မြောက်ကိုရီးယားနိုင်ငံဟာ တာလတ်မှ တာဝေးပစ် လောင်စာခဲသုံး အသံထက်မြန်တဲ့ ဒုံးကျည်အသစ်ကို အောင်မြင်စွာ စမ်းသပ်ပစ်ခတ်ခဲ့ကြောင်း အစိုးရပိုင်ရုပ်မြင်သံကြား KRT က ဧပြီ ၃ ရက်မှာ ပြောပါတယ်။
ဒုံးကျည်ပစ်လွှတ်မှုကို ကြီးကြပ်နေတဲ့ နိုင်ငံခေါင်းဆောင် ကင်မ်ဂျုံအန်းရဲ့ ဗီဒီယိုဖိုင်ကို KRT က ထုတ်ပြန်ခဲ့ပြီး မြောက်ကိုရီးယားရဲ့ ကာကွယ်ရေးနည်းပညာ “အကြွင်းမဲ့သာလွန်မှု” ကို ပြသတဲ့ ဗျူဟာမြောက်လက်နက်ဆိုပြီး ဂုဏ်တင်ပြောဆိုခဲ့ပါတယ်။
မြောက်ကိုရီးယားဟာ အကွာအဝေးမျိုးစုံရှိ နည်းဗျူဟာကျကျ၊ စစ်ဆင်ရေးလုပ်ဆောင်နိုင်ပြီး ဗျူဟာမြောက်အဆင့်ရှိတဲ့ ဒုံးကျည်တွေ အားလုံးကို လောင်စာခဲသုံး၊ ထိပ်ဖူးထိန်းချုပ်မှုနဲ့ နျူးကလီးယား စွမ်းဆောင်ရည်ပိုင်းအထိ အပြည့်အဝ ပြောင်းလဲလိုက်နိုင်ပြီလို့ ကင်မ်ဂျုံအန်းက ပြောသွားကြောင်းလည်း နိုင်ငံပိုင်မီဒီယာက ထုတ်ပြန်ပါတယ်။
မြောက်ကိုရီးယားက ဧပြီ ၂ ရက်မှာ တာလတ်ပစ် ပဲ့ထိန်းဒုံးကျည်လို့ သံသယရှိတဲ့ ဒုံးကျည်တစင်းကို စမ်းသပ်ပစ်လွှတ်ခဲ့ပြီး ဒီပစ်လွှတ်မှုကို တောင်ကိုရီးယား၊ ဂျပန်နဲ့ အမေရိကန်တို့က ချက်ချင်းလိုလို ရှုတ်ချခဲ့ကြပါတယ်။
Source/Photo-Reuters
