မကွေးတိုင်း၊ ရေစကြိုမြို့၊ နံ့သာဟေဝန်ပန်းခြံထဲက စစ်ကောင်စီတပ် လက်အောက်ခံ ရဲတပ်ကြပ်တယောက် ဖေဖော်ဝါရီ ၂၉ ရက်က လက်နက်နဲ့တကွ ရေစကြိုမြို့နယ် ပြည်သူ့ကာကွယ်ရေးတပ်ဖွဲ့ထံ အလင်းဝင်ခဲ့တယ်လို့ ရေစကြိုမြို့နယ်ပကဖကနေ သိရပါတယ်။
ရေစကြိုမြို့နယ် ပကဖ သတင်းပြန်ကြားရေးတာဝန်ခံက “မနေ့ညနေ ၄ နာရီလောက်က စပြီး ဆက်သွယ်လာတာ၊ ၅ နာရီလောက်မှာ ကျနော်တို့ရဲဘော်တွေက ဘေးကင်းကင်းနဲ့ သွားခေါ်နိုင်ခဲ့တယ်။ ညတွင်းချင်း ခေါ်လိုက်တာပါ။ သူ့မှာ ကာဘိုင်သေနတ်တလက်နဲ့ ကျည် ၁၀၀ ပါပါတယ်” လို့ ပြောပါတယ်။
ရေစကြိုပကဖထံကို လက်နက်နဲ့တကွ အလင်းဝင်လာသူကို လုံခြုံတဲ့နေရာမှာ ထားပေးထားပြီး သူ့ဆန္ဒအတိုင်း ဆောင်ရွက်ပေးသွားမယ်လို့ သိရပါတယ်။
လက်နက်နဲ့တကွ အလင်းဝင်လာသူ ရဲတပ်ကြပ်ကို ရေစကြိုမြို့နယ်ပကဖက ဆုကြေးပေးဖို့ စီစဥ်နေပြီး ရေစကြိုမြို့ပေါ်မှာတော့ စစ်ကောင်စီတပ်က မတ်လ ၁ ရက် မနက်ပိုင်းမှာ စစ်ဆေးနေတာတွေ ရှိတဲ့အပြင် စစ်မှုထမ်းဥပဒေနဲ့ပတ်သက်ပြီး လက်ကမ်းစာစောင် ဝေတာတွေလည်း ရှိနေတယ်လို့ သိရပါတယ်။
