မြောက်ကိုရီးယားခေါင်းဆောင် ကင်မ်ဂျုံအန်းဟာ ဖေဖော်ဝါရီ ၁၄ ရက်က မြေပြင်ကနေ ပင်လယ်ပြင်ဆီ ပစ်ခတ်နိုင်တဲ့ ဒုံးကျည်အသစ် စမ်းသပ်မှုကို ကြီးကြပ်ခဲ့ပြီး အဓိက ခဲယမ်းတွေထုတ်လုပ်တဲ့ စက်ရုံဆီ သွားရောက်လည်ပတ်ခဲ့ပါတယ်။

လက်နက်တွေထုတ်လုပ်မှု မြှင့်တင်ဖို့လည်း သူက ဆော်ဩခဲ့တယ်လို့ နိုင်ငံပိုင်မီဒီယာက ဖေဖော်ဝါရီ ၁၅ ရက်မှာ ထုတ်ပြန်ခဲ့ပါတယ်။

မြောက်ကိုရီးယားဟာ သူ့နိုင်ငံ အရှေ့ဘက်ကမ်းရိုးတန်းမှာ ဖေဖော်ဝါရီ ၁၄ ရက်က ခရုဇ်ဒုံးကျည် အများအပြားကို ပစ်လွှတ်ခဲ့တယ်လို့ တောင်ကိုရီးယားစစ်တပ်က ပြောခဲ့တာပါ။

ဧပြီလမှာကျင်းပမယ့် တောင်ကိုရီးယား အထွေထွေရွေးကောက်ပွဲ မတိုင်မီ သီတင်းပတ်တွေ အတွင်း မြောက်ကိုရီးယားက နောက်ဆုံးအကြိမ် စမ်းသပ်မှုအများအပြား လုပ်ခဲ့ပါတယ်။

အစိုးရပိုင် ရုပ်မြင်သံကြား KRT က ထုတ်လွှင့်တဲ့ ဓာတ်ပုံတွေထဲမှာ ပင်လယ်လင်းယုန်လို့ အဓိပ္ပာယ်ရတဲ့ ပါဒါစူရီ ဆစ်ခ် လို့ခေါ်တဲ့ ဒုံးကျည်သစ်က ပင်လယ်ပြင်ပေါ် ပျံသန်းရင်း ပစ်မှတ်ကို ထိမှန်တာကို ကင်မ်ဂျုံအန်းက ကြည့်နေပုံကို ပြသခဲ့ပါတယ်။

ကင်မ်ဂျုံအန်းဟာ မြောက်ပိုင်းကန့်သတ်မျဉ်း (Northern Limit Line- NLL) ဒေသအတွင်း ကိုရီးယားကျွန်းဆွယ် အနောက်ဘက်ရေပြင်နဲ့ ယွန်ဖြောင်းကျွန်းမြောက်ဘက် ရေပြင်တို့မှာ စစ်ရေးပြင်ဆင်မှု အားကောင်းစေဖို့ အမိန့်ပေးခဲ့တယ်လို့လည်း KRT က ပြောပါတယ်။ ကင်မ်ဟာ “အဓိက” ခဲယမ်းစက်ရုံကို စစ်ဆေးပြီး ထုတ်လုပ်မှုခေတ်မီရေး အသေးစိတ် လေ့လာခဲ့တယ်လို့ KCNA သတင်းဌာနက ပြောခဲ့ပါတယ်။

ကင်မ်က အရာရှိတွေနဲ့အတူ စက်ရုံကို လာရောက်လည်ပတ်တဲ့ ဓာတ်ပုံတွေကို ထုတ်ပြန်ရာမှာ အရာရှိတချို့ရဲ့ မျက်နှာတွေကိုလည်း ဖုံးကွယ်ဖို့ မှုန်ဝါးအောင် လုပ်ထားခဲ့ပါတယ်။

မြောက်ကိုရီးယားဟာ ရုရှားနဲ့ လက်နက်ကုန်သွယ်နေတယ်လို့ အမေရိကန်နဲ့ မဟာမိတ်တွေက စွပ်စွဲနေချိန်မှာ ကင်မ်ဂျုံအန်းက ခဲယမ်းစက်ရုံဆီ လည်ပတ်ခဲ့တာပါ။

မကြာသေးမီက ရုရှားဟာ မြောက်ကိုရီးယားက ပေးပို့တဲ့ တာတိုပစ် ပဲ့ထိန်းဒုံးကျည် (SRBMs) တွေကို သုံးပြီး ယူကရိန်းကို တိုက်ခိုက်ခဲ့တယ်လို့ အမျိုးအစားခွဲခြားထားတဲ့ ထောက်လှမ်းရေး အချက်အလက်အသစ်ကို ကိုးကားပြီး အမေရိကန် သမ္မတအိမ်ဖြူတော်က ပြီးခဲ့တဲ့လက ပြောခဲ့ပါတယ်။

Source/Photo-Reuters