မန္တလေးတိုင်းဒေသကြီး၊ အောင်မြေသာစံမြို့နယ်၊ ၂၂ လမ်းနဲ့ ၈၉ လမ်းထောင့်ရှိ “လင်းလက်ဝါ”ရွှေပန်းထိမ်ဆိုင်ကို ရဲယူနီဖောင်းဝတ်ပြီး ခြိမ်းခြောက်လုယက်ခဲ့တဲ့ အမျိုးသား ၄ ဦးအပါအဝင် အပေါင်းအပါ ၇ ဦးကို ဖမ်းဆီးမိခဲ့ပြီလို့ သိရပါတယ်။

ပြီးခဲ့တဲ့ မတ် ၂၈ ရက် ညနေ ၅ နာရီ ၁၀ မိနစ်က Mark II အဖြူရောင်မော်တော် ယာဉ်တစီးနဲ့ "လင်းလက်ဝါ" ရွှေပန်းထိမ်လုပ်ငန်းနေအိမ်ကို ရဲယူနီဖောင်းဝတ် အမျိုးသား ၄ ဦးရောက်ရှိလာပြီး ဧည့်စာရင်းစစ်ဖို့နဲ့ လူစာရင်းစစ်ဆေးဖို့ရှိကြောင်း ပြောဆိုခြိမ်းခြောက်ကာ ရွှေထည်ပစ္စည်းမျိုးစုံ အလေးချိန် နှစ်ပိဿာခွဲခန့် (ကာလတန်ဖိုးငွေကျပ်သိန်း ၁ သောင်းကျော်) လုယက်ယူဆောင်သွားခဲ့တယ်လို့ ကာယကံရှင် မိသားစုဝင်နဲ့နီးစပ်သူတဦးက ပြောပါတယ်။

"အဓိက ဆိုင်ဝန်ထမ်း(ပန်းထိမ်ဆရာ) ကိုနိုင်က ဓားပြဝင်တိုက်ဖို့အတွက် လက်ထောက်ချခဲ့တာပါ။ ပန်းထိမ်ဆရာနဲ့ ဓားပြခေါင်းဆောင်ကို ချိတ်ဆက်ပေးတဲ့ ကိုလှိုင်ကြီးကိုလည်း ဖမ်းမိတာပါ။ မနေ့က မိတာဆိုတော့ ၁၂ ရက်ကြာသွားတာပေါ့။" 

အောင်မြေသာစံမြို့နယ်၊ အမှတ် ၅ မြို့မရဲစခန်းက တရားခံတေါ ဖမ်းဆီးရမိနိုင်ရေးအတွက် လုယက်မှု ရာဇသတ်ကြီး ပုဒ်မ ၃၉၄၊ အားပေးကူညီမှု ပုဒ်မ ၁၁၄ နဲ့ အမှုရေးဖွင့်ဆောင်ရွက်ခဲ့ရာ ဧပြီ ၇ ရက်၊ ၈ ရက်နဲ့ ၉ ရက်နေ့တွေမှာ လုယက်မှုကျူးလွန်ခဲ့သူတွေကို ဖမ်းဆီးရမိခဲ့ကြောင်း ရဲစခန်းမှတ်တမ်းတွေအရ သိရပါတယ်။

ရွှေပန်းထိမ်ဆိုင်အား ဓားပြတိုက်လုယက်ခဲ့သူတွေဖြစ်တဲ့ မြတ်သူအောင်၊ စိုးမိုးဦး၊ ညီထူးအောင်(ခ)ညီညီ၊ မျိုးကို(ခ)မျိုးကိုကို(ခ)အားကွေ့၊ မင်းမင်းစိုး (ခ) တုတ်ကြီး၊ ကိုကိုနိုင်(ခ)ကိုနိုင်နဲ့ ထက်လှိုင်(ခ)ကိုလှိုင်ကြီးတို့ ၇ ဦးကို ပြစ်မှုဖြစ်ပွားပြီး ၁၂ ရက်အတွင်း ဖော်ထုတ်ဖမ်းဆီးရမိခဲ့​တယ်လို့ ရဲစခန်းနဲ့နီးစပ်သူတဦးက ပြောပါတယ်။

ဒါ့အပြင် သက်သေခံရွှေထည် ပစ္စည်းတွေနဲ့ ပြစ်မှုကျူးလွန်ရာမှာ အသုံးပြုခဲ့တဲ့ Mark II 99 အဖြူရောင်မော်တော်ယာဉ် ၁ စီး၊ ပစ္စတိုသေနတ် ၁ လက်တို့ကိုလည်း သိမ်းဆည်းရမိခဲ့ပြီး ပြစ်မှုကျူးလွန်သူ ၇ ဦးကို ဥပဒေနဲ့အညီ ထိရောက်စွာ အရေးယူဆောင်ရွက်နိုင်ဖို့ ဆက်လက်ဆောင်ရွက်နေကြောင်း သိရပါတယ်။