အမေရိကန် တယ်လီကွန်းကုမ္ပဏီ AT&T ဟာ သုံးစွဲဖို့ အထူးဆော့ဖ်ဝဲလ်လိုအပ်တဲ့ အင်တာနက်ကွန်ရက် "dark web" မှာ လွန်ခဲ့တဲ့ သီတင်းပတ် နှစ်ပတ်လောက်က ထုတ်ပြန်ခဲ့တဲ့ သတင်းအချက်အလက်အစုံကို စုံစမ်းစစ်ဆေးနေတယ်လို့ မတ် ၃၀ ရက်မှာ ပြောပါတယ်။
သူ့ရဲ့ ပဏာမခွဲခြမ်းစိတ်ဖြာမှုအရ ပေါက်ကြားသွားတဲ့ သတင်းအချက်အလက်တွေဟာ လက်ရှိအကောင့်ရှိသူ ၇ ဒသမ ၆သန်းနဲ့ တခြားအကောင့်ပေါင်း ၆၅ ဒသမ ၄ သန်းအပေါ် သက်ရောက်မှုရှိတယ်လို့ တယ်လီကွန်းကုမ္ပဏီ AT&T က ပြောပါတယ်။
ပေါက်ကြားခဲ့တဲ့ ဒေတာတွေဟာ ၂၀၁၉ ဒါမှမဟုတ် အစောပိုင်းက အချက်အလက်တွေ ဖြစ်ပုံပေါ်တယ်လို့လည်း ကုမ္ပဏီက ပြောပါတယ်။
AT&T ဟာ ဒီအဖြစ်အပျက်ကြောင့် ထွက်လာတဲ့ ရလဒ်တွေထဲမှာ သူ့စနစ်တွေထဲကို ခွင့်ပြုချက်မရှိဘဲ ဝင်ထားတဲ့ အထောက်အထားတွေတော့ မရှိဘူးလို့ပြောပါတယ်။
ဒီသတင်းအချက်အလက်တွေက AT&T ကနေ စထွက်လာတာလား ဒါမှမဟုတ် သူ့ဖောက်သည်တွေထဲက တယောက်ယောက်ဆီကနေ ဖြစ်တာလားဆိုတာ မသိရသေးဘူးလို့ ကုမ္ပဏီကပြောပါတယ်။
ဒီဖြစ်ရပ်ဟာ သူ့ကုမ္ပဏီရဲ့ လုပ်ငန်းဆောင်တာတွေအပေါ် အကျိုးသက်ရောက်မှုမရှိဘဲ၊ သတင်းအချက်အလက် အရင်းအမြစ်ကို အကဲဖြတ်နေတုန်းပဲလို့ AT&Tက ပြောပါတယ်။
AT&Tဟာ ထိခိုက်ခံရသူ အားလုံးနဲ့ ဆက်သွယ်နေပြီး လက်ရှိသုံးစွဲသူ ၇ ဒသမ၆ သန်းအတွက် လျှို့ဝှက်ကုဒ်တွေကို ပြန်သတ်မှတ် ပေးထားပါတယ်။
သက်ဆိုင်တဲ့ နေရာတိုင်းမှာလည်း ခရက်ဒစ် စောင့်ကြပ်ကြည့်ရှုဖို့ ကမ်းလှမ်းမယ်လို့ ပြောပါတယ်။
ကြိုးမဲ့အင်တာနက် ဝန်ဆောင်မှုပေးသူ AT&Tရဲ့ 5G ကွန်ရက်ဟာ အမေရိကန်ပြည်ထောင်စု တဝန်းက လူသန်းပေါင်း ၂၉၀ လောက်ကို လွှမ်းခြုံထားပါတယ်။
Source/Photo - Reuters
