ဘဏ္ဍာရေးအချက်အချာ ဟောင်ကောင်ကျွန်းမှာ ငွေကြေးခဝါချမှုထဲ အကြီးမားဆုံးဖြစ်တဲ့ ဒေါ်လာ ၁ ဒသမ ၈ ဘီလီယံ ငွေကြေးခဝါချမှုမှာ ပါဝင်နေတယ်လို့ သံသယရှိသူ ၇ ဦးကို ဖမ်းဆီးခဲ့ကြောင်း ဖေဖော်ဝါရီ ၁၆ ရက်နေ့မှာ ဟောင်ကောင်အာဏာပိုင်တွေက ပြောပါတယ်။

ဒီနှစ် ဇန်နဝါရီ ၁၃ ရက်မှာ ဟောင်ကောင် အကောက်ခွန်က ‘Daybreak’ လို့ အမည်ပေးထားတဲ့ စစ်ဆင်ရေးကို စတင်ခဲ့ပြီး နိုင်ငံတကာ ကုန်သွယ်ရေး လှုပ်ရှားမှုတွေကနေ ဟောင်ကောင်ဒေါ်လာ ၁၄ ဘီလီယံ (ဒေါ်လာ ၁ ဒသမ ၈ ဘီလီယံ) လောက် ခဝါချခဲ့တဲ့ နိုင်ငံဖြတ်ကျော် ငွေကြေးခဝါချမှု အဖွဲ့ကြီးကို ဖြိုခွင်းခဲ့တယ်လို့ ဆိုပါတယ်။

“ဒါဟာ ညစ်ညမ်းတဲ့ ငွေကြေးပမာဏနဲ့ ပတ်သက်ပြီး ဟောင်ကောင် အကောက်ခွန်က ဒီနေ့အထိ တွေ့ရှိခဲ့တဲ့ အကြီးဆုံး ငွေကြေးခဝါချမှု ကိစ္စပါ” လို့ ဟောင်ကောင် အကောက်ခွန်နဲ့ အခွန်ဦးစီးဌာနမှ ဌာနခွဲမှူး ဆမ်ယူ ယုဝင်းက ပြောပါတယ်။

အသက် ၂၃ နှစ်မှ ၇၄ နှစ်ကြား အမျိုးသား ၅ ဦးနဲ့ အမျိုးသမီး ၂ ဦးပါဝင်တဲ့ လူ ၇ ဦးဖြစ်ပြီး သူတို့ထဲက တဦးဟာ ဒီအစီအစဉ်ရဲ့ စီမံကြိုးကိုင်သူဖြစ်တယ်လို့ အကောက်ခွန် အာဏာပိုင်တွေက ပြောပါတယ်။

သူတို့တွေဟာ ဘာနိုင်ငံသား၊ ဘာလူမျိုးတွေ ဆိုတာ ထုတ်ဖော်ပြောဆိုခြင်း မရှိပေမဲ့ သူတို့ ၇ ဦးလုံးဟာ ဟောင်ကောင်မှာ နေထိုင်သူတွေဖြစ်ကြောင်း ပြောကြားခဲ့ပါတယ်။

သူတို့ရဲ့အစီအစဥ်မှာ အိန္ဒိယက မိုဘိုင်းအက်ပလီကေးရှင်းကနေ အွန်လိုင်း လိမ်လည်လှည့်ဖြားမှုတွေနဲ့ တခြားကုန်ပစ္စည်းတွေကြားထဲမှာ လျှပ်စစ်ပစ္စည်းတွေ၊ စိန်တွေ အပါအဝင် ရှားပါးကျောက်မျက်ရတနာတွေ ရောင်းချမှုတွေ ပါဝင်တယ်လို့ အာဏာပိုင်တွေက ပြောပါတယ်။

အဲဒီအစီအစဉ်ဟာ ငွေကြေးခဝါချဖို့အတွက် အယောင်ပြထားတဲ့ အခွံသက်သက် ကုမ္ပဏီတွေနဲ့ ဘဏ်စာရင်းအများအပြားကို အသုံးပြုခဲ့တယ်လို့ စွပ်စွဲခံထားရပြီး တရက်အတွင်း အပ်ငွေ အခု ၅၀ ကျော် ရရှိတဲ့ ဘဏ်အကောင့်တခုလည်း ရှိတယ်လို့ ဆိုပါတယ်။

အဲဒီကုမ္ပဏီ အတော်များများဟာ သူတို့ရဲ့ အဓိကလုပ်ငန်းတွေကို သွင်းကုန်၊ ပို့ကုန် ကုန်သွယ်မှုအဖြစ် အခိုင်အမာ ပြထားကြပြီး အမျိုးမျိုးသော ကုန်ပစ္စည်းတွေကို တင်သွင်း၊ တင်ပို့တယ်လို့ ဆိုကြပါတယ်။

အာဏာပိုင်တွေက ဘဏ်တွေကို နာမည်မထုတ်ဖော်ထားပါဘူး။ သူတို့ ၇ စလုံးကို စုံစမ်းစစ်ဆေးမှုတွေ ဆက်လက်လုပ်ဆောင်နေချိန်မှာ အာမခံနဲ့ လွတ်မြောက်လာခဲ့ပြီး အာဏာပိုင်တွေဟာ သူတို့ကို နောက်ထပ်ဖမ်းဆီးနိုင်ခြေ ရှိ မရှိကို ရှင်းလင်းပြောကြားခြင်း မရှိပါဘူး။

Source/Photo-Reuters