ကွင်းလယ်ကစားသမားဖိုဒမ်ဟာ ပရီးမီးယားလိဂ်ရဲ့ အကောင်းဆုံးကစားသမား ဖြစ်လာပြီလို့ မန်စီးတီး နည်းပြဂွါဒီယိုလာက ချီးကျူးပြောသွားပါတယ်။

မတ်လ ၃ ရက် မနေ့ည ကစားခဲ့တဲ့ မန်ချက်စတာဒါဘီမှာ ဖိုဒမ်က ခြေစွမ်းပြပြီး ချေပဂိုးနဲ့ အနိုင်ဂိုးတွေ သွင်းယူနိုင်ခဲ့တာပါ။

ပွဲအပြီးမှာတော့ ဖိုဒမ်ရဲ့ခြေစွမ်းဟာ ကမ္ဘာ့အဆင့်ဖြစ်လာပြီး ပရီးမီးယားလိဂ်ရဲ့ အကောင်းဆုံးကစားသမား ဖြစ်လာပြီလို့ ဂွါဒီယိုလာက ချီးကျူးသွားတာပါ။

ဂွါဒီယိုလာက “တခြားထူးချွန်တဲ့ ကစားသမားတွေအားလုံးကို လေးစားမှုရှိပေမဲ့ ဖိုဒမ်က တရာသီအတွင်း အကောင်းဆုံး ကစားသမားပါပဲ။ ဘယ်ကစားသမားကမှ ကျနော်တို့ အသင်းအတွက် သူ့လောက် အဆုံးအဖြတ် ကစားသမားမဖြစ်ဘူး”လို့ ပြောပါတယ်။

ဖိုဒမ်ဟာ သူ့အသက်အရွယ်နဲ့ အောင်မြင်မှုအရ ဂန္ထဝင်ကစားသမားဖြစ်နေပြီးသား ဖြစ်ကြောင်းလည်း ဂွါဒီယိုလာက ချီးကျူးပါတယ်။

ဖိုဒမ်ကတော့ ကမ္ဘာ့အဆင့်ကစားသမား ဖြစ်လာဖို့ ပွဲကြီးပွဲကောင်းတွေမှာ ခြေစွမ်းသနိုင်ဖို့ လိုသေးကြောင်း မန်ယူနဲ့ ပွဲမတိုင်ခင် အင်တာဗျူးမှာ ပြောခဲ့ဖူးပါတယ်။ 

Photo-Reuters/Lee Smith