တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ်၊ ဘန်းလမွတ်ကျေးရွာအုပ်စုမှာ ဇန်နဝါရီ ၂၅ ရက် ညနေ ၃ နာရီဝန်းကျင်လောက်က ရေခပ်ဆင်းလာတဲ့ စစ်ကောင်စီတပ်သားတွေကို ပြောက်ကျားစနစ်နဲ့ သွားရောက်ပစ်ခတ်ခဲ့တယ်လို့ မြိတ်ခရိုင်ပြည်သူ့ကာကွယ်ရေးစစ်ကြောင်းရဲ့ တာဝန်ခံဆီက သိရပါတယ်။
စစ်ကောင်စီတပ်က စခန်းချနေထိုင်နေတဲ့ ဘန်းလမွတ်ကျေးရွာအုပ်စု ထိုးဒါကြီးရှိ ဒေသခေါ် လေသာတောင် ဆက်သွယ်ရေးစခန်းက စစ်ကောင်စီတပ်သားတွေကို သွားရောက် တိုက်ခိုက်ခဲ့တာဖြစ်ပြီး စစ်ကောင်စီဘက်က ၅ ဦးသေဆုံးကာ ၂ ဦး ဒဏ်ရာရခဲ့တယ်လို့ မြိတ်ခရိုင်ပြည်သူ့ကာကွယ်ရေးစစ်ကြောင်း ၂ တာဝန်ခံက ပြောပါတယ်။
"သူတို့က လေသာတောင်ပေါ်မှာ စခန်းချထားတာ၊ သူတို့က ၂ ရက်တကြိမ် ၃ ရက်တကြိမ် ရေဆင်းခပ်တယ်လို့သ တင်းရထားတော့ ကျနော်တို့အဖွဲ့ကနေ ကင်းပုန်းသွားဝပ်ပြီး စောင့်နေတာပေါ့။ စောင့်နေအချိန်မှာ သူတို့အဖွဲ့က ၅ ယောက်က ရေပုံးကိုင်ပြီးဆင်းလာတယ်။ ကျနော်တို့ဘက်က ဝိုင်းထားပြီးတော့ လက်နက်ချခိုင်းပြီး အရှင်ဖမ်းဖို့ လုပ်မယ်ဆိုတုန်း အနောက်မှာထပ်ပါလာတဲ့စစ်သား ၂ ယောက်က စပစ်တော့ ပစ်ခတ်မှုဖြစ်တာ၊ ၂ ယောက်က လွတ်သွားတယ်။ အဲ့ဒီရေခပ်တဲ့ ၅ ယောက်က ပစ်သတ်လို့ သေသွားတယ်”လို့ ပြောပါတယ်။
နာရီဝက်ကြာ ပစ်ခတ်မှုတွေဖြစ်ပြီးနောက် လေသာတောင်ပေါ်စခန်းကနေ စစ်တပ်က လက်နက်ကြီးနဲ့ ပစ်လို့ ပြည်သူ့ကာကွယ်ရေးတပ်တွေ ပြန်ဆုတ်ခွာလာခဲ့ရတယ်လို့ သိရပါတယ်။
ပြည်သူ့ကာကွယ်ရေးတပ်ဖွဲ့ဝင် တဦးက "အားလုံး ၇ ယောက်ဆင်းလာတယ်။ အနောက်က ၂ ယောက်က လူအမြင်မခံဘူး။ ကျနော်တို့က အဲဒါကိုမသိလိုက်ဘူး။ သူတို့ ၂ ယောက် ထွက်ပြေးပြီးတာနဲ့ ၅၅၇ ရော၊ အမြောက်တပ်ကရောပစ်တာ။ ကြားညှပ်ပစ်လိုက်တော့ ပစ်ကွင်းကနေ အသည်းအသန်ထွက်ပြေးလိုက်ရတယ်။ တောင်ကွယ်တခုကခံနေတော့ ကံကောင်းသွားတယ်"လို့ ပြောပါတယ်။
အဆိုပါ တိုက်ခိုက်မှုကိုလုပ်ဆောင်ခဲ့တဲ့ မြိတ်ခရိုင် ပြည်သူ့ကာကွယ်ရေးစစ်ကြောင်း ၂ ဟာ တောပုန်းကြီးပြည်သူ့ကာကွယ်ရေးအဖွဲ့၊ တနင်္သာရီရိုးမ ပြည်သူ့ကာကွယ်ရေးအဖွဲ့၊ မြိတ်ခရိုင် တပ်ရင်း ၂ တပ်ခွဲ ၂၊ ကျွန်းစုမြို့နယ်ပကဖ၊ ပုလောမြို့နယ်ပကဖ၊ တနင်္သာရီပကဖ၊ Dragon Squad ဒရုန်းတပ်ဖွဲ့တို့မှ မဟာမိတ်တပ်ဖွဲ့အဖြစ်ပူးပေါင်းဖွဲ့စည်းထားတဲ့ စစ်ကြောင်း ဖြစ်ပါတယ်။
