ကချင်ပြည်နယ် ဖားကန့်မြို့နယ်၊ ဆိပ်မူကျေးရွာအုပ်စု၊ ဝှေခါကျေးရွာက စစ်ကောင်စီ တပ်စခန်းကို ကချင်လွတ်မြောက်ရေးတပ်မတော်  KIA တပ်မဟာ ၉၊ တပ်ရင်း ၆  နဲ့ PDF ပူးပေါင်း တပ်ဖွဲ့တွေက ဒီနေ့ ဇန်နဝါရီ ၂၀ ရက် မနက်ပိုင်းမှာ သိမ်းပိုက်နိုင်ခဲ့တယ်လို့ သိရပါတယ်။

ဇန်နဝါရီ ၁၈ ရက်နေ့ မွန်းလွဲ ၃ နာရီချိန်က ဖားကန့် ဗျူဟာကုန်းကနေ လက်နက်ကြီးလှမ်းကူပစ်ပေးသလို ညနေပိုင်းမှာလည်း လေယာဉ်နဲ့ ၂ ကြိမ်လာရောက် ပစ်ခတ်ခဲ့တာကြောင့် KIA ဘက်ကလည်း ပြန်လည် ပစ်ခတ် တိုက်ခိုက်ခဲ့တယ်လို့ ဒေသခံတွေက ပြောပါတယ်။

ဒေသခံတယောက်က “မနေ့ကတည်းက သိမ်းနိုင်ပြီဆိုပြီး ဝမ်းသာလိုက်သေးတယ်။ ဒီမနက်ကတော့ သိမ်းပိုက်နိုင်ခဲ့တာ သေချာသွားပြီ။ အရင်ရက်တွေက ခေါင်းပေါ်မှာပဲ ပေါက်ကွဲနေသလိုပဲ။ ဆက်တိုက်ပစ်နေတာ။ လမ်းတွေပိတ်လိုက်တဲ့ ရက်အတွင်း မြစ်ကြီးနား အရေးပေါ်ဆင်းရမယ့် လူနာလည်း မဆင်းနိုင်လို့​သေသွားတာလည်း ရှိခဲ့တယ်” လို့ ပြောပါတယ်။

ဒေသခံတယောက်ကလည်း ဒီမနက်မှာ စစ်တပ်က လက်နက်ကြီးနဲ့ ပစ်ခတ်နေပြီး ဝှေခါတဝိုက်မှာတော့ အခြေအနေရှုပ်ထွေးနေတုန်းပဲ ပြောပါတယ်။

ဇန်နဝါရီ ပထမပတ်ကတည်းက  နှစ်ဖက်ထိတွေ့မှုတွေရှိနေပြီး ၁၅ ရက်အကြာမှာ ဝှေခါဗျူဟာကုန်းကို သိမ်းပိုက်နိုင်ခဲ့တာဖြစ်ပါတယ်။

အလားတူပဲ ဒီနေ့ ဇန်နဝါရီ ၂၀ ရက် မနက် ၆ နာရီကနေ စတင်ပြီး ရှမ်းပြည်နယ် မြောက်ပိုင်း၊ မဘိမ်းမြို့နယ်ကို KIA က စစ်မျက်နှာဖွင့် တိုက်ခိုက်နေတယ်လို့လည်း သိရပါတယ်။