သြစတြေးလျနိုင်ငံ ဆစ်ဒနီမှာ ခရစ်ယာန်ဘုန်တော်ကြီးတပါး ဓားထိုးခံရမှုနဲ့ ပတ်သက်တဲ့ ပုံရိပ်နဲ့ မှတ်ချက်တွေကို X လူမှုကွန်ရက်မှာ ဖျောက်ပေးဖို့ ဩစတြေးလျတရားရုံးတရုံးက ညွှန်ကြားခဲ့အပြီးမှာ X လူမှုကွန်ရက်ပိုင်ရှင် အီလွန်မတ်စ်ခ်နဲ့ ဩစတြေးလျဝန်ကြီးချုပ် အန်တိုနီ အယ်လ်ဘန်နိစ်တို့ကြားက စကားလုံးစစ်ပွဲ ပြင်းထန်လာခဲ့ပါတယ်။

အဆီးရီးယန်း ချာ့ချ်က ဘုန်းတော်ကြီးဟာ အစ္စလာမ်ဘာသာကို စော်ကားတယ်ဆိုပြီးတော့ အသက် ၁၆ နှစ်အရွယ် လူငယ်တဦးက အော်ဟစ်ပြီး ဓားနဲ့ဝင်ထိုးတဲ့ ဗီဒီယိုဖိုင် အပါအဝင် အဲဒီဖြစ်စဉ်နဲ့ ပတ်သက်တဲ့ မှတ်ချက်တွေကို ပိတ်ပေးဖို့ ဩစတြေးလျ ဖက်ဒရယ်တရားရုံးက နှစ်ရက်တားမြစ်မိန့် ထုတ်ခဲ့တာ ဖြစ်ပါတယ်။

ဒါပေမဲ့ X က ဩစတြေးလျနိုင်ငံတွင်းမှာပဲ ပိတ်ပေးခဲ့ပြီး တကမ္ဘာလုံး အတိုင်းအတာနဲ့ ပိတ်ပေးဖို့ ငြင်းခဲ့တာပါ။

“အင်း၊ ဒီလူက မောက်မာတယ်၊ သူက အမေရိကန်က ဘီလျံနာဆိုတော့ ဩစတြေးလျဥပဒေ အထက်မှာ ရှိမယ်လို့ ထင်နေတာ။ သူ့ပလက်ဖောင်းမှာ အကြမ်းဖက်တဲ့ ဗီဒီယိုတွေ ပြသခွင့်အတွက် တိုက်ပွဲဝင်နေတာလေ” လို့ ဝန်ကြီးချုပ် အယ်လ်ဘန်နိစ်က ဝေဖန်ခဲ့ပါတယ်။

Facebook လို တခြား လူမှုကွန်ရက်တွေက လိုက်နာခဲ့ပေမဲ့ X က မလိုက်နာခဲ့တဲ့အပြင် X ဟာ လွတ်လပ်စွာ ရေးသားထုတ်ဖော်ခွင့်နဲ့ အမှန်တရားဘက်က ရပ်တည်တယ်လို့ပါ မတ်စ်ခ်က X မှာ ရေးသားခဲ့ပြီး ဝန်ကြီးချုပ်ကိုပါ လှောင်ပြောင်ခဲ့တာ ဖြစ်ပါတယ်။

“ဒါက ဆင်ဆာလုပ်တာ မဟုတ်ဘူးဗျ။ ဒါက ပုံမှန်သိတာ၊ လူလိုနားလည်တာမျိုးဗျ။ အီလွန်မတ်စ်ခ်မှာလည်း ဒါမျိုးရှိသင့်တယ် ထင်တာပဲ” လို့ ဝန်ကြီးချုပ်က တုံံ့ပြန်ခဲ့ပါတယ်။

Source/Photo-Reuters