ပဲခူးတိုင်း၊ ဖြူးမြို့နယ်၊ ရန်ကုန်-မန္တလေး ရထားလမ်းပိုင်းမှာ မေ ၁ ရက်က ရထားသံလမ်း မိုင်းခွဲခံရပြီး ကုန်ရထားတစင်း လမ်းချော်တိမ်းမှောက်ခဲ့တာကြောင့် ရထားခရီးစဉ်တွေကို ယာယီဖျက်သိမ်းခဲ့ကြောင်း မြန်မာ့မီးရထား(ရန်ကုန်)ရုံးက သိရပါတယ်။
“ရထားလမ်းက ကုန်ရထားမလာခင်တည်းက မိုင်းခွဲခံထားရတာ။ ရထားဖြတ်သန်းသွားချိန် လမ်းတွေက ကျိုးပဲ့ထားတော့ အခုလို လမ်းချော်ပြီး တိမ်းမှောက်တာပါ။”
ရထားသံလမ်း မိုင်းခွဲခံရမှုကြောင့် သံလမ်းပေါ်ရှိ ကွန်ကရစ်ဇလီဖားတုံး ၄၂ တုံး၊ သံလမ်းပေ ၁၁၀ ခန့် ပျက်စီးခဲ့ကာ ရထားခရီးစဉ် ဖျက်သိမ်းခဲ့တာကြောင့် ခရီးသည်တွေအနေနဲ့ လမ်းခရီး နှောင့်နှေးကြန့်ကြာမှု အခက်အခဲတွေနဲ့ ကြုံတွေ့ခဲ့ရတယ်လို့ ရထားစီးခရီးသည်တွေဆီက သိရပါတယ်။
ရထားသံလမ်းကို ဘယ်အဖွဲ့က မိုင်းခွဲခဲ့တယ်ဆိုတာ မသိရသေးဘဲ ရထားလမ်းပိုင်း ပျက်စီးမှုကြောင့် ရန်ကုန်က ထွက်ခွာလာပြီး ခရီးသည် ၂၈၈ ဦး လိုက်ပါလာတဲ့ အမှတ် ၁၁ အဆန် လူစီးအမြန်ရထားမှာ ကျောက်တန်းဘူတာကို ရောက်ရှိပြီးနောက် ရန်ကုန်ဘက်ကိုလည်းကောင်း၊ မန္တလေးက ထွက်ခွာလာပြီး ခရီးသည် ၁၇၄ ဦး လိုက်ပါလာတဲ့ အမှတ် ၁၂ အစုန် လူစီးအမြန်ရထားမှာ မြစ်သားကို ရောက်ရှိပြီးနောက် မန္တလေးဘက်ကိုလည်းကောင်း ပြန်လည်ထွက်ခွာခဲ့ရကာ ခရီးစဉ်ကို ယာယီဖျက်သိမ်းခဲ့ကြောင်း မြန်မာ့မီးရထားဌာန မှတ်တမ်းတွေအရ သိရပါတယ်။
