ရှမ်းပြည်နယ်မြောက်ပိုင်း နမ့်ဖတ်ကာနယ်က စစ်ကောင်စီတပ်စခန်းတွေကို သိမ်းပိုက်အောင်မြင်ခဲ့တဲ့ ကချင်လွတ်မြောက်ရေးတပ်မတော် (KIA) တပ်ဖွဲ့ဝင်တွေကို ပြည်သူတွေက သောင်းသောင်းဖျဖျ ကြိုဆိုခဲ့ကြပါတယ်။
“နမ့်ဖတ်ကာမှာပါ။ အရင်းအနှီးများတဲ့ အောင်ပွဲပေါ့။ အောင်မြင်မှုအတွက် ဝမ်းသာရသလို ကျဆုံးသွားသူတွေအတွက်လည်း စိတ်မကောင်းဖြစ်ရတာပဲ” လို့ မုန်မြစ် ဆင်လီဂါးလို့ ကချင်တွေခေါ်ဆိုတဲ့ Kachin Sub - State နယ်ထဲက ပြည်သူတဦးက ပြောပါတယ်။
KIA တပ်ဖွဲ့ဝင်တွေကို ရိုးရာဝတ်စုံတွေ၊ ဂုဏ်ပြုကြိုဆိုသီချင်းတွေနဲ့ ပြည်သူတွေက ကြိုဆိုခဲ့ကြတာပါ။
“ဒီလိုကြိုဆိုရဖို့ မျှော်လင့်ဖူးခဲ့တယ်။ ကြုံတွေ့ရလို့လည်း ဝမ်းသာရတယ်။ ညီနောင်မဟာမိတ်တွေနဲ့ စည်းစည်းလုံးလုံး ဆက်နေကြရဖို့ မျှော်လင့်ပါတယ်” လို့ ပြည်သူတဦးက ပြောပါတယ်။
ဇန်နဝါရီ ၂၄ ရက် ညနေ ၃ နာရီခွဲပတ်ဝန်းကျင်မှာ စစ်ကောင်စီတပ်စခန်းတွေကို KIA က သိမ်းပိုက်လိုက်ပြီး လက်နက်ခဲယမ်းများစွာကို သိမ်းပိုက်ရရှိခဲ့သလို နမ့်ဖတ်ကာနယ် ပတ်ဝန်းကျင်လည်း စစ်ကောင်စီဘက်က ပစ်ခတ်တဲ့ လက်နက်ကြီးကျည်နဲ့ လေယာဥ်ဗုံးကြဲခံရတာမို့ ထိခိုက်ပျက်စီးမှု များတယ်လို့ သိရပါတယ်။
