စစ်ခေါင်းဆောင်ရဲ့ ညွှန်ကြားချက်နဲ့ စစ်တပ်ပိုင် ချည်မျှင်နှင့်အထည်ချုပ်စက်ရုံတွေမှာ စစ်ယူနီဖောင်းဝတ်စုံတွေကို ဖေဖော်ဝါရီ ၁၆ ရက်ကစတင်ကာ အများအပြား အရေးပေါ် ချုပ်ပေးနေရတယ်လို့ စက်ရုံနဲ့နီးစပ်သူတွေဆီက သိရပါတယ်။
ပြည်သူ့စစ်မှုထမ်းဥပဒေ အသက်ဝင်လာပြီးနောက် လှိုင်မြို့နယ် ချည်မျှင်နှင့်အထည်ချုပ်စက်ရုံ(သမိုင်း)မှာ စစ်ယူနီဖောင်းတွေကို အများအပြား ချုပ်နေရတာ ဖြစ်တယ်လို့ အထည်ချုပ်စက်ရုံ ဝန်ထမ်းတဦးက ပြောပါတယ်။
“သင်တန်းတက်ဝတ်စုံတွေ ချုပ်နေရတာ ၄ လပိုင်း အလုပ်မပိတ်ခင် ချုပ်ပေးရမှာ၊ သင်တန်းသားတွေအတွက် အထည်ချုပ်အရေအတွက်က များတယ်။ စက်ရုံတခုနဲ့တခု မတူဘူး။”
လှိုင်သာယာမြို့နယ်ရှိ စစ်တပ်ပိုင် ချည်မျှင်နှင့်အထည်ချုပ်စက်ရုံမှာလည်း စစ်သင်တန်းအတွက် ယူနီဖောင်းတွေကို ဖေဖော်ဝါရီ ၁၂ ရက်ကစတင်ကာ အထည်အရေအတွက် တသောင်းနီးပါး ချုပ်နေရတယ်လို့ စက်ရုံဝန်ထမ်းတဦးက ပြောပါတယ်။
“အရင်ကတည်းက စစ်ဝတ်စုံတွေ ချုပ်နေတာ၊ ဒါပေမဲ့ အခုဟာက အရေးပေါ်ချုပ်ပေးရတာ၊ ၄ လပိုင်းမကုန်ခင် ရအောင်ပေးရမှာ၊ တသောင်းနီးပါးလောက်ရှိမယ်။”
ပဲခူးမြို့နယ်ရှိ နယ်မြေခံတပ်ရင်းအတွင်းက ချည်မျှင်နှင့်အထည်ချုပ်စက်ရုံမှာလည်း ပြည်သူ့စစ်ယူနီဖောင်းနဲ့ စစ်မှုထမ်းယူနီဖောင်း နှစ်မျိုးလုံးကို ချုပ်နေရတာဖြစ်တယ်လို စက်ရုံဝန်ထမ်းတဦးက ဒီဗွီဘီကို ပြောပါတယ်။
“ပျဥ်ပုံကြီးမှာက ဖွင့်တာ ၂ နှစ်ပဲရှိသေးတယ်။ ၂၀၂၂ ကမှ စဖွင့်တာ။ တပ်မိသားစုတွေပဲ အလုပ်ရတာ။ ပြည်သူ့စစ်ယူနီဖောင်းတွေ ချုပ်ရတာ၊ အခုစစ်သင်တန်းအတွက် ယူနီဖောင်းတွေ ထပ်ချုပ်ရတာ။”
စစ်ခေါင်းဆောင်က ဖေဖော်ဝါရီ ၁၀ ရက်မှာ ပြည်သူ့စစ်မှုထမ်းဥပဒေ အာဏာတည်ကြောင်း အမိန့်ထုတ်ပြီးနောက် စစ်တပ်ပိုင် ချည်မျှင်နှင့်အထည်ချုပ်စက်ရုံတွေကို စစ်ယူနီဖောင်းတွေ အစုံ ၁၄၀,၀၀၀ ချုပ်ဖို့အတွက် ကက(ကြည်း)ရုံးက စာပေးပို့ခဲ့တာ ဖြစ်ပါတယ်။
