ကရင်ပြည်နယ်၊ မြဝတီမြို့စောင့်တပ်ရင်း ခလရ ၂၇၅ စခန်းကို သိမ်းယူနိုင်ဖို့  ကရင်အမျိုးသားလွတ်မြောက်ရေးတပ်မတော် (KNLA)နဲ့ ပူးပေါင်းတပ်တွေက တိုက်ခိုက်နေရာမှာ တိုက်ပွဲ ပြင်းထန်ဖြစ်ပွားနေတယ်လို့  ကရင်တပ်ဖွဲ့တွေနဲ့နီးစပ်တဲ့ သတင်းရင်းမြစ်ကနေ သိရပါတယ်။

မြဝတီမှာ တခုတည်းကျန်ရှိတဲ့ ခလရ ၂၇၅ စစ်ကောင်စီတပ်စခန်း လက်နက်ချဖို့  ၃ ရက်တိတိ ညှိနှိုင်းဆွေးနွေးမှုတွေ  အောင်မြင်မှုမရရှိတဲ့အတွက် KNLA ပူးပေါင်းတပ်ဖွဲ့တွေက ဧပြီ ၉ ရက် မနေ့ မွန်းလွဲပိုင်းစတင်ပြီး  လက်နက်ကြီးတွေနဲ့ ပစ်ခတ်တိုက်ခိုက်ခဲ့ပါတယ်။

အနီးကပ် စခန်းသိမ်းတိုက်ပွဲကိုတော့ ဒီနေ့မနက် စတင်တိုက်ခိုက်ရာမှာ  KNLA ပူးပေါင်းတပ်ဖွဲ့တွေ  ၂၇၅ စခန်းအနီးဆုံးရောက်ရှိနေပြီး စစ်ကောင်စီဘက်ကလည်း လေယာဉ်နဲ့ ပစ်ကူပေးနေတယ်လို့ သိရပါတယ်။

မြန်မာပြည်ဘက်က ဖြစ်ပွားနေတဲ့တိုက်ပွဲတွေကို  သောင်ရင်းမြစ် တဖက်ကမ်း ထိုင်းနိုင်ငံဘက်ကနေ လှမ်းမြင်နေရတယ်လို့ မဲဆောက်မြို့မှာ နေထိုင်သူ တဦးက ပြောပါတယ်။

တိုက်ပွဲကြောင့် မြဝတီမြို့ခံတချို့ ထိုင်းနိုင်ငံ၊ မဲဆောက်မြို့ဘက်ကို ယာယီရွှေ့ပြောင်းနေထိုင်နေကြပြီး နှစ်နိုင်ငံနယ်စပ် ချစ်ကြည်ရေးတံတားတွေကိုလည်း ဆက်လက်ဖွင့်လှစ်ထားပါတယ်။