ မဟုတ်ဘူးလို့လည်း သတင်းအရင်းအမြစ်က ဆက်ရှင်းပြပါတယ်။
ဒါ့အပြင် စစ်ကောင်စီက ငွေကြေးဘတ်ဂျက်နဲ့ ကုန်ကျစရိတ်၊ သင်တန်းနေရာတွေကြောင့် တလတကြိမ် စစ်မှုထမ်းသင်တန်းကို ပေးနိုင်မှာမဟုတ်ဘူးလို့ သုံးသပ်ပြောဆိုနေကြပါတယ်။
စစ်ကိုင်းတိုင်း ကလေးခရိုင်မှာ မေ ၁ ရက်က စစ်မှုထမ်းအပတ်စဥ် ၂ အတွက် လူငယ်ဦးရေ ၂၀၀ ကို အမှတ် ၁၀ တန်းမြင့်သင်တန်းကျောင်းကို ပို့ခဲ့ပြီး ဒီနေ့ ဆေးစစ်ဆေးတာ မရှိဘဲ ကနဦး စစ်ဆေးမှုတွေသာ လုပ်ဆောင်ခဲ့တယ်လို့ သိရပါတယ်။
စစ်ကောင်စီက ပြီးခဲ့တဲ့ အပတ်စဥ် ၁ မှာ လူဦးရေ ၅၀၀၀ နီးပါးကို ပြည်နယ်နဲ့ တိုင်းဒေသကြီးတွေမှာရှိတဲ့ စစ်အခြေခံသင်တန်းကျောင်း ၇ ကျောင်းနဲ့ တန်းမြင့်သင်တန်းကျောင်း ၈ ကျောင်းမှာ သင်တန်းပေးခဲ့တာ ဖြစ်ပါတယ်။
