ရခိုင်ပြည်နယ်၊ ကျောက်တော်မြို့နယ်၊ အပေါက်ဝရွာအနီးမှာ ဖေဖော်ဝါရီ ၇ ရက်နဲ့ ၈ ရက်နေ့တွေက တိုက်ပွဲတွေအတွင်း   စစ်ကောင်စီရဲ့ စစ်သင်္ဘော ၂ စီး၊ ဇက်ရေယာဉ် ၁ စီးတို့ကို  တိုက်ခိုက်ခဲ့ပြီး ၃ စီးလုံး နစ်မြုပ်သွားခဲ့တယ်လို့ ရက္ခိုင့်တပ်တော် (အေအေ) ဓာတ်ပုံတွေနဲ့တကွ ဖေဖေါ်ဝါရီ ၁၁ ရက်မှာ ထုတ်ပြန်ပါတယ်။

ရေထဲမြုပ်သွားတဲ့ သင်္ဘောတွေကို  ကယ်တင်ဖို့ လာရောက်တဲ့ စစ်ကောင်စီရဲ့  စစ်သင်္ဘော ၄ စီးကိုလည်း အနား မကပ်နိုင်အောင် တိုက်ခိုက်နိုင်ခဲ့တယ်လို့ အေအေက ဆိုပါတယ်။

ရေကြောင်းတိုက်ပွဲအတွင်း စစ်ကောင်စီတပ်က  လေကြောင်းကနေ ရဟတ်ယာဉ်၊ Drop ဗုံးတွေနဲ့ မရပ်မနား တောက်လျှောက်တိုက်ခိုက်နေတဲ့ ကြားကနေ  စစ်သင်္ဘောတွေကို အပြတ်အသတ် တိုက်ခိုက်နိုင်ခဲ့တယ်လို့ ထုတ်ပြန်ထားပါတယ်။

သင်္ဘောတွေ နစ်မြုပ်ကာနီးမှာ လက်နက်ချ အညံ့ခံဖို့ အလံဖြုထောင်ဖို့ ၃ ကြိမ်တိုင် ပြောခဲ့ပေမဲ့ တန်ပြန်ခုခံ တိုက်ခိုက်နေတဲ့အပြင် လေကြောင်းကနေ  Drop ဗုံးတွေနဲ့ အပြင်းအထန် ခုခံကာကွယ်နေတာကြောင့် သင်္ဘော ၃ စီးပေါ်မှာ  လိုက်ပါလာသောသူတွေ အသက်ချမ်းသာရာရရှိမယ့် နောက်ဆုံး အခွင့်အရေး ထပ်ပေးတဲ့အချိန်မှာလည်း   Drop ဗုံးတွေနဲ့ စုပြုံပစ်ခတ် လာရောက်တိုက်ခိုက်နေခဲ့တယ်လို့ အေအေကဘက် ဆိုပါတယ်။

အဲဒီတိုက်ပွဲမှာ အေအေဘက်က တပ်ဖွဲ့ဝင် ၁၀ ယောက်ကျော် ထိခိုက်ဒဏ်ရာရခဲ့ပြီး ကျဆုံးသူတချို့လည်း ရှိခဲ့ကာ အသက်မသေဘဲ ရေကူး လွတ်မြောက်လာသူတွေကို ကယ်တင်ထားနိုင်ခဲ့တယ်လို့ အေအေ ထုတ်ပြန်ချက်မှာ ရေးသားထားပါတယ်။

နစ်မြုပ်သွားတဲ့  စစ်သင်္ဘော ၃ စင်းပေါ်က စစ်ကောင်စီတပ်ဖွဲ့ဝင်တွေ ဘယ်လောက် သေဆုံးသွားသလဲဆိုတာကိုတော့ အေအေဘက်က ထုတ်ပြန်တာ မရှိသေးပါဘူး။ 

Photo-AA