ချင်းပြည်နယ်နဲ့ ချင်းအမျိုးသားတွေ နေထိုင်တဲ့ဒေသတွေမှာ စစ်ကောင်စီတပ်နဲ့ ချင်းဒေသ ကာကွယ်ရေးတပ်ဖွဲ့တွေရဲ့ တိုက်ပွဲတွေအကြား ချင်းအမျိုးသား ၁၄၄ ယောက်ကျော် လူသားဒိုင်းအဖြစ် ဖမ်းဆီးခံခဲ့ရပြီး ၉ ယောက်ကတော့ သတ်ဖြတ် ခံခဲ့ရတယ်လို့ ချင်းရေးရာအဖွဲ့ချုပ် ICA ရဲ့ အစီရင်ခံစာက ဆိုပါတယ်။

ဖေဖော်ဝါရီလ ၁ ရက်နေ့ထုတ်ပြန်တဲ့ အစီရင်ခံစာမှာ ဖော်ပြထားတာဖြစ်ပြီး စစ်ကောင်စီ တပ်သားတွေဟာ ထိုးစစ်ဆင်ရာမှာ လမ်းပြအနေနဲ့သော်လည်းကောင်း၊ တန်ဆာခံ အနေနဲ့သော်လည်းကောင်း အရပ်သားတွေကို အတင်းအကျပ်ဖမ်းခေါ်ပြီး လူသားဒိုင်း အဖြစ် စေခိုင်းတဲ့ ပြစ်မှုတွေ ကျူးလွန်ခဲ့တာလို့ ဆိုပါတယ်။

လူသားဒိုင်းအဖြစ် ဖမ်းဆီးခေါ်ဆောင်ခံရသူတွေထဲက လွတ်မြောက်လာသူတွေရှိပေမဲ့ ၉ ယောက်ကတော့ အလောင်းပြန်မရအောင် သတ်ဖြတ်ခံခဲ့ရတယ်လို့ အစီရင်ခံစာမှာ ဖော်ပြပါတယ်။

ချင်းရေးရာအဖွဲ့ချုပ် အတွင်းရေးမှူး ဆလိုင်းဗန်ဆွီးဆန်က “ထိုးစစ်ဆင်လာတဲ့အခါ စစ်ကောင်စီဘက်က အရေးနိမ့်လာတဲ့အခါမှာ အဲဒီနည်းလမ်းကို အသုံးပြုတာ တွေ့ရတယ်။ ပြန်လွတ်လာတဲ့ သူတွေကလည်း အချို့သူတွေက မြန်မာပြည်မှာ မနေရဲတော့ဘဲနဲ့ အိန္ဒိယဘက်ခြမ်းကို ထွက်ပြေးလာသူတွေရှိတယ်။ တချို့ကလေးတွေဆို ပစ္စည်းပြုတ်ကျသံ ကြားရင်တောင် ထိတ်လန့်တဲ့ အနေအထားထိရောက်တယ်” လို့ ပြောပါတယ်။

စစ်အာဏာသိမ်းမှု ၃ နှစ်အတွင်း ချင်းအမျိုးသားကာကွယ်ရေးတပ်များနဲ့ စစ်ကောင်စီတို့ အကြား တိုက်ပွဲပေါင်း ၉၀၀ ကျော် ဖြစ်ခဲ့ပြီး စစ်ကောင်စီက သတ်ဖြတ်လို့ ချင်းအမျိုးသား ၆၁၈ ယောက် သေဆုံးခဲ့ရတယ်လို့ အစီရင်ခံစာမှာဖော်ပြထားပါတယ်။

လူဦးရေ ၅ သိန်းလောက်ပဲရှိတဲ့ ချင်းအမျိုးသားတွေအဖို့ ဒီအရေအတွက်ဟာ ၀ ဒသမ ၁၂ ရာခိုင်နှုန်း (ပျမ်းမျှ လူ ၁၀၀၀ မှာ ၁ ယောက်သေဆုံး) ဖြစ်တယ်လို့လည်း ဆိုပါတယ်။

ပြီးတော့ စစ်အာဏာသိမ်းလိုက်တဲ့ ၃ နှစ်အတွင်း ချင်းပြည်နယ်နဲ့ ချင်းအမျိုးသားတွေရဲ့ လူနေမှုဘဝဟာလည်း ထိုးဆင်းလာတာကို တွေ့ရတယ်လို့ ဆိုပါတယ်။