ချင်းမိုင်ဟာ ကမ္ဘာမှာ လေထုအညစ်ညမ်းဆုံးမြို့ ဖြစ်နေပြီး မီးခိုးမြူတွေ လွှမ်းနေပေမဲ့ ခရီးသွားလုပ်ငန်းကို ထိခိုက်နိုင်တာကြောင့် ဘေးသင့်ဒေသအဖြစ် ကြေညာသွားမှာ မဟုတ်ဘူးလို့ ထိုင်းဝန်ကြီးချုပ် ဆေထာ ထဝီးဆင်က  X လူမှုကွန်ရက်မှာ ရေးသားခဲ့တယ်လို့ ဘန်ကောက်ပို့စ်သတင်းစာက ဖော်ပြပါတယ်။

သက်ဆိုင်ရာ အေဂျင်စီတွေနဲ့ သေချာတိုင်ပင်ပြီးမှ အခုလိုဆုံးဖြတ်တာဖြစ်ကြောင်း၊ ဘေးသင့်ဒေသ ကြေညာလိုက်ရင် ကိုဗစ်-၁၉ ကနေ ပြန်နာလန်ထူကာစ ခရီးသွားလုပ်ငန်းကို ထိခိုက်သွားမှာဖြစ်ကြောင်း ဝန်ကြီးချုပ်က တုံ့ပြန်ခဲ့ပါတယ်။

ကမ္ဘာလှည့်ခရီးသွားတွေ ဝယ်ထားတဲ့ ခရီးသွားကျန်းမာရေး အာမခံဟာ ဘေးသင့်ဒေသနဲ့ အရေးပေါ်ဒေသတွေမှာ မလွှမ်းခြုံဘူးဆိုတဲ့ အချက်ကို ဝန်ကြီးချုပ်က ထောက်ပြပါတယ်။

“ချင်းမိုင်ခရိုင်ဟာ ကာလတိုနဲ့ ကာလရှည်နေဖို့ စီစဉ်ထားတဲ့ ကမ္ဘာလှည့်ခရီးသွားတွေကို ဆုံးရှုံးရပါလိမ့်မယ်။ ကျနော်တို့စိတ်ပူတာ အဲဒီအချက်ပါပဲ” လို့ ဝန်ကြီးချုပ် ဆေထာက X လူမှုကွန်ရက်မှာ ရေးသားထားပါတယ်။

IQAir ရဲ့ အချက်အလက်တွေအရ ချင်းမိုင်ဟာ ဝန်ကြီးချုပ် ပို့စ်တင်တဲ့အချိန် မတ် ၁၇ ရက် ညနေ ၄ နာရီ ၄ မိနစ်မှာ ကမ္ဘာ့လေထုအညစ်ညမ်းဆုံး နေရာအဖြစ် ထိပ်ဆုံးရောက်ခဲ့ပြီး ညနေ ၄ နာရီခွဲမှာတော့ ဒုတိယနေရာ ပြန်ရောက်သွားခဲ့ပါတယ်။

X လူမှုကွန်ရက်မှာ မှတ်ချက်ပေးသူတွေကတော့ ဝန်ကြီးချုပ်အနေနဲ့ ခရီးသွားလုပ်ငန်းထက် ချင်းမိုင်မှာနေတဲ့ ပြည်သူတွေရဲ့ ကျန်းမာရေးကို ပိုအာရုံစိုက်သင့်တယ်လို့ ဝေဖန်နေကြပါတယ်။

ချင်းမိုင်ခရိုင်မှာ မီးခိုးမြူတွေ ဆိုင်းနေခဲ့တာ ရက်အတန်ကြာရှိပြီဖြစ်ပြီး ပုံမှန်အားဖြင့် မြို့ကနေ လှမ်းမြင်ရတဲ့ ဒွိုင်ဆူထေ့ တောင်ကြီးကိုတောင် မမြင်ရလောက်အောင် မီးခိုးမြူတွေ ဆိုင်းနေတာ ဖြစ်ပါတယ်။

Source/Photo-REUTERS/Stringer