Home
မြန်မာသတင်း
မိုးမိတ်တွင်တိုက်ပွဲဖြစ်၊ လေယာဉ်ဖြင့်ဗုံးကြဲမှုကြောင့် မိုင်းဖုန်းဆရာတော်တည်ထားသည့် စေတီ၊ ဘုန်းကြီးကျောင်း ပျက်စီး
DVB
·
January 12, 2024
moe 1212024

ရှမ်းပြည်မြောက်ပိုင်း၊ မိုးမိတ်မြို့နယ်ထဲမှာ စစ်ကောင်စီတပ်နဲ့ တအာင်းအမျိုးသား လွတ်မြောက်ရေးတပ်မတော်(TNLA)တို့ တိုက်ပွဲဖြစ်ပြီး လက်နက်ကျည်တွေ ရပ်ထဲရွာထဲကျ ရောက်တာကြောင့် အရပ်သားတွေ ကျည်ထိမှန်ဒဏ်ရာရတာနဲ့ လူနေအိမ်၊ ဘုန်းကြီးကျောင်းတွေ ထိခိုက်ပျက်စီးတာ ရှိနေပါတယ်။

ဇန်နဝါရီ ၁၁ ရက် နေ့လယ်ပိုင်းက မိုးမိတ်မြို့ မြောက်ဘက် ၂ မိုင်ခန့်အကွာရှိ အုန်းကြောရွာသစ်နဲ့ ရွာဟောင်းအနီးမှာ တိုက်ပွဲဖြစ်ပြီး အုန်းကြောရွာဟောင်းက နေအိမ် ၄ လုံးနဲ့ ရွာဦးကျောင်း လက်နက်ကြီး ထိမှန်ပျက်စီးသွားသလို လူငယ် တယောက်လည်း ကျည်ထိမှန်ဒဏ်ရာရခဲ့တယ်လို့ ဒေသခံ တဦးက ဒီဗွီဘီကို ပြောပါတယ်။ 

“မနေ့တုန်းက နေ့လယ် ၁၂ နာရီလောက်ကနေ မွန်းလွဲ ၂ နာရီလောက်ထိ ပစ်ခတ်ကြတယ်ခင်ဗျ။ အုန်းကြောရွာဟောင်းထဲ လက်နက်ကြီးကျတာ နေအိမ် ၄ လုံးပျက်စီးသွားတယ်။ အများအားဖြင့် ခြေတံရှည်ပျဉ်ထောင်အိမ်တွေပါ၊ အိမ်နံရံတွေ ပေါက်ကုန်တယ်၊ ခေါင်မိုးတွေ ပွင့်ထွက်တယ်။ အုန်းကြောရွာဦးကျောင်း ခေါင်မိုးနဲ့ဇရပ်ဆောင်တွေလည်း ပျက်စီးပါတယ်။ အသက် ၂၀ လောက်ရှိတဲ့လူငယ် ၁ ဦးက ကျည်ဆန်က သူ့ရဲ့ ညာဘက်နားရွက်ကို ရှပ်မှန်သွားတယ်။”

ပစ်ခတ်မှုတွေကြောင့် ရွာသားတွေ ထိတ်လန့်ပြီး တခြားရွာ ရှိဆွေမျိုးနီးစပ်တွေရှိရာ သွားရောက် ခိုလှုံနေကြောင်း၊ ဒဏ်ရာရလူငယ်မှာလည်း မိုးမိတ်ဆေးရုံမှာ ဆရာဝန်ဆရာမတွေမရှိတော့လို့  သပိတ်ကျင်းဆေးရုံကို သွားပို့ထားရတယ်လို့  ဆိုပါတယ်။

ဇန်နဝါရီ ၁၀ ရက် ညနေ ၅ နာရီဝန်းကျင်ကလည်း ၄ မိုင်နဲ့ အုန်းကြောရွာသစ်အထွက် တံတားနဲ့ လျှပ်စစ်စီမံကိန်းရုံးပေါက်မှာ တိုက်ပွဲ ဖြစ်ပွားခဲ့သလို ဇန်နဝါရီ ၉ ရက် နေ့လယ် ၁၂ နာရီခွဲလောက်က စင့်ကင်ရွာနဲ့ မန်ဖွယ်ရွာကို စစ်ကောင်စီတပ်က လေယာဉ်နဲ့ ဗုံးကြဲခဲ့လို့ မိုင်းဖုန်းဆရာတော်တည်ထားတဲ့ စေတီ၊ ဘုန်းကြီးကျောင်းနဲ့ ဇရပ်တွေ ထိခိုက်ပျက်စီးခဲ့ပါတယ်။

ဒီကနေ့မနက်မှာတော့ ပစ်ခတ်သံတွေ ငြိမ်နေပေမယ့် စိတ်မချရသေးကြောင်း၊ မိုးမိတ်မြို့နယ်ထဲမှာ စစ်ကောင်စီနဲ့  PSLF/TNLA တပ်ဖွဲ့ဝင်တွေကြား တိုက်ပွဲဖြစ်နေတာ တစ်ပတ်လောက်ရှိပြီး ညတိုင်းလို ပစ်ခတ်သံတွေကြားနေရတာကြောင့်  မိုးမိတ်မြို့နေပြည်သူရဲ့ ၇၀ ရာခိုင်နှုန်လောက်  စစ်ဘေးရှောင်နေရတယ်လို့ ဒေသခံကဆိုပါတယ်။ 

စစ်ဘေးရှောင်ရသူတွေထဲမှာ မိုးမိတ်ပြည်သူ့ဆေးရုံက ဆရာဝန်ဆရာမ ၊ ကျန်းမာရေး ဝန်ထမ်းတွေ၊ ပညာရေးဝန်ထမ်း၊ ရုံးဝန်ထမ်းအသီးသီးတွေပါ ပါလို့ ပြည်သူ့ဝန်ဆောင်မှု လုပ်ငန်းတွေ ရပ်နေတယ်လို့  ဒေသခံက ပြောပါတယ်။ 

Live

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024