ကွင်းလယ်လူ တွန်မီနေးဟာ ဂိုးတွေအများကြီးသွင်းယူနိုင်သူဖြစ်ကြောင်း မန်ချက်စတာယူနိုက်တက်အသင်း နည်းပြ အဲရစ်တန်ဟတ်ဂ်က ချီးကျူးသွားပါတယ်။

စကော့တလန် ကွင်းလယ်ကစားသမားဟာ မနေ့ညက ကစားခဲ့တဲ့ အက်စ်တွန်ဗီလာနဲ့ ပွဲစဉ်မှာ လူစားဝင်ကစားပြီး အနိုင်ဂိုး သွင်းပေးခဲ့တာပါ။

ဒီရာသီ လိဂ်သွင်းဂိုး ၇ ဂိုးမြောက် သွင်းယူနိုင်ခဲ့တာဖြစ်ပြီး အသင်းရဲ့ ဂိုးသွင်းအများဆုံး ကစားသမားလည်း ဖြစ်ပါတယ်။

တွန်မီနေးဟာ ဂိုးတွေအများကြီး သွင်းယူနိုင်သူဖြစ်ပြီး လူစားဝင်ကစားတိုင်း နေရာစုံကနေ ဂိုးတွေသွင်းယူလေ့ရှိကြောင်း၊ ဂိုးရဖို့လိုအပ်နေချိန်မှာ တွန်မီနေးကို ပြိုင်ဘက်ဧရိယာ အတွင်းမှာ ထားကစားစေတာက အကျိုးရှိကြောင်း နည်းပြတန်ဟတ်ဂ်က ချီးကျူးပါတယ်။

မန်ယူအသင်းဟာ ဗီလာအသင်းကို အနိုင်ရခဲ့တာကြောင့် အဆင့်လေးနေရာက စပါးအသင်းနဲ့ ၆ မှတ်သာ ကွာဟတော့ပြီး ဥရောပချန်ပီယံလိဂ်ဝင်ခွင့် ရရှိဖို့ မျှော်လင့်ချက် ကောင်းမွန်လာခဲ့ပါတယ်။

Photo-Reuters