ဇန်နဝါရီ ၂၃ ရက် ဒီနေ့ ပြင်ပရွှေဈေးကွက်မှာ အခေါက်ရွှေ ၁ ကျပ်သားကို ကျပ် ၃၈ သိန်း အထက်ထိ မြင့်တက်လာပြီး အမေရိကန်ဒေါ်လာ ငွေလဲနှုန်းကလည်း ၁ ဒေါ်လာကို ကျပ် ၃,၅၀၀ ဝန်းကျင်ထိ ဖြစ်ပေါ်နေပါတယ်။

ပြည်တွင်းရွှေဈေးဟာ ဒီနေ့မနက်က ကျပ် ၃၈ သိန်းအောက်မှာ ဈေးဖွင့်ခဲ့ပေမဲ့ ညနေပိုင်း ပြင်ပဈေးကွက်မှာတော့  ၃,၈၂၅,၀၀၀ ကျပ်အထိ ဆက်တိုက် မြင့်တက်လာတာပါ။

ရန်ကုန်မြို့က ရွှေဆိုင်လုပ်ငန်းရှင်တဦးက “အဓိကတော့ ကမ္ဘာ့ရွှေဈေးနဲ့ ဒေါ်လာဈေးတက်လို့ တက်တာပါ။ အရောင်းအဝယ်ကတော့  အရင်လိုပဲ အေးပါတယ်” လို့ ပြောပါတယ်။

ကမ္ဘာ့ရွှေဈေးကလည်း ဒီကနေ့မနက်က ၁ ထရိုင်အောင်စကို အမေရိကန်ဒေါ်လာ ၂,၀၂၀ အထက်မှာ ရှိခဲ့ရာက ညနေပိုင်းမှာ‌ အမေရိကန်ဒေါ်လာ ၂,၀၃၀ အထက်ထိ မြင့်တက်လာပါတယ်။

မြန်မာပြည်တွင်းရွှေဈေးက ပြီးခဲ့တဲ့ ဒီဇင်ဘာလအထိ ၁ ကျပ်သားကို  ကျပ် ၃၇ သိန်းဝန်းကျင်မှာ ငြိမ်နေခဲ့ပေမဲ့ ဇန်နဝါရီ နှစ်ဆန်းပိုင်းကစပြီး ဆက်တိုက် မြင့်တက်လာခဲ့ပါတယ်။

ပြင်ပရွှေဈေးက ကျပ် ၃,၈၂၅,၀၀၀ ကျပ်ထိ မြင့်တက်နေပေမဲ့ ရန်ကုန်တိုင်း ရွှေလုပ်ငန်းရှင်များအသင်း (YGEA) က သတ်မှတ်တဲ့ ရွှေဈေးနှုန်းကတော့ ဒီနေ့ ဇန်နဝါရီ ၂၃ ရက် ညနေပိုင်းမှာ ၁ ကျပ်သားကို ၃,၆၅၄,၀၀၀ ဝန်းကျင်သာ ရှိနေတာ တွေ့ရပါတယ်။

စစ်ကောင်စီ ဗဟိုဘဏ်အနေနဲ့ ပြည်တွင်း နိုင်ငံခြား‌ငွေ ဈေးကွက်ထဲကို အမေရိကန်ဒေါ်လာတွေ ထည့်သွင်း ရောင်းချပေးနေတယ်လို့ မကြာခဏ ထုတ်ပြန်နေတဲ့ကြားက အမေရိကန်ဒေါ်လာငွေလဲနှုန်းကတော့ ပြီးခဲ့တဲ့ သီတင်းပတ်အထိ ၁ ဒေါ်လာကို ကျပ် ၃,၄၅၀ ဝန်းကျင်မှာ ငြိမ်နေခဲ့ပြီး အခုရက်ပိုင်းမှ စတင်လှုပ်ခတ်လာတာ ဖြစ်ပါတယ်။