လူမျိုးရေးပဋိပက္ခတွေ လနဲ့ချီ ဖြစ်ပွားနေတဲ့ အိန္ဒိယနိုင်ငံရဲ့ အရှေ့မြောက်ပိုင်းပြည်နယ် မဏိပူရမှာ အကြမ်းဖက်မှုတွေနဲ့ မဲပေးစက်တွေ ပျက်စီးခဲ့တာကြောင့် ဧပြီ ၂၂ ရက်မှာ မဲရုံ ၁၁ ရုံမှာ ရွေးကောက်ပွဲ ပြန်ကျင်းပမယ်လို့ တာဝန်ရှိသူတွေက ကြေညာပါတယ်။
မဲမသမာမှုတွေ ရှိခဲ့တာကြောင့် မဏိပူရက မဲရုံ ၄၇ ရုံမှာ ရွေးကောက်ပွဲ ပြန်ကျင်းပဖို့ အတိုက်အခံ ကွန်ဂရက်ပါတီက တောင်းဆိုထားပေမဲ့ ၁၁ ရုံမှာပဲ ပြန်ကျင်းပမှာ ဖြစ်ပါတယ်။
လူဦးရေ သန်း ၁၀၀၀ နီးပါး မဲပေးပိုင်ခွင့်ရှိတဲ့ ကမ္ဘာ့အကြီးဆုံး ရွေးကောက်ပွဲကို ပြီးခဲ့တဲ့ သောကြာနေ့ကစပြီး ၄၄ ရက်ကြာ ကျင်းပနေတာဖြစ်ပါတယ်။
ဇွန် ၁ ရက်အထိ ကျင်းပမဲ့ ရွေးကောက်ပွဲမှာ ဝန်ကြီးချုပ် နာရိန္ဒြာမိုဒီဦးဆောင်တဲ့ လက်ရှိအာဏာရ ဘီဂျေပီ ပါတီပဲ ထပ်အနိုင်ရသွားမယ်လို့ ခန့်မှန်းထားကြပါတယ်။
မဏိပူရပြည်နယ်မှာ ရွေးကောက်ပွဲ ကျင်းပတဲ့ သောကြာနေ့က လက်နက်ကိုင်အုပ်စုတွေအကြား ပဋိပက္ခတွေဖြစ်ပွားခဲ့ပြီး လုံခြုံရေး တင်းကျပ်ထားတဲ့ကြားက မဲရုံတွေကို ဝင်သိမ်းဖို့ ကြိုးစားမှုတွေ ရှိခဲ့ပါတယ်။
မဏိပူရမှာ လူများစု မေတီ မျိုးနွယ်တွေနဲ့ တောင်တန်းဒေသနေ ကူကီး-ဇို တိုင်းရင်းသားတွေကြား ယမန်နှစ် မေလကတည်းက ပဋိပက္ခတွေ ပြင်းထန်နေခဲ့တာဖြစ်ပါတယ်။
Source/Photo - REUTERS/Stringer
