နေပြည်တော်ကောင်စီနယ်မြေ၊ လယ်ဝေးမြို့နယ်၊ အေလာလေတပ်စခန်း ရှော့တိုက်ဒုံးနဲ့ အပစ်ခံရပြီးနောက် ထပ်မံရှာဖွေရာ မပေါက်သေးတဲ့ ရှော့တိုက်ဒုံးတွေ့ပြီး လုံခြုံရေးအပြည့် ချထားရတယ်လို့ အေလာလေတပ်စခန်းနဲ့ နီးစပ်သူတွေဆီက သိရပါတယ်။
အေလာလေတပ်စခန်းကို တော်လှန်ရေးတပ်ဖွဲ့တွေက ဒီနေ့ ဧပြီ ၁၁ ရက် မနက် ၅ နာရီကျော်က ရှော့တိုက်ဒုံးနဲ့ ၃ ကြိမ် ပစ်ခတ်ခဲ့တာဖြစ်ပြီး ထိခိုက်ပျက်စီးမှုတချို့ရှိပေမဲ့ ထိခိုက်ဒဏ်ရာရသူ မရှိဘူးလို့ သတင်းရင်းမြစ်က DVB ကို ပြောပါတယ်။
“ရှော့တိုက်ဒုံးနဲ့ အပစ်ခံရတာ မှန်တယ်။ အဆောက်အဦတချို့ ထိပြီး ပျက်စီးတာရှိတယ်။ လူထိတာတော့ မကြားဘူး။ လှုပ်ရှားတပ်တွေ လိုက်ရှာတော့ အေလာကျေးရွာနားက လယ်ကွက်တခုမှာ မပေါက်သေးတဲ့ ရှော့တိုက်ဒုံး ၃ လုံး တွေ့တယ်။”
အေလာလေတပ်စခန်းနဲ့ အေလာအခြေစိုက် ခမရ ၃၀၂ တပ်ရင်းနဲ့ စကခ ၆ မှ အရာရှိ၊ စစ်သည်တွေနဲ့ အေလာလေဆိပ်ကို လုံခြုံရေးတိုးမြှင့်ထားတယ်လို့ မြို့ခံတဦးက DVB ကို ပြောပါတယ်။
“အေလာလေတပ်စခန်း ရှော့တိုက်ဒုံးနဲ့ အပစ်ခံရတာ၊ စစ်တပ် သေမသေတော့ မသိဘူး၊ စခက ၆ ရော ခမရ ၃၀၂ ရော ခရိုင်ရဲတွေရော လေဆိပ်မှာရော လယ်ဝေးခရိုင်မှာရော လူစုထားတယ်။”
ပြီးခဲ့တဲ့ ဧပြီ ၄ ရက်ကလည်း နေပြည်တော်စစ်ရုံးချုပ်နဲ့ အေလာလေတပ်စခန်းကို ပြည်သူ့ကာကွယ်ရေးတပ်တွေက ဒရုန်းအစီး ၃၀ နီးပါးနဲ့ တိုက်ခိုက်ခဲ့ပါတယ်။
ဒါ့အပြင် ဧပြီ ၃ ရက် နေ့လယ် ၁ နာရီခွဲက နေပြည်တော် တပ်ကုန်းမြို့မရဲစခန်း ဗုံးနဲ့ပစ်ခတ်ခံရပြီး ထိခိုက်ဒဏ်ရာရသူတွေလည်း ရှိပါတယ်။
၂၀၂၄ ခုနှစ် နေပြည်တော်သင်္ကြန်အတွက် စစ်ခေါင်းဆောင်က ကိုရီးယား Kpop အဖွဲ့နဲ့ ရုရှားအဆိုတော်တွေ ငှားရမ်းထားပြီး လတ်တလောမှာ ကိုရီးယား Kpop အဖွဲ့လည်း ရောက်ရှိနေတဲ့အတွက် လုံခြုံရေးကို တိုးမြှင့်ထားပါတယ်။
