မင်းတပ်တွင် လေပြင်းကြောင့် အဆောက်အအုံ ၂၀၀ နီးပါး ပျက်စီး
DVB
·
March 22, 2024
ချင်းပြည်နယ်၊ မင်းတပ်မြို့နယ်မှာ မတ် ၂၁ ရက် ညနေ ၆ နာရီကစပြီး ည ၁၁ နာရီအထိ မိုးရွာသွန်းပြီး လေပြင်းတိုက်ခတ်တာကြောင့် ဘုရားကျောင်းနဲ့ ဘုန်းကြီးကျောင်း အပါအဝင် အဆောက်အအုံ ၂၀၀ နီးပါး ထိခိုက်ပျက်စီးခဲ့တယ်လို့ ဒေသခံတွေက ပြောပါတယ်။
မင်းတပ်မြို့ပေါ်ရပ်ကွက်တွေအပြင် ကျေးရွာတွေပါ လေပြင်းဒဏ်ခံခဲ့ရပြီး အဆောက်အအုံ ၂၀၀ နီးပါး ပျက်စီးခဲ့တယ်လို့ သိရပါတယ်။
မင်းတပ်မြို့ခံတဦးက “ညနေပိုင်းလောက်ကတည်းက မိုးဖွဲဖွကျတယ်၊ ၆ နာရီလောက်ကျ မိုးကသည်းလာတယ်၊ လေတိုက်တာလည်း တော်တော်လေးကြမ်းတယ်၊ ကျေးရွာတွေမှာလည်း အပျက်အစီးတော့ များတယ်၊ တမြို့နယ်လုံးပဲ၊ အနည်းနဲ့ အများပဲ” လို့ ပြောပါတယ်။
ဘုန်းကြီးကျောင်း၊ ဘုရားကျောင်း၊ စာသင်ကျောင်းနဲ့ လူနေအဆောက်အအုံတွေပါ ပျက်စီးခဲ့ပြီး နှစ်ရှည် ထင်းရှူးပင်တွေပါ လဲကျကုန်တယ်လို့ မင်းတပ်မြို့ခံတွေက ပြောပါတယ်။
